Да Карынфян 2-е Пасланне святога Апостала Паўла, глава 2

	Язык: Беларускi Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Українська English (NKJV) English (KJV) Srpski Біблія (Евангелле і Апостал) на беларускай мове. Пераклад Біблейскай камісіі Беларускай Праваслаўнай Царквы.
	Раздзел 2
2:1	Дык вось, я разва́жыў сам у сабе не прыходзіць зноў да вас у смутку.
2:2	Бо калі я засмуча́ю вас, то хто пара́дуе мяне, як не той, хто засму́чаны мною́
2:3 См.: 🔗2Кар. 1:14	Гэта самае я і пісаў вам, каб, прыйшоўшы, не мець мне засмучэння ад тых, за каго належала мне радавацца, бо я ўпэўнены ва ўсіх вас, што мая радасць — гэта радасць для ўсіх вас.
2:4 См.: 🔗1Кар. 5:1	З вялікага гора і тугі сэрца я пісаў вам, абліваючыся слязьмі, не дзеля таго, каб засмуцíць вас, а каб вы адчулі тую бязмерную любоў, якую я ма́ю да вас.
2:5	Калі ж хто засмуцíў, то не мяне засмуцíў, а часткова — каб не перабольшыць — усіх вас.
2:6 См.: 🔗1Кар. 5:5	Такому дастаткова гэтага пакарання ад большасці,
2:7	так што вам лепш, наадварот, прабачыць і суце́шыць яго, каб не быў ён апанава́ны празмерным смуткам;
2:8	і таму прашу вас вы́казаць да яго любоў.
2:9	Бо я дзеля таго і пісаў, каб вы́прабаваць вас, ці ва ўсім вы паслухмяныя.
2:10	А каму вы нешта прабача́еце, таму і я прабача́ю; бо і я, калі нешта прабачыў каму, то прабачыў для вас перад абліччам Хрыста,
2:11 См.: 🔗Лк. 22:31 🔗1Пят. 5:8	каб не ашукаў нас сатана, бо нам добра вядомы яго заду́мы.
2:12	Прыйшоўшы ж у Трааду дабраве́сціць Хрыста, хоць мне і адчынены былі дзверы Госпадам,
2:13	я не меў спакою духу майму, бо не знайшоў там брата майго Ціта, так што, развітаўшыся з імі, я пайшоў у Македонію.
2:14	Але падзяку ўзносім Богу, Які заўжды пераможна вядзе нас у Хрысце і пах ведаў пра Сябе пашырае праз нас у кожным месцы.
2:15 См.: 🔗1Кар. 1:18 🔗2Кар. 4:3	Бо мы — Хрыстова духмянасць Богу ў тых, хто спасаецца, і ў тых, хто гіне:
2:16 См.: 🔗Лк. 2:34 🔗2Кар. 3:5	для адных — пах смерці на смерць, а для другіх — пах жыцця на жыццё. І хто здольны да гэтага́
2:17 См.: 🔗2Кар. 1:12 🔗2Кар. 4:2 🔗2Кар. 11:15 🔗1Цім. 6:5 🔗Ціт. 1:11	Бо мы не падрабляем, як многія, слова Божага, а прапаведуем шчыра, як ад Бога, перад Богам, у Хрысце.