Кни́га І҆́ѡвъ, глава̀ к҃ѕ

	Язык: Церковнослав. (цс.) Церковнослав. (гражд.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке.
	Глава̀ к҃ѕ
26:1	Ѿвѣща́въ же і҆́ѡвъ, речѐ:
26:2	комꙋ̀ прилѣжи́ши, и҆лѝ комꙋ̀ хо́щеши помога́ти; не семꙋ́ ли, є҆мꙋ́же мно́га крѣ́пость и҆ є҆мꙋ́же мы́шца крѣпка̀ є҆́сть;
26:3	Комꙋ̀ совѣ́тъ да́лъ є҆сѝ; не є҆мꙋ́же ли всѧ̀ премꙋ́дрость; Кого̀ пожене́ши; не є҆мꙋ́же ли преве́лїѧ си́ла;
26:4	Комꙋ̀ возвѣсти́лъ є҆сѝ глаго́лы; дыха́нїе же чїе́ є҆сть и҆сходѧ́щее и҆з̾ тебє̀;
26:5 См.: 🔗Ис. 14:9	Є҆да̀ и҆споли́ни родѧ́тсѧ под̾ водо́ю и҆ сосѣ́дми є҆ѧ̀;
26:6 См.: 🔗Прит. 15:11 🔗Евр. 4:13	На́гъ а҆́дъ пред̾ ни́мъ, и҆ нѣ́сть покрыва́ла па́гꙋбѣ.
26:7 См.: 🔗Иов. 38:6 🔗Евр. 1:3	Простира́ѧй сѣ́веръ ни на че́мже, повѣ́шаѧй зе́млю ни на че́мже,
26:8 См.: 🔗Иов. 38:37 🔗Прит. 8:28	свѧзꙋ́ѧй во́дꙋ на ѡ҆́блацѣхъ свои́хъ, и҆ не расто́ржесѧ ѡ҆́блакъ под̾ не́ю:
26:9	держа́й лицѐ престо́ла, простира́ѧ над̾ ни́мъ ѡ҆́блакъ сво́й:
26:10 См.: 🔗Иов. 38:8 🔗Прит. 8:29 🔗Иер. 5:22	повелѣ́нїе ѡ҆крꙋжѝ на лицѐ воды̀ да́же до сконча́нїѧ свѣ́та со тьмо́ю.
26:11 См.: 🔗2Цар. 22:8	Столпѝ небе́снїи простро́шасѧ и҆ ᲂу҆жасо́шасѧ ѿ запреще́нїѧ є҆гѡ̀.
26:12 См.: 🔗Пс. 88:10 🔗Ис. 51:10 🔗Лк. 8:25	Крѣ́постїю ᲂу҆кротѝ мо́ре, и҆ хи́тростїю є҆гѡ̀ низложе́нъ бы́сть ки́тъ:
26:13	верєи́ же небє́сныѧ ᲂу҆боѧ́шасѧ є҆гѡ̀: повелѣ́нїемъ же ᲂу҆мертвѝ ѕмі́а ѿстꙋ́пника.
26:14	Сѐ, сїѧ̑ ча̑сти пꙋтѝ є҆гѡ̀: и҆ ѡ҆ ка́пли сло́ва ᲂу҆слы́шимъ въ не́мъ: си́лꙋ же гро́ма є҆гѡ̀ кто̀ ᲂу҆вѣ́да, когда̀ сотвори́тъ;