Кни́га Заха́рїа, глава̀ з҃

	Язык: Церковнослав. (цс.) Церковнослав. (гражд.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке.
	Глава̀ з҃
7:1	И҆ бы́сть въ четве́ртое лѣ́то, при да́рїи царѝ, бы́сть сло́во гдⷭ҇не ко заха́рїи въ четве́ртый мцⷭ҇а девѧ́тагѡ, и҆́же є҆́сть хаселе́ѵъ.
7:2	И҆ посла̀ въ веѳи́ль сараса́ръ и҆ а҆рвесее́ръ ца́рь и҆ мꙋ́жїе є҆гѡ̀ моли́ти гдⷭ҇а,
7:3 См.: 🔗4Цар. 25:8 🔗Зах. 8:19	глаго́лѧ ко свѧще́нникѡмъ, и҆̀же во хра́мѣ гдⷭ҇а (бг҃а) Вседержи́телѧ, и҆ проро́кѡмъ, глаго́лѧ: а҆́ще вни́де здѣ̀ въ пѧ́тый мцⷭ҇ъ ст҃ы́нѧ, (пла́чѧ и҆лѝ постѧ́сѧ,) ꙗ҆́коже сотвори́хъ ᲂу҆жѐ мнѡ́га лѣ̑та.
7:4	И҆ бы́сть сло́во гдⷭ҇а Вседержи́телѧ ко мнѣ̀ гл҃ѧ:
7:5 См.: 🔗Ис. 58:5 🔗Зах. 8:19	рцы̀ ко всѣ̑мъ лю́демъ землѝ и҆ ко свѧще́нникѡмъ глаго́лѧ: а҆́ще пости́стесѧ и҆лѝ плачево́пльствисте въ пѧти́нахъ и҆лѝ седми́нахъ (мцⷭ҇а), и҆ сѐ, се́дмьдесѧтъ лѣ́тъ, посто́мъ ли пости́стесѧ мѝ;
7:6	и҆ а҆́ще ꙗ҆́сте и҆лѝ пїетѐ, не вы́ ли ꙗ҆́сте и҆ пїетѐ;
7:7	Не сїѧ̑ ли сꙋ́ть словеса̀, ꙗ҆̀же гл҃а гдⷭь рꙋка́ми прⷪ҇ро́кѡвъ пре́жнихъ, є҆гда̀ бѣ̀ і҆ерⷭ҇ли́мъ населе́нъ и҆ гобзꙋ́ющь, и҆ гра́ди є҆гѡ̀ ѡ҆́крестъ, и҆ нагѡ́рнаѧ и҆ подѡ́льнаѧ населє́на бѧ́хꙋ;
7:8	И҆ бы́сть сло́во гдⷭ҇не ко заха́рїи гл҃ѧ:
7:9 См.: 🔗Зах. 8:16	си́це гл҃етъ гдⷭ҇ь Вседержи́тель: сꙋ́дъ пра́веденъ сꙋди́те и҆ ми́лость и҆ щедрѡ́ты твори́те кі́йждо ко бра́тꙋ своемꙋ̀,
7:10 См.: 🔗Исх. 22:22 🔗Лев. 19:33 🔗Ис. 1:23 🔗Иер. 5:28 🔗Зах. 8:19	а҆ вдови́цы и҆ си́ра, и҆ прише́льца и҆ ᲂу҆бо́га не наси́льствꙋйте, и҆ ѕло́бы кі́йждо бра́та своегѡ̀ да не по́мнитъ въ сердца́хъ свои́хъ.
7:11 См.: 🔗Ис. 42:20 🔗Зах. 1:4 🔗Евр. 3:8	И҆ не покори́шасѧ, є҆́же внима́ти, и҆ да́ша плещы̀ презира́ющыѧ, и҆ ᲂу҆шеса̀ своѧ̑ ѡ҆тѧготи́ша, є҆́же не слы́шати,
7:12 См.: 🔗Иер. 5:3 🔗Ис. 48:8	и҆ се́рдце своѐ ᲂу҆чини́ша непокори́во, не послꙋ́шати зако́на моегѡ̀ и҆ слове́съ, ꙗ҆̀же посла̀ гдⷭь Вседержи́тель дх҃омъ свои́мъ рꙋко́ю прⷪ҇ро́кѡвъ пре́жнихъ: и҆ бы́сть гнѣ́въ вели́кїй ѿ гдⷭ҇а Вседержи́телѧ.
7:13 См.: 🔗Прит. 1:28 🔗Ис. 1:15 🔗Иер. 11:11 🔗Иез. 8:18	И҆ бꙋ́детъ, ꙗ҆́коже речѐ, и҆ не ᲂу҆слы́шаша є҆гѡ̀: си́це возопїю́тъ, и҆ не и҆́мамъ ᲂу҆слы́шати, гл҃етъ гдⷭ҇ь Вседержи́тель:
7:14	и҆ ѿве́ргꙋ ѧ҆̀ во всѧ̑ ꙗ҆зы́ки, и҆̀же не разꙋмѣ́ша, и҆ землѧ̀ запꙋстѣ́етъ послѣдѝ и҆́хъ ѿ проходѧ́щагѡ и҆ ѿ возвраща́ющагѡсѧ: и҆ ᲂу҆чини́ша и҆збра́ннꙋю зе́млю въ запꙋстѣ́нїе.