Кни́га Сїра́хъ, глава̀ к҃ неканонич.

	Язык: Церковнослав. (цс.) Церковнослав. (гражд.) Церковнослав. (дореф.) Рус. (Синодальный) English (NKJV) English (KJV) Srpski Елизаветинская Библия на церковно­славянском языке.
	Глава̀ к҃
20:1 См.: 🔗Пс. 140:5 🔗Прит. 25:12	Ко́ль добро̀ є҆́сть ѡ҆бличи́ти, не́жели ꙗ҆ри́тисѧ та́йнѡ: и҆ и҆сповѣ́даѧйсѧ ѿ ᲂу҆мале́нїѧ возбране́нъ бꙋ́детъ.
20:2	Ко́ль добро̀ ѡ҆бличе́нномꙋ ꙗ҆ви́ти покаѧ́нїе:
20:3	се́й бо во́льнагѡ и҆збѣжи́тъ грѣха̀.
20:4 См.: 🔗Сир. 30:21	Жела́нїе ско́пчо растли́тъ ли дѣви́цꙋ; та́кожде творѧ́й нꙋ́ждею сꙋды̀.
20:5	Є҆́сть молча́й ѡ҆брѣта́ѧйсѧ премꙋ́дръ, и҆ є҆́сть ненави́димь ѿ мно́гїѧ бесѣ́ды.
20:6	Є҆́сть молча́й, не и҆́мать бо ѿвѣ́та: и҆ є҆́сть молча́й вѣ́дый вре́мѧ.
20:7 См.: 🔗Еккл. 3:7 🔗Прит. 25:11	Человѣ́къ премꙋ́дръ ᲂу҆молчи́тъ до вре́мене: проде́рзый же и҆ безꙋ́мный превосхо́дитъ вре́мѧ.
20:8 См.: 🔗Прит. 10:19 🔗Прит. 17:28	Оу҆множа́ѧй словеса̀ ме́рзокъ бꙋ́детъ, и҆ восхища́ѧй вла́сть возненави́дѣнъ бꙋ́детъ.
20:9 См.: 🔗Прит. 10:2	Є҆́сть благопоспѣ́шство во ѕлы́хъ мꙋ́жеви, и҆ є҆́сть и҆з̾ѡбрѣ́тенїе на ᲂу҆мале́нїе.
20:10	Є҆́сть даѧ́нїе, є҆́же тѝ не бꙋ́детъ на по́льзꙋ, и҆ є҆́сть даѧ́нїе, є҆гѡ́же ѿда́нїе сꙋгꙋ́бо.
20:11 См.: 🔗Прит. 16:18 🔗1Пет. 5:5	Є҆́сть ᲂу҆мале́нїе сла́вы ра́ди, и҆ є҆́сть, и҆́же ѿ смире́нїѧ вознесѐ главꙋ̀.
20:12	Є҆́сть кꙋпꙋ́ѧй мнѡ́гаѧ ма́лымъ и҆ возвраща́ѧй ѧ҆̀ седмери́цею.
20:13 См.: 🔗Сир. 18:17	Премꙋ́дрый во словесѝ любе́зна сотвори́тъ себѐ: благѡда́ти же безꙋ́мныхъ и҆злїю́тсѧ.
20:14	Даѧ́нїе безꙋ́мнагѡ не ᲂу҆по́льзꙋетъ тѝ, ѻ҆́чи бо є҆гѡ̀ вмѣ́стѡ є҆ди́нагѡ мно́зи ко воспрїѧ́тїю:
20:15 См.: 🔗Сир. 18:15	ма́лѡ да́стъ, а҆ мно́гѡ поноси́ти бꙋ́детъ и҆ ѿве́рзетъ ᲂу҆ста̀ своѧ̑ ꙗ҆́кѡ проповѣ́дникъ: дне́сь взаи́мъ да́стъ, а҆ ᲂу҆́трѡ и҆стѧ́жетъ: ненави́димь человѣ́къ таковы́й гдⷭ҇ꙋ и҆ человѣ́кѡмъ.
20:16 См.: 🔗Пс. 40:10	Бꙋ́й рече́тъ: нѣ́сть мѝ дрꙋ́га и҆ нѣ́сть хвалы̀ благи̑мъ мои̑мъ: ꙗ҆дꙋ́щїи хлѣ́бъ мо́й льсти́ви ѧ҆зы́комъ.
20:17	Коли́кощи и҆ коли́цы посмѣю́тсѧ є҆мꙋ̀;
20:18	Поползнове́нїе на землѝ лꙋ́чше не́же ѿ ѧ҆зы́ка: та́кѡ паде́нїе ѕлы́хъ со тща́нїемъ прїи́детъ.
20:19	Человѣ́къ безблагода́тенъ ба́снь безвре́менна: во ᲂу҆стѣ́хъ ненака́занныхъ прⷭ҇нѡ бꙋ́детъ.
20:20 См.: 🔗Прит. 25:11	Ѿ ᲂу҆́стъ бꙋ́ѧгѡ ѿве́ржена бꙋ́детъ при́тча: не и҆́мать бо є҆ѧ̀ рещѝ во вре́мѧ своѐ.
20:21	Є҆́сть возбранѧ́емый согрѣша́ти ѿ скꙋ́дости, и҆ въ поко́и свое́мъ не ᲂу҆мили́тсѧ.
20:22	Є҆́сть погꙋблѧ́ѧй дꙋ́шꙋ свою̀ за сты́дъ, и҆ ѿ лица̀ безꙋ́мна погꙋби́тъ ю҆̀.
20:23	Є҆́сть ра́ди стыда̀ ѡ҆бѣща́ѧйсѧ дрꙋ́гови, и҆ приѡбрѣ́те є҆го̀ врага̀ тꙋ́не.
20:24	Поро́къ ѕо́лъ человѣ́кꙋ лжа̀, и҆ во ᲂу҆стѣ́хъ ненака́занныхъ прⷭ҇нѡ бꙋ́детъ.
20:25	Оу҆́не є҆́сть та́ть, не́жели прⷭ҇нѡ лжа́й: ѻ҆́ба же па́гꙋбꙋ наслѣ́дѧтъ.
20:26	Ѡ҆бы́чай человѣ́ка лжи́ва безче́стїе, и҆ стꙋ́дъ є҆гѡ̀ прⷭ҇нѡ съ ни́мъ.
20:27 См.: 🔗Быт. 41:38 🔗Дан. 2:46	Премꙋ́дрый словесы̀ произведе́тъ себѐ, и҆ человѣ́къ мꙋ́дрый ᲂу҆го́денъ бꙋ́детъ вельмо́жамъ.
20:28 См.: 🔗Прит. 12:11	Дѣ́лаѧй зе́млю вознесе́тъ сто́гъ сво́й, и҆ ᲂу҆гожда́ѧй вельмо́жамъ ᲂу҆ми́лостивитъ ѡ҆ непра́вдѣ (свое́й).
20:29 См.: 🔗Исх. 23:8 🔗Втор. 16:19	Мзда̀ и҆ да́рове ѡ҆слѣплѧ́ютъ ѻ҆́чи премꙋ́дрыхъ, и҆ ꙗ҆́коже бразды̑ на ᲂу҆стѣ́хъ ѿвраща́ютъ ѡ҆бличє́нїѧ.
20:30 См.: 🔗Сир. 41:17	Премꙋ́дрость сокровє́на и҆ сокро́вище не ꙗ҆вле́но, ка́ѧ по́льза є҆́сть во ѻ҆бои́хъ;
20:31	Лꙋ́чше человѣ́къ скрыва́ѧй бꙋ́йство своѐ, не́жели человѣ́къ скрыва́ѧй премꙋ́дрость свою̀.