Язык:
Беларускi
Біблія (Евангелле і Апостал) на беларускай мове. Пераклад Біблейскай камісіі Беларускай Праваслаўнай Царквы.
| |
Раздзел 7 | |
7:1 См.: 🔗Мф. 8:5 | Калі ж Ён скончыў усе словы Свае да народа, які слухаў, то ўвайшоў у Капернаум. |
7:2 | У аднаго сотніка раб, якім ён даражыў, быў хворы пры смерці. |
7:3 | Пачуўшы ж пра Іісуса, ён паслаў да Яго старэйшын Іудзейскіх, просячы Яго, каб прыйшоў ацаліць раба яго. |
7:4 | І яны, прыйшоўшы да Іісуса, настойліва прасілі Яго, гаворачы: ён варты, каб Ты зрабіў для яго гэта, |
7:5 | бо ён любіць народ наш і сінагогу збудаваў для нас. |
7:6 | Іісус пайшоў з імі. І калі ўжо Ён быў недалёка ад дома, паслаў да Яго сотнік сяброў сказаць Яму: Госпадзі! не турбуйся, бо я не варты, каб Ты ўвайшоў пад мой дах; |
7:7 | таму і сябе самога я не палічыў годным, каб прыйсці да Цябе; але скажы слова, і выздаравее слуга мой. |
7:8 | Бо і я, чалавек, падпарадкаваны ўладзе, але, маючы пад сабою воінаў, кажу аднаму: «ідзі», і ідзе; і другому: «прыйдзі», і прыходзіць; і рабу майму: «зрабі гэта», і робіць. |
7:9 | Пачуўшы гэта, Іісус здзівіўся яму і, павярнуўшыся, сказаў народу, які ішоў за Ім: кажу вам, што і ў Ізраілі не знайшоў Я такой веры. |
7:10 | І, вярнуўшыся ў дом, пасланыя знайшлі хворага раба здаровым. |
7:11 | І сталася пасля гэтага: пайшоў Іісус у горад, які называўся Наін; і з Ім ішлі многія вучні Яго і мноства народу. |
7:12 | Калі ж Ён наблізіўся да гарадской брамы, якраз, выносілі памерлага, адзінага сына ў маці сваёй, а яна была ўдава; і шмат людзей з горада было з ёю. |
7:13 | Убачыўшы яе, Гасподзь злітаваўся над ёю і сказаў ёй: не плач. |
7:14 | І, падышоўшы, дакрануўся да насілак; тыя, што неслі, спыніліся; і сказаў: юнак! табе кажу, устань. |
7:15 | І сеў мёртвы, і пачаў гаварыць; і аддаў яго Іісус маці яго. |
7:16 | І ахапіў усіх страх, і славілі Бога, кажучы: вялікі прарок паўстаў сярод нас, і наведаў Бог народ Свой. |
7:17 | І гэтае слова пра Яго разышлося па ўсёй Іудзеі і па ўсім наваколлі. |
7:18 См.: 🔗Мф. 11:2 | І паведамілі Іаану вучні яго пра ўсё гэта. |
7:19 | І, паклікаўшы дваіх з вучняў сваіх, Іаан паслаў іх да Іісуса спытаць: ці Той Ты, Які мае прыйсці, ці чакаць нам другога? |
7:20 | Прыйшоўшы да Яго, гэтыя мужы сказалі: Іаан Хрысціцель паслаў нас да Цябе спытаць: ці Той Ты, Які мае прыйсці, ці чакаць нам другога? |
7:21 | А ў гэты час Ён многіх ацаліў ад хвароб і немачаў і злых духаў і многім сляпым падараваў зрок. |
7:22 | І сказаў ім Іісус у адказ: пайдзіце, паведаміце Іаану, што вы бачылі і чулі: як сляпыя робяцца відушчымі, кульгавыя ходзяць, пракажоныя ачышчаюцца, глухія чуюць, мёртвыя ўваскрасаюць, убогія дабравесцяць; |
7:23 | і блажэнны, хто не спакусіцца аба Мне. |
7:24 | А калі адышлі пасланцы Іаанавы, пачаў Ён гаварыць народу пра Іаана: што глядзець хадзілі вы ў пустыню? трысціну, ветрам калыханую? |
7:25 | Што ж глядзець хадзілі вы? чалавека, убранага ў мяккае адзенне? Але хто ў пышных уборах і ў раскошы жыве, тыя ў царскіх палацах. |
7:26 | Што ж глядзець хадзілі вы? прарока? Так, кажу вам, і больш, чым прарока. |
7:27 | Гэта той, пра каго напісана: «вось, Я пасылаю Ангела Майго перад абліччам Тваім, які падрыхтуе шлях Твой перад Табою». |
7:28 См.: 🔗Мф. 11:11 | Бо кажу вам: з народжаных жанчынамі няма ніводнага прарока, большага за Іаана Хрысціцеля; але меншы ў Царстве Божым большы за яго. |
7:29 См.: 🔗Мф. 21:31 | І ўвесь народ, што слухаў, і мытнікі прызналі правату Бога, хрысціўшыся хрышчэннем Іаанавым; |
7:30 См.: 🔗Дзеян. 20:27 | а фарысеі і законнікі адкінулі волю Божую наконт сябе, не хрысціўшыся ад яго. |
7:31 См.: 🔗Мф. 11:16 | І сказаў Гасподзь: з кім жа параўнаю людзей роду гэтага? і да каго яны падобныя? |
7:32 | Яны падобныя да дзяцей, якія сядзяць на рынку і аклікаюць адны другіх і гавораць: мы ігралі вам на дудцы, а вы не танцавалі, мы спявалі вам жалобнае, а вы не плакалі. |
7:33 | Бо прыйшоў Іаан Хрысціцель: ні хлеба не есць, ні віна не п’е; і вы кажаце: у ім дэман. |
7:34 | Прыйшоў Сын Чалавечы: есць і п’е; і вы кажаце: вось чалавек, які любіць есці і віно піць, сябра мытнікам і грэшнікам. |
7:35 | І апраўдана мудрасць усімі дзецьмі яе. |
7:36 | Нехта з фарысеяў прасіў Яго паесці разам з ім, і Ён, увайшоўшы ў дом фарысея, узлёг. |
7:37 | І вось, жанчына з таго горада, якая была грэшніцай, даведаўшыся, што Ён узляжыць у доме фарысея, прынесла алебастравую пасудзіну міра |
7:38 | і, стаўшы ззаду каля ног Яго, плачучы, пачала абліваць слязьмі ногі Яго і валасамі галавы сваёй выцірала, і цалавала ногі Яго, і мазала мірам. |
7:39 См.: 🔗Лк. 15:2 | Убачыўшы гэта, фарысей, які запрасіў Яго, сказаў сам сабе: калі б Ён быў прарокам, то ведаў бы, хто і якая гэта жанчына дакранаецца да Яго, бо яна грэшніца. |
7:40 | І, адказваючы, Іісус сказаў яму: Сімане! Я маю нешта сказаць табе. Той прамовіў: скажы, Настаўнік. |
7:41 | Іісус сказаў: у аднаго пазыкадаўцы было два даўжнікі: адзін быў павінен пяцьсот дынарыяў, а другі — пяцьдзесят; |
7:42 | але, паколькі яны не мелі чым заплаціць, ён дараваў абодвум. Каторы з іх, скажы, больш узлюбіць яго? |
7:43 | І сказаў Сіман у адказ: думаю, той, якому больш дараваў. Ён жа сказаў яму: правільна ты рассудзіў. |
7:44 | І, павярнуўшыся да жанчыны, сказаў Сіману: бачыш гэтую жанчыну? Я ўвайшоў у дом твой, і ты вады Мне на ногі не даў; а яна слязамі абліла Мне ногі і валасамі галавы сваёй выцерла. |
7:45 | Ты цалавання Мне не даў; а яна з таго часу, як Я ўвайшоў, не пераставала цалаваць Мне ногі. |
7:46 | Ты галавы Маёй алеем не памазаў, яна ж мірам памазала Мне ногі. |
7:47 | А таму кажу табе: адпускаюцца грахі яе многія, бо яна ўзлюбіла многа; а каму мала адпускаецца, той мала любіць. |
7:48 | І ёй сказаў: адпускаюцца табе грахі. |
7:49 | І пачалі тыя, што ўзляжалі з Ім, гаварыць самі сабе: хто Ён, што і грахі адпускае? |
7:50 | Ён жа сказаў жанчыне: вера твая ўратавала цябе; ідзі з мірам. |