Язык:
Церковнослав. (цс.)
Елизаветинская Библия на церковнославянском языке.
| |
Глава̀ и҃і | |
18:1 См.: 🔗Иов. 8:1 🔗Иов. 25:1 | Ѿвѣща́въ же валда́дъ саѵхе́йскїй, речѐ: |
18:2 | доко́лѣ не преста́неши; пождѝ, да и҆ мы̀ возглаго́лемъ. |
18:3 | И҆ почто̀ а҆́ки четверонѡ́жнаѧ ᲂу҆молча́хомъ пред̾ тобо́ю; |
18:4 | Пребы́сть тѝ гнѣ́въ. что́ бо; а҆́ще ты̀ ᲂу҆́мреши, не населе́нна ли бꙋ́детъ поднебе́снаѧ; и҆лѝ превратѧ́тсѧ го́ры и҆з̾ ѡ҆снова́нїй; |
18:5 См.: 🔗Иов. 21:17 | И҆ свѣ́тъ нечести́выхъ ᲂу҆га́снетъ, и҆ не произы́детъ и҆́хъ пла́мень: |
18:6 См.: 🔗Иов. 29:3 🔗Прит. 13:9 | свѣ́тъ є҆гѡ̀ тьма̀ въ жили́щи, свѣти́льникъ же въ не́мъ ᲂу҆га́снетъ: |
18:7 См.: 🔗Есф. 7:9 | да ᲂу҆ловѧ́тъ ме́ньшїи и҆мѣ̑нїѧ є҆гѡ̀, погрѣши́тъ же є҆гѡ̀ совѣ́тъ: |
18:8 | вве́ржена же бы́сть нога̀ є҆гѡ̀ въ прꙋ́гло, мре́жею да повїе́тсѧ: |
18:9 См.: 🔗Иов. 5:5 | да прїи́дꙋтъ же на́нь прꙋ̑гла, ᲂу҆крѣпи́тъ на́нь жа́ждꙋщихъ: |
18:10 | скры́сѧ въ землѝ ᲂу҆́же є҆гѡ̀, и҆ ꙗ҆́тїе є҆гѡ̀ на стезѝ. |
18:11 См.: 🔗Иов. 27:20 | Ѡ҆́крестъ да погꙋбѧ́тъ є҆го̀ болѣ̑зни: мно́зи же ѡ҆́крестъ но́гъ є҆гѡ̀ ѡ҆б̾и́дꙋтъ во гла́дѣ тѣ́снѣмъ: |
18:12 | паде́нїе же є҆мꙋ̀ ᲂу҆гото́вано вели́ко. |
18:13 | Поѧдє́ны же да бꙋ́дꙋтъ плєсны̀ но́гъ є҆гѡ̀, кра̑снаѧ же є҆гѡ̀ да поѧ́стъ сме́рть. |
18:14 См.: 🔗Иов. 11:20 | Ѿто́ржено же бꙋ́ди ѿ житїѧ̀ є҆гѡ̀ и҆сцѣле́нїе, да и҆́метъ же є҆го̀ бѣда̀ вино́ю ца́рскою. |
18:15 См.: 🔗Быт. 19:24 | Да всели́тсѧ въ хра́минѣ є҆гѡ̀ въ нощѝ є҆гѡ̀, посы̑пана да бꙋ́дꙋтъ лѣ́пѡтнаѧ є҆гѡ̀ жꙋ́пеломъ: |
18:16 См.: 🔗Ам. 2:9 | под̾ ни́мъ корє́нїѧ є҆гѡ̀ да и҆зсо́хнꙋтъ, свы́ше же нападе́тъ пожа́тїе є҆гѡ̀. |
18:17 См.: 🔗Прит. 2:22 | Па́мѧть є҆гѡ̀ да поги́бнетъ ѿ землѝ, и҆ (не) бꙋ́детъ и҆́мѧ є҆гѡ̀ на лицы̀ внѣ́шнемъ: |
18:18 | да ѿри́нетъ є҆го̀ ѿ свѣ́та во тьмꙋ̀: |
18:19 См.: 🔗Пс. 36:28 🔗Прем. 3:16 | не бꙋ́детъ зна́емь въ лю́дехъ є҆гѡ̀, нижѐ спасе́нъ въ поднебе́снѣй до́мъ є҆гѡ̀: |
18:20 См.: 🔗Пс. 36:13 | но въ свои́хъ є҆мꙋ̀ поживꙋ́тъ и҆ні́и, над̾ ни́мъ воздохнꙋ́ша послѣ́днїи, пе́рвыхъ же ѡ҆б̾ѧ̀ чꙋ́до. |
18:21 См.: 🔗Иов. 20:29 | Сі́и сꙋ́ть до́мове непра́ведныхъ, сїе́ же мѣ́сто невѣ́дꙋщихъ бг҃а. |