Святое Дабравесце паводле Матфея, глава 9

	Язык: Беларускi Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Українська English (NKJV) English (KJV) Srpski Біблія (Евангелле і Апостал) на беларускай мове. Пераклад Біблейскай камісіі Беларускай Праваслаўнай Царквы.
	Раздзел 9
9:1 См.: 🔗Мк. 2:1	Ён, увайшоўшы ў лодку, пераплыў і прыйшоў у Свой горад.
9:2 См.: 🔗Мк. 2:3 🔗Лк. 5:18	І вось, прынеслі да Яго паралізаванага, пакладзенага на пасцелі. І ўбачыўшы веру іхнюю, Іісус сказаў паралізаванаму: мацуйся, сыне! даруюцца табе грахі твае.
9:3	І вось, некаторыя кніжнікі сказалі самі сабе: Ён блюзнерыць.
9:4	А Іісус, зразумеўшы помыслы іх, сказаў: навошта вы намышляеце ліхое ў сэрцах вашых?
9:5 См.: 🔗Мк. 2:9 🔗Лк. 5:23	бо што лягчэй – сказаць: «даруюцца табе грахі», альбо сказаць: «устань і хадзі»?
9:6	Але каб вы ведалі, што Сын Чалавечы мае ўладу на зямлі дараваць грахі, тады кажа паралізаванаму: устань, вазьмі пасцель тваю і ідзі ў дом твой.
9:7	І той устаў, узяў пасцель сваю, і пайшоў у дом свой.
9:8	А людзі, убачыўшы гэта, дзіву даліся і праславілі Бога, Які даў такую ўладу людзям.
9:9 См.: 🔗Мк. 2:14 🔗Лк. 5:27	Праходзячы адтуль, убачыў Іісус чалавека, што сядзеў на мытні, якога звалі Матфей, і кажа яму: ідзі за Мною. І ўстаў той і пайшоў услед за Ім.
9:10	І сталася, калі Іісус узляжаў у доме, вось, многія мытнікі і грэшнікі прыйшлі і ўзлеглі з Ім і вучнямі Ягонымі.
9:11	І ўбачыўшы гэта, фарысеі сказалі вучням Яго: навошта Настаўнік ваш есць і п'е з мытнікамі і грэшнікамі?
9:12	А Іісус, пачуўшы гэта, сказаў ім: не здаровыя маюць патрэбу ў лекары, а хворыя;
9:13 См.: 🔗Ос. 6:6 🔗Мф. 12:7 🔗Мк. 2:17 🔗Лк. 5:32	ідзіце, навучыцеся, што азначае: «міласці хачу, а не ахвяры»?, бо Я прыйшоў заклікаць не праведнікаў, а грэшнікаў да пакаяння.
9:14 См.: 🔗Мк. 2:18 🔗Лк. 5:33	Тады прыходзяць да Яго вучні Іаанавы і кажуць: чаму мы і фарысеі посцім многа, а Твае вучні не посцяць?
9:15	І сказаў ім Іісус: ці могуць засмучацца сыны харомаў вясельных, пакуль з імі жаніх? Але прыйдуць дні, калі адымецца ў іх жаніх, і тады будуць пасціць.
9:16 См.: 🔗Мк. 2:21 🔗Лк. 5:36	І ніхто не прыстаўляе латкі з нябеленага палатна да старон адзежыны; бо зноў прышытае аддзярэ ад старога, і дзірка будзе яшчэ горшая.
9:17	Не ўліваюць таксама віна і маладога ў мяхі старыя; а інакш дзяруцца мяхі, і віно выцякае, і мяхі прападаюць; а віно маладое ўліваюць у новыя мяхі, і зберагаецца тое і другое.
9:18 См.: 🔗Мк. 5:22 🔗Лк. 8:41	Калі Ён ім гэта казаў, вось, прыйшоў нейкі начальнік і, кланяючыся Яму, казаў: дачка мая зараз памерла; але прыйдзі, ускладзі на яе руку Тваю, і яна будзе жыць.
9:19	І ўстаўшы, Іісус пайшоў за ім, і вучні Яго.
9:20 См.: 🔗Мк. 5:25	І вось, жанчына, якая дванаццаць гадоў пакутавала ад крывацечы, падышоўшы ззаду, дакранулася да краю вопраткі Яго,
9:21	бо яна казала сама сабе: калі толькі дакрануся да вопраткі Яго, выздаравею.
9:22	А Іісус, абярнуўшыся і ўбачыўшы яе, сказаў: мацуйся, дачка! вера твая ўратавала цябе. І выздаравела жанчына з таго часу.
9:23	А як прыйшоў Іісус у начальнікаў дом і ўбачыў жалейнікаў і збянтэжаны люд,
9:24	сказаў ім: выйдзіце; бо не памерла дзяўчына, а спіць. І насміхаліся з Яго.
9:25	Калі ж людзі былі высланы, Ён, увайшоўшы, узяў яе за руку, і дзяўчына ўстала.
9:26	І разнеслася вестка пра гэта па ўсёй зямлі той.
9:27 См.: 🔗Мф. 20:30	І калі ішоў адтуль Іісус, ішлі за Ім двое сляпых і крычалі: памілуй нас, Іісусе, Сыне Давідаў!
9:28	І калі Ён прыйшоў у дом, прыступілі да Яго сляпыя. І кажа ім Іісус: ці верыце, што Я магу зрабіць гэта? Яны кажуць Яму: так Госпадзе!
9:29	Тады Ён крануўся вачэй іх і сказаў: па веры вашай хан будзе вам.
9:30	І адкрыліся вочы ў іх; і строга наказаў ім Іісус: глядзіце, каб ніхто не даведаўся.
9:31	А яны, выйшаўшы, расказалі пра Яго па ўсёй зямлі той.
9:32 См.: 🔗Лк. 11:14	Калі ж тыя выходзілі, вось, прывялі да Яго чалавека нямога, апанаванага дэманам.
9:33	І калі дэман быў выгнаны, нямы пачаў гаварыць. І люд, дзіву даючыся, казаў: ніколі не было такога явішча ў Ізраілі.
9:34 См.: 🔗Мф. 12:24 🔗Мк. 3:22 🔗Лк. 11:15	А фарысеі казалі: сілаю князя дэманскага выганяе Ён дэманаў.
9:35 См.: 🔗Мк. 6:6 🔗Лк. 13:22	І хадзіў Іісус па ўсіх гарадах і па селішчах, вучачы ў сінагогах іх, прапаведуючы Дабравесце Царства і ацаляючы ўсякую хваробу і ўсякую немач у людзях.
9:36 См.: 🔗Ис. 53:6 🔗Мк. 6:34	Бачачы людзей, Ён пашкадаваў іх, бо яны былі знясіленыя і пакінутыя, як авечкі без пастуха.
9:37 См.: 🔗Лк. 10:2 🔗Iн. 4:35	Тады кажа вучням Сваім: жніва многа, ды работнікаў мала;
9:38 См.: 🔗2Фес. 3:1	дык маліце Гаспадара жніва, каб паслаў работнікаў на жніво Сваё.