Язык:
Беларускi
Біблія (Евангелле і Апостал) на беларускай мове. Пераклад Біблейскай камісіі Беларускай Праваслаўнай Царквы.
| |
Раздзел 11 | |
11:1 | І сталася: калі Ён маліўся ў адным месцы, і як перастаў, нехта з вучняў Яго сказаў Яму: Госпадзі! навучы нас маліцца, як і Іаан навучыў вучняў сваіх. |
11:2 См.: 🔗Мф. 6:9 | Ён жа сказаў ім: калі моліцеся, гаварыце: Ойча наш, Які ў нябёсах! няхай свяціцца імя Тваё; няхай прыйдзе Царства Тваё; няхай будзе воля Твая як на небе, і на зямлі; |
11:3 См.: 🔗Прит. 30:8 | хлеб наш надзённы давай нам кожны дзень; |
11:4 | і даруй нам грахі нашы, бо і мы даруем кожнаму даўжніку нашаму; і не ўвядзі нас у спакусу, але збаў нас ад злога. |
11:5 | І сказаў ім: хтосьці з вас, маючы сябра, прыйдзе да яго апоўначы і скажа яму: дружа! пазыч мне тры хлябы, |
11:6 | бо сябар мой прыйшоў да мяне з дарогі, і не маю чаго даць яму; |
11:7 | а той знутры скажа ў адказ: не турбуй мяне, дзверы ўжо замкнёныя, і дзеці мае пры мне ў пасцелі; не магу я ўстаць і даць табе. |
11:8 | Кажу вам: калі ён не ўстане і не дасць дзеля таго, што ён сябар яго, то з – за неадступнасці яго ўстане і дасць яму, колькі трэба. |
11:9 | І Я вам кажу: прасіце, і дадзена будзе вам; шукайце, і знойдзеце; стукайцеся, і адчыняць вам; |
11:10 | бо кожны, хто просіць, атрымлівае, і хто шукае, знаходзіць, і, хто стукаецца, таму адчыняюць. |
11:11 См.: 🔗Мф. 7:9 | Хіба каторы бацька з вас, калі сын папросіць у яго хлеба, падасць яму камень? або папросіць рыбы, хіба замест рыбіны падасць яму змяю? |
11:12 | або, калі папросіць яйка, хіба падасць яму скарпіёна? |
11:13 См.: 🔗Яўр. 12:9 | Дык вось, калі вы, будучы ліхімі, умееце дары добрыя даваць дзецям вашым, тым болей Айцец Нябесны дасць Духа Святога тым, хто просіць у Яго. |
11:14 См.: 🔗Мф. 9:32 🔗Мф. 12:22 | І выганяў Ён дэмана, які быў нямы; і сталася: калі дэман выйшаў, нямы загаварыў, і здзівіліся людзі. |
11:15 | Некаторыя ж з іх казалі: сілаю вельзевула, князя дэманскага, Ён выганяе дэманаў. |
11:16 См.: 🔗1Кар. 1:22 | А іншыя, спакушаючы, патрабавалі ад Яго знамення з неба. |
11:17 См.: 🔗Мф. 12:25 🔗Мк. 3:24 | Ён жа, ведаючы думкі іх, сказаў ім: усякае царства, самое ў сабе раздзеленае, спусташаецца, і дом на дом падае; |
11:18 | калі ж і сатана сам у сабе раздзеліцца, то як устаіць царства яго? а вы кажаце, што Я сілаю вельзевула выганяю дэманаў; |
11:19 | і калі Я сілаю вельзевула выганяю дэманаў, то сыны вашы чыёю сілаю выганяюць? Таму яны вам будуць суддзямі. |
11:20 См.: 🔗Исх. 8:19 🔗Дан. 2:44 | Калі ж Я пярстом Божым выганяю дэманаў, значыць, прыйшло да вас Царства Божае. |
11:21 | Калі дужы, узброіўшыся, ахоўвае свой двор, то ў бяспецы маёмасць яго; |
11:22 | калі ж дужэйшы за яго, напаўшы, пераможа яго, то забярэ ўсю зброю яго, на якую той спадзяваўся, і здабытае ў яго раздасць. |
11:23 | Хто не са Мной, той супраць Мяне, і хто не збірае са Мною, той раскідае. |
11:24 См.: 🔗Мф. 12:43 | Калі нячысты дух выйдзе з чалавека, то блукае па бязводных мясцінах, шукаючы спакою, і, не знаходзячы, кажа: вярнуся ў дом мой, адкуль я выйшаў; |
11:25 | і, прыйшоўшы, застае яго падмеценым і прыбраным; |
11:26 | тады ідзе і бярэ сем іншых духаў, люцейшых за сябе, і, увайшоўшы, жывуць там; і бывае апошняе для чалавека таго горшым за першае. |
11:27 См.: 🔗Лк. 1:48 | І сталася: калі Ён гаварыў гэта, адна жанчына з натоўпу, узвысіўшы голас, сказала Яму: блажэннае ўлонне, якое насіла Цябе, і грудзі, якія Ты ссаў. |
11:28 | А Ён сказаў: тым больш блажэнныя тыя, што слухаюць слова Божае і выконваюць яго. |
11:29 См.: 🔗Ион. 2:1 🔗Мф. 12:39 | Калі ж стала збірацца ўсё больш народу, Ён пачаў гаварыць: род гэты ліхі, ён шукае знамення, ды знаменне не будзе дадзена яму, акрамя знамення Іоны прарока; |
11:30 | бо як Іона быў знаменнем для Ніневіцянаў, так будзе і Сын Чалавечы для роду гэтага. |
11:31 | Царыца Поўдня ўстане на судзе з мужамі роду гэтага і асудзіць іх, бо яна прыходзіла з краю зямлі паслухаць мудрасці Саламонавай, і вось, тут большае за Саламона. |
11:32 См.: 🔗Ион. 3:5 🔗Мф. 12:41 | Мужы Ніневійскія ўстануць на судзе з родам гэтым і асудзяць яго, бо яны пакаяліся ад пропаведзі Іонавай, і вось, тут большае за Іону. |
11:33 | Ніхто, запаліўшы свечку, не ставіць яе ў патаемным месцы, ні пад пасудзінай, а на падсвечніку, каб тыя, што ўваходзяць, бачылі святло. |
11:34 См.: 🔗Мф. 6:22 | Свяцільня целу ёсць вока; калі вока тваё чыстае, то і ўсё цела тваё светлае; калі ж ліхое, то і цела тваё цёмнае; |
11:35 | дык глядзі, каб святло, якое ў табе, не было цемрай. |
11:36 | Калі ж усё цела тваё светлае, і не мае ніводнай цёмнай часткі, то будзе яно светлае ўсё так, як бы свяцільнік ззяннем асвятляў цябе. |
11:37 | Калі Ён сказаў гэта, прасіў Яго адзін фарысей, каб Ён паабедаў у яго; і Ён, увайшоўшы, узлёг. |
11:38 См.: 🔗Мк. 7:3 | Фарысей жа, убачыўшы, здзівіўся, што Ён перш за ўсё не ўмыўся перад абедам. |
11:39 См.: 🔗Мф. 23:25 | А Гасподзь сказаў яму: цяпер вы, фарысеі, звонку чашу і блюда ачышчаеце, а нутро ваша поўнае драпежнасці і злобы. |
11:40 | Неразумныя! ці ж не Той, Хто стварыў вонкавае, стварыў і ўнутранае? |
11:41 См.: 🔗Ис. 58:7 🔗Дан. 4:24 | Аднак падавайце міласціну з таго, што ўнутры; тады ўсё для вас чыстае будзе. |
11:42 См.: 🔗Мф. 23:23 | Але гора вам, фарысеям, што даяце дзесяціну з мяты і руты, і ўсялякай агародніны, ды не дбаеце пра суд і любоў Божую; гэта трэба было рабіць, і таго не пакідаць. |
11:43 | Гора вам, фарысеям, што любіце наперадзе сядзець у сінагогах і каб віталі вас на плошчах. |
11:44 | Гора вам, кніжнікі і фарысеі, крывадушнікі, што вы — як магілы непрыкметныя, і людзі ходзяць зверху і не ведаюць. |
11:45 | У адказ нехта з законнікаў кажа Яму: Настаўнік! гаворачы гэта, Ты і нас зневажаеш. |
11:46 См.: 🔗Мф. 23:4 🔗Дзеян. 15:10 | А Ён сказаў: і вам, законнікам, гора, што абцяжарваеце людзей цяжарамі невыноснымі, а самі ніводным пальцам сваім не дакранаецеся да цяжараў тых. |
11:47 | Гора вам, што будуеце грабніцы прарокам, а бацькі вашы забілі іх; |
11:48 | значыць, вы сведчыце пра ўчынкі бацькоў вашых і згаджаецеся з імі: бо яны забілі іх, а вы будуеце ім грабніцы. |
11:49 | Таму і мудрасць Божая сказала: пашлю да іх прарокаў і Апосталаў, і некаторых з іх заб’юць, а некаторых будуць гнаць, |
11:50 | каб была спагнаная з роду гэтага кроў усіх прарокаў, пралітая ад стварэння свету, |
11:51 | ад крыві Авеля да крыві Захарыі, які загінуў паміж ахвярнікам і храмам. Так, кажу вам: яна будзе спагнаная з роду гэтага. |
11:52 См.: 🔗Мф. 23:13 | Гора вам, законнікам, што вы ўзялі ключ пазнання: самі не ўвайшлі, і тым, хто ўваходзіў, перашкодзілі. |
11:53 | Калі ж Ён гаварыў ім гэта, кніжнікі і фарысеі пачалі жорстка нападаць на Яго і дапытвацца ў Яго пра многае, |
11:54 | падсцерагаючы Яго і стараючыся падлавіць на нечым з вуснаў Яго, каб абвінаваціць Яго. |