Святое Дабравесце паводле Лукi, глава 1

	Язык: Беларускi Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Українська English (NKJV) English (KJV) Srpski Біблія (Евангелле і Апостал) на беларускай мове. Пераклад Біблейскай камісіі Беларускай Праваслаўнай Царквы.
	Раздзел 1
1:1	Паколькі ўжо многія ўзяліся складаць аповесць пра падзеі, якія сярод нас адбыліся,
1:2 См.: 🔗1Iн. 1:1 🔗Яўр. 2:3	як перадалі нам тыя, што ад пачатку былі відавочцамі і служыцелямі Слова,
1:3	прыйшло на думку і мне, дакладна даследаваўшы ўсё ад пачатку, паслядоўна апісаць табе, высокашаноўны Феофіле,
1:4	каб ты спазнаў цвёрдую аснову таго вучэння, у якім быў настаўлены.
1:5 См.: 🔗1Пар. 24:10 🔗Неем. 12:17	Быў у дні Ірада, цара Іудзейскага, адзін святар імем Захарыя, з Авіевай чаргі; і жонка яго з роду Ааронавага, імя ёй Елісавета.
1:6	Былі яны абое праведныя перад Богам, жывучы паводле ўсіх запаведзяў і ўстанаўленняў Гасподніх беззаганна.
1:7	І не мелі яны дзіцяці, бо Елісавета была няплодная, і абое былі ўжо на схіле гадоў сваіх.
1:8	І сталася: калі ў парадку сваёй чаргі ён служыў перад Богам,
1:9 См.: 🔗Исх. 30:7 🔗Лев. 16:17 🔗Яўр. 9:6	выпала яму, паводле звычаю святарскага, кадзіць, увайшоўшы ў храм Гасподні,
1:10	а ўсё мноства людзей малілася звонку ў час каджэння;
1:11	і явіўся яму Ангел Гасподні, стоячы справа ад кадзільнага ахвярніка.
1:12	І сумеўся Захарыя, убачыўшы, і страх напаў на яго.
1:13	Але Ангел сказаў яму: не бойся, Захарыя, бо пачута малітва твая, і жонка твая Елісавета народзіць табе сына, і назавеш яго імем Іаан,
1:14 См.: 🔗Лк. 1:58 🔗Iн. 5:35	і будзе табе радасць і весялосць, і многія нараджэнню яго ўзрадуюцца;
1:15	бо ён будзе вялікі перад Госпадам; і не будзе піць віна і сікеру; і Духам Святым напоўніцца яшчэ ва ўлонні маці сваёй;
1:16	і многіх з сыноў Ізраілевых зверне да Госпада Бога іх;
1:17 См.: 🔗Ис. 40:3 🔗Мал. 4:6 🔗Мк. 1:3 🔗Мк. 9:12 🔗Iн. 1:23	і будзе ісці перад Ім у духу і сіле Іліі, каб вярнуць сэрцы бацькоў да дзяцей, і непакорлівых да мудрасці праведных, каб падрыхтаваць Госпаду народ гатовы.
1:18	І сказаў Захарыя Ангелу: па чым я пазнаю гэта? бо я стары, і жонка мая на схіле гадоў сваіх.
1:19	І сказаў яму Ангел у адказ: я Гаўрыіл, што стаю перад Богам і пасланы гаварыць з табой і дабравесціць табе гэта;
1:20	і вось, будзеш маўчаць і не зможаш гаварыць да таго дня, калі збудзецца гэта, за тое, што ты не паверыў словам маім, якія здзейсняцца ў свой час.
1:21	І чакаў народ Захарыю і здзіўляўся, што ён марудзіць у храме.
1:22	Ён жа, выйшаўшы, не мог гаварыць да іх; і яны зразумелі, што ён бачыў відзенне ў храме; а ён рабіў ім знакі, і заставаўся нямым.
1:23	І сталася: калі скончыліся дні служэння яго, пайшоў ён у дом свой.
1:24	Пасля гэтых дзён зачала Елісавета, жонка яго , і таілася пяць месяцаў, і гаварыла:
1:25	так зрабіў мне Гасподзь у дні, калі спаглянуў, каб зняць з мяне ганьбу сярод людзей.
1:26	А ў шосты месяц пасланы быў Ангел Гаўрыіл ад Бога ў горад Галілейскі пад назвай Назарэт
1:27 См.: 🔗Мф. 1:18	да Дзевы, заручанай з мужам, імя якому Іосіф, з дому Давідавага; а імя Дзевы — Марыя.
1:28	І ўвайшоўшы да Яе, Ангел сказаў: радуйся, Благадатная! Гасподзь з Табою; благаславёная Ты сярод жанчын.
1:29	Яна ж, убачыўшы яго, збянтэжылася ад слова яго і разважала, што ж гэта за вітанне.
1:30	І сказаў Ёй Ангел: не бойся, Марыя, бо Ты знайшла благадаць у Бога.
1:31 См.: 🔗Ис. 7:14 🔗Мф. 1:21	І вось, зачнеш ва ўлонні, і народзіш Сына, і назавеш Яго імем Іісус.
1:32 См.: 🔗2Цар. 7:12 🔗Пс. 131:11 🔗Ис. 9:7	Ён будзе вялікі, і Сынам Усявышняга будзе названы, і дасць Яму Гасподзь Бог прастол Давіда, бацькі Яго;
1:33 См.: 🔗1Пар. 22:10 🔗Пс. 44:7 🔗Пс. 88:37 🔗Ис. 9:7 🔗Иер. 23:5 🔗Дан. 2:44 🔗Дан. 7:14 🔗Мих. 4:7	і будзе царстваваць над домам Іакава давеку, і Царству Яго не будзе канца.
1:34	І сказала Марыя Ангелу: як будзе гэта, калі Я мужа не знаю?
1:35 См.: 🔗Дан. 9:24	Сказаў Ёй Ангел у адказ: Дух Святы найдзе на Цябе і сіла Ўсявышняга ахіне Цябе; таму і Святое, што народзіцца, Сынам Божым будзе названа;
1:36	і вось, Елісавета, сваячка Твая, і яна зачала сына ў старасці сваёй, і гэта ўжо шосты месяц у яе, якую называюць няплоднай;
1:37	бо не застанецца бяссільным у Бога ніводнае слова.
1:38	Тады сказала Марыя: вось, Я — раба Гасподня; няхай будзе Мне па слову твайму. І адышоў ад Яе Ангел.
1:39	І ўстаўшы, Марыя ў тыя дні пайшла з паспешнасцю ў горны край, у горад Іудаў;
1:40	і ўвайшла ў дом Захарыі, і павітала Елісавету.
1:41	І сталася: калі пачула Елісавета вітанне Марыіна, устрапянулася дзіцятка ва ўлонні яе; і напоўнілася Елісавета Духам Святым,
1:42	і ўсклікнула моцным голасам і сказала: благаславёная Ты сярод жанчын і благаславёны плод улоння Твайго!
1:43	І адкуль гэта мне, што прыйшла Маці Госпада майго да мяне?
1:44	Бо, калі голас вітання Твайго дайшоў да вушэй маіх, устрапянулася дзіцятка радасна ва ўлонні маім.
1:45	І блажэнная Тая, што паверыла, бо збудзецца сказанае Ёй ад Госпада.
1:46 См.: 🔗Ис. 61:10 🔗Авв. 3:18	І сказала Марыя: велічае душа Мая Госпада,
1:47	і ўзрадаваўся дух Мой у Богу, Збавіцелі Маім,
1:48	што спаглянуў Ён на пакору Рабы Сваёй; бо вось ад гэтага часу будуць зваць Мяне блажэннай усе роды;
1:49	бо ўчыніў Мне вялікае Моцны, і святое імя Яго;
1:50 См.: 🔗Пс. 102:17	і міласэрнасць Яго ў роды родаў да тых, што баяцца Яго;
1:51 См.: 🔗Пс. 32:10 🔗Пс. 76:15 🔗Ис. 52:10	Ён праявіў сілу рукою Сваёю; рассеяў ганарлівых думкамі сэрца іх;
1:52 См.: 🔗Иов. 5:11 🔗Ис. 66:2	скінуў моцных з прастолаў і ўзнёс пакорлівых;
1:53 См.: 🔗1Цар. 2:5 🔗Пс. 33:11 🔗Мф. 5:6	галодных здаволіў дабром, а багатых адпусціў ні з чым;
1:54 См.: 🔗Пс. 97:3 🔗Ис. 41:8	прыхінуў Ізраіля, слугу Свайго, памятаючы пра міласць, —
1:55 См.: 🔗Быт. 17:19 🔗Быт. 22:18 🔗Пс. 131:11	як гаварыў бацькам нашым, — да Аўраама і семені яго давеку.
1:56	Прабыла ж Марыя з ёю каля трох месяцаў і вярнулася ў дом Свой.
1:57	А Елісавеце настаў час радзіць, і яна нарадзіла сына.
1:58	І пачулі суседзі і сваякі яе, што прымножыў Гасподзь міласць Сваю да яе і радаваліся з ёю.
1:59	І сталася: у восьмы дзень прыйшлі абрэзаць дзіця, і хацелі назваць яго імем бацькі яго, Захарыем.
1:60	І, адказваючы, маці яго сказала: не, а названы будзе Іаанам.
1:61	І сказалі ёй: няма нікога ў радні тваёй, хто б зваўся гэтым імем.
1:62	І знакамі пыталіся ў бацькі яго, як бы ён хацеў, каб назвалі яго.
1:63	І, папрасіўшы дошчачку, ён напісаў: Іаан будзе імя яму. І здзівіліся ўсе.
1:64	І адразу адкрыліся вусны яго і язык яго, і ён стаў гаварыць, благаслаўляючы Бога.
1:65	І быў страх ва ўсіх, хто жыў вакол іх; і па ўсім горным краі Іудзейскім расказвалі пра ўсё гэта.
1:66	І ўсе, хто чуў, паклалі гэта ў сэрцы сваім, кажучы: што будзе з дзіцяці гэтага? І рука Гасподня была з ім.
1:67	І Захарыя, бацька яго, напоўніўся Духам Святым і прарочыў, кажучы:
1:68 См.: 🔗Мф. 1:21	благаславёны Гасподзь Бог Ізраілеў, што наведаў народ Свой і выкупіў яго;
1:69 См.: 🔗Пс. 131:17 🔗Иез. 29:21	і ўзняў нам рог збаўлення ў доме Давіда, слугі Свайго,
1:70 См.: 🔗Пс. 71:4 🔗Иер. 23:6 🔗Иер. 30:8	як сказаў вуснамі святых Сваіх прарокаў адвеку,
1:71	што збавіць нас ад ворагаў нашых і ад рукі ўсіх, хто ненавідзіць нас;
1:72 См.: 🔗Быт. 22:16 🔗Быт. 26:3 🔗Лев. 26:42 🔗Иер. 31:33	каб зрабіць міласць бацькам нашым і ўспомніць запавет Свой святы,
1:73 См.: 🔗Яўр. 6:13	клятву, якой кляўся Ён Аўрааму, бацьку нашаму, каб даць нам,
1:74 См.: 🔗Рым. 8:15 🔗Яўр. 2:15	вызваленым ад рукі ворагаў нашых, без боязі
1:75 См.: 🔗1Пят. 1:15 🔗Эф. 4:24	служыць Яму ў святасці і праведнасці перад Ім ва ўсе дні жыцця нашага.
1:76 См.: 🔗Лк. 1:17	І ты, дзіця, прарокам Усявышняга будзеш названа, бо ты будзеш ісці перад абліччам Госпада, каб падрыхтаваць шляхі Яму,
1:77	даць народу Яго спазнаць збаўленне ў адпушчэнні грахоў,
1:78 См.: 🔗Иер. 23:5 🔗Зах. 3:8	па сардэчнай міласці Бога нашага, якою наведаў нас Усход з вышыні,
1:79	каб асвятліць тых, што сядзяць у цемры і цені смерці, скіраваць ногі нашы на шлях міру.
1:80	Дзіця ж расло і ўмацоўвалася духам; і было ў пустынях да дня з‘яўлення свайго Ізраілю.