Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 2 | |
2:1 | [Зач. 5.] Бысть же во дни тыя, изыде повелѣнiе от кесаря Августа написати всю вселенную. |
2:2 | Сiе написанiе первое бысть владящу Сиріею Киринію. |
2:3 | И идяху вси написатися, кождо во свой градъ. |
2:4 См.: 🔗1Цар. 16:1 🔗Ин. 7:42 | Взыде же и Иосифъ от Галилеи, изъ града Назарета, во Иудею, во градъ Давидовъ, иже нарицается Виѳлеемъ, зане быти ему от дому и отечества Давидова, |
2:5 | написатися съ Маріею обрученою ему женою, сущею непраздною. |
2:6 | Бысть же, егда быста тамо, исполнишася дніе родити Ей: |
2:7 См.: 🔗Мф. 2:1 | и роди Сына своего Первенца, и повитъ Его, и положи Его въ яслехъ: зане не бѣ имъ мѣста во обители. |
2:8 | И пастырiе бѣху въ тойже странѣ, бдяще и стрегуще стражу нощную о стадѣ своемъ. |
2:9 | И се Ангелъ Господень ста въ нихъ, и слава Господня осiя ихъ: и убояшася страхомъ велiимъ. |
2:10 | И рече имъ Ангелъ: не бойтеся: се бо благовѣствую вамъ радость велiю, яже будетъ всѣмъ людемъ: |
2:11 | яко родися вамъ днесь Спасъ, Иже есть Христосъ Господь, во градѣ Давидовѣ: |
2:12 | и се вамъ знаменiе: обрящете Младенца повита, лежаща въ яслехъ. |
2:13 | И внезапу бысть со Ангеломъ множество вой небесныхъ, хвалящихъ Бога и глаголющихъ: |
2:14 | слава въ вышнихъ Богу, и на земли миръ, во человѣцѣхъ благоволенiе. |
2:15 | И бысть, яко отидоша от нихъ на небо Ангели, и человѣцы пастырiе рѣша другъ ко другу: прейдемъ до Виѳлеема и видимъ глаголъ сей бывшiй, егоже Господь сказа намъ. |
2:16 | И прiидоша поспѣшшеся, и обрѣтоша Марiамь же и Иосифа, и Младенца лежаща во яслехъ. |
2:17 | Видѣвше же сказаша о глаголѣ глаголаннѣмъ имъ о Отрочати Семъ. |
2:18 | И вси слышавшiи дивишася о глаголанныхъ от пастырей къ нимъ. |
2:19 | Марiамь же соблюдаше вся глаголы сiя, слагающи въ сердцы Своемъ. |
2:20 | [Зач. 6.] И возвратишася пастырiе, славяще и хваляще Бога о всѣхъ, яже слышаша и видѣша, якоже глаголано бысть къ нимъ. |
2:21 | И егда исполнишася осмь дній, да обрѣжутъ Его, и нарекоша имя Ему Иисусъ, нареченное Ангеломъ прежде даже не зачатся во чревѣ. |
2:22 | И егда исполнишася дніе очищенiя ею, по закону Моисеову, [Зач. 7.] вознесоста Его во Иерусалимъ, поставити Его предъ Господемъ, |
2:23 | якоже есть писано въ законѣ Господни: яко всякъ младенецъ мужеска полу, разверзая ложесна, свято Господеви наречется: |
2:24 См.: 🔗Лев. 12:6 | и еже дати жертву, по реченному въ законѣ Господни, два горличища или два птенца голубина. |
2:25 См.: 🔗Лк. 24:21 | [Зач. 8.] И се, бѣ человѣкъ во Иерусалимѣ, емуже имя Симеонъ: и человѣкъ сей праведенъ и благочестивъ, чая утѣхи Израилевы: и Духъ бѣ Святъ въ немъ. |
2:26 | И бѣ ему обѣщано Духомъ Святымъ, не видѣти смерти, прежде даже не видитъ Христа Господня. |
2:27 | И прiиде Духомъ въ церковь. И егда введоста родителя Отроча Иисуса, сотворити има по обычаю законному о Немъ, |
2:28 | и той прiемъ Его на руку своею, и благослови Бога, и рече: |
2:29 | нынѣ отпущаеши раба Твоего, Владыко, по глаголу Твоему, съ миромъ: |
2:30 | яко видѣстѣ очи мои спасенiе Твое, |
2:31 | еже еси уготовалъ предъ лицемъ всѣхъ людей: |
2:32 | свѣтъ во откровенiе языкомъ, и славу людей Твоихъ Израиля. |
2:33 | И бѣ Иосифъ и Мати Его чудящася о глаголемыхъ о Немъ. |
2:34 | И благослови я Симеонъ, и рече къ Маріи Матери Его: се лежитъ Сей на паденiе и на востанiе многимъ во Израили, и въ знаменiе пререкаемо: |
2:35 См.: 🔗Ин. 19:25 | и Тебѣ же Самой душу пройдетъ оружiе: яко да открыются от многихъ сердецъ помышленiя. |
2:36 | И бѣ Анна пророчица, дщи Фануилева, от колѣна Асирова: сiя заматорѣвши во днехъ мнозѣхъ, живши съ мужемъ седмь лѣтъ от дѣвства своего: |
2:37 См.: 🔗1Тим. 5:5 | и та вдова яко лѣтъ осмьдесятъ и четыре, яже не отхождаше от церкве, постомъ и молитвами служащи день и нощь. |
2:38 | И та въ той часъ приставши исповѣдашеся Господеви, и глаголаше о Немъ всѣмъ чающымъ избавленiя во Иерусалимѣ. |
2:39 | И яко скончашася вся по закону Господню, возвратишася въ Галилею, во градъ свой Назаретъ. |
2:40 См.: 🔗Лк. 2:52 | Отроча же растяше и крѣпляшеся духомъ, исполняяся премудрости: и благодать Божiя бѣ на Немъ. |
2:41 См.: 🔗Исх. 23:17 🔗Исх. 34:23 | И хождаста родителя Его на всяко лѣто во Иерусалимъ въ праздникъ Пасхи. |
2:42 | И егда бысть двоюнадесяти лѣту, восходящымъ имъ во Иерусалимъ по обычаю праздника, |
2:43 | и скончавшымъ дни, и возвращающымся имъ, оста Отрокъ Иисусъ во Иерусалимѣ: и не разумѣ Иосифъ и Мати Его: |
2:44 | мнѣвша же Его въ дружинѣ суща, преидоста дне путь, и искаста Его во сродницѣхъ и въ знаемыхъ: |
2:45 | и не обрѣтша Его, возвратистася во Иерусалимъ, взыскающа Его. |
2:46 | И бысть по трiехъ днехъ, обрѣтоста Его въ церкви, сѣдящаго посредѣ учителей, и послушающаго ихъ, и вопрошающаго ихъ: |
2:47 | ужасахуся же вси послушающiи Его о разумѣ и о отвѣтѣхъ Его. |
2:48 | И видѣвша Его, дивистася: и къ Нему Мати Его рече: Чадо, что сотвори нама тако? Се отецъ Твой и Азъ боляща искахома Тебе. |
2:49 См.: 🔗Мал. 3:1 | И рече къ нима: что яко искаста Мене? Не вѣста ли, яко въ тѣхъ, яже Отца Моего, достоитъ быти Ми? |
2:50 См.: 🔗Лк. 9:45 | И та не разумѣста глагола, егоже глагола Има. |
2:51 | И сниде съ нима, и прiиде въ Назаретъ: и бѣ повинуяся има. И Мати Его соблюдаше вся глаголы сiя въ сердцы Своемъ. |
2:52 См.: 🔗Лк. 2:40 | И Иисусъ преспѣваше премудростiю и возрастомъ и благодатiю у Бога и человѣкъ. |