Язык:
Беларускi
Біблія (Евангелле і Апостал) на беларускай мове. Пераклад Біблейскай камісіі Беларускай Праваслаўнай Царквы.
| |
Раздзел 2 | |
2:1 См.: 🔗Лк. 2:6 | Калі ж Іісус нарадзіўся ў Віфлееме Іудзейскім у дні цара Ірада, вось, магі з усходу прыйшлі ў Іерусалім і кажуць: |
2:2 См.: 🔗Чис. 24:17 🔗Ис. 60:3 | дзе народжаны Цар Іудзейскі? бачылі бо мы зорку Яго на ўсходзе і прыйшлі пакланіцца Яму. |
2:3 | Пачуўшы гэта, цар Ірад занепакоіўся, і ўвесь Іерусалім з ім. |
2:4 | І, сабраўшы ўсіх першасвятароў і кніжнікаў народных, пытаўся ў іх: дзе мае нарадзіцца Хрыстос? |
2:5 | Яны ж сказалі яму: у Віфлееме Іудзейскім, так бо напісана праз прарока: |
2:6 | « І ты, Віфлееме, зямля Іудава, нічым не меншы сярод ваяводстваў Іудавых; бо з цябе выйдзе Правадыр, Які ўпасвіць народ мой Ізраіля». |
2:7 | Тады Ірад, употай паклікаўшы магаў, выведаў у іх час з'яўлення зоркі |
2:8 | і, паслаўшы іх у Віфлеем, сказаў: ідзіце, добра разведайце пра Дзіця і, як знойдзеце, накажыце мне, каб і я пайшоў пакланіцца Яму. |
2:9 | Яны, выслухаўшы цара, пайшлі. І вось, зорка, якую бачылі яны на ўсходзе, ішла перад імі, пакуль, прыйшоўшы, не стала ўгары над месцам, дзе было Дзіця. |
2:10 | Угледзеўшы зорку, яны ўзрадаваліся радасцю вельмі вялікай, |
2:11 См.: 🔗Ис. 60:6 | і, увайшоўшы ў дом, убачылі Дзіця з Марыяю, Маці Яго, і, упаўшы, пакланіліся Яму; і адкрыўшы скарбы свае, прынеслі Яму дары: золата, ладан і смірну. |
2:12 | І ў сне атрымаўшы наказ не вяртацца да Ірада, іншай дарогай адышлі ў краіну сваю. |
2:13 | Калі ж яны адышлі, — вось, Ангел Гасподні яўляецца ў сне Іосіфу і кажа: устань, вазьмі Дзіця і Маці Яго, і ўцякай у Егіпет, і будзь там, пакуль не скажу табе; бо Ірад хоча шукаць Дзіцятка, каб загубіць Яго. |
2:14 | Ён устаў, узяў Дзіця і Маці Яго, і адышоў у Егіпет, |
2:15 См.: 🔗Ос. 11:1 | і былі там да Ірадавай смерці, каб збылося сказанае Госпадам праз прарока, які кажа: «З Егіпта паклікаў Я Сына Майго». |
2:16 | Тады Ірад, убачыўшы, што магі ашукалі яго, разгневаўся надта і паслаў перабіць усіх дзетак у Віфлееме і ва ўсіх межах яго, ад двух гадоў і ніжэй, паводле часу, які выведаў у магаў. |
2:17 | Тады збылося сказанае праз прарока Іерамію, які кажа: |
2:18 См.: 🔗Иер. 31:15 | «Голас у Раме чуцен, плач, і галашэнне, і лямант вялікі; Рахіль плача па дзецях сваіх і не хоча суцешыцца; бо іх няма». |
2:19 | А як Ірад памёр, — вось, Ангел Гасподні ў сне яўляецца Іосіфу ў Егіпце |
2:20 | і кажа: устань, вазьмі Дзіця і Маці Яго і ідзі ў зямлю Ізраілеву; бо памерлі тыя, што шукалі душы Дзіцяці. |
2:21 | Ён устаў, узяў Дзіця і Маці Яго і прыйшоў у зямлю Ізраілеву. |
2:22 | Але пачуўшы, што Архелай царуе ў Іудзеі замест Ірада, бацькі свайго, пабаяўся туды ісці; і атрымаўшы ў сне наказ, адышоў у межы Галілейскія, |
2:23 См.: 🔗Суд. 13:5 🔗Ис. 11:1 | і, прыйшоўшы, пасяліўся ў горадзе, які называецца Назарэт, каб збылося сказанае праз прарокаў, што Ён Назарэем назавецца. |