Язык:
Церковнослав. (дореф.)
Библия на церковнослявянском языке в дореволюционной (дореформенной) орфографии.
| |
Глава 11 | |
11:1 | [Зач. 55.] И бысть внегда быти Ему на мѣстѣ нѣкоемъ молящуся, [и] яко преста, рече нѣкiй от ученикъ Его къ Нему: Господи, научи ны молитися, якоже и Иоаннъ научи ученики своя. |
11:2 См.: 🔗Мф. 6:9 | Рече же имъ: егда молитеся, глаголите: Отче нашъ, иже на небесѣхъ, да святится имя Твое: да прiидетъ Царствiе Твое: да будетъ воля Твоя, яко на небеси, и на земли: |
11:3 См.: 🔗Прит. 30:8 | хлѣбъ нашъ насущный подавай намъ на всякъ день: |
11:4 | и остави намъ грѣхи нашя, ибо и сами оставляемъ всякому должнику нашему: и не введи насъ во искушенiе, но избави насъ от лукаваго. |
11:5 | И рече къ нимъ: кто от васъ имать друга, и идетъ къ нему въ полунощи, и речетъ ему: друже, даждь ми взаимъ три хлѣбы: |
11:6 | понеже другъ прiиде съ пути ко мнѣ, и не имамъ чесо предложити ему. |
11:7 | И той извнутрь отвѣщавъ речетъ: не твори ми труды: уже двери затворены суть, и дѣти моя со мною на ложи суть: [и] не могу воставъ дати тебѣ. |
11:8 | Глаголю же вамъ: аще и не дастъ ему воставъ, зане другъ ему есть: но за безочьство его, воставъ дастъ ему, елика требуетъ. |
11:9 | [Зач. 56.] И Азъ вамъ глаголю: просите, и дастся вамъ: ищите, и обрящете: толцыте, и отверзется вамъ: |
11:10 | всякъ бо просяй прiемлетъ, и ищяй обрѣтаетъ, и толкущему отверзется. |
11:11 См.: 🔗Мф. 7:9 | Котораго же васъ отца воспроситъ сынъ хлѣба, еда камень подастъ ему? Или рыбы, еда въ рыбы мѣсто змiю подастъ ему? |
11:12 | Или аще попроситъ яица, еда подастъ ему скорпiю? |
11:13 См.: 🔗Евр. 12:9 | Аще убо вы зли суще, умѣете даянiя блага даяти чадомъ вашымъ, кольми паче Отецъ, иже съ небесе, дастъ Духа Святаго просящымъ у Него? |
11:14 См.: 🔗Мф. 9:32 🔗Мф. 12:22 | [Зач. 57.] И бѣ изгоня бѣса, и той бѣ нѣмъ: бысть же бѣсу изшедшу, проглагола нѣмый: и дивишася народи. |
11:15 | Нѣцыи же от нихъ рѣша: о веельзевулѣ князи бѣсовстѣмъ изгонитъ бѣсы. |
11:16 См.: 🔗1Кор. 1:22 | Друзіи же искушающе, знаменiя от Него искаху съ небесе. |
11:17 См.: 🔗Мф. 12:25 🔗Мк. 3:24 | Онъ же вѣдый помышленiя ихъ, рече имъ: всяко царство само въ себѣ раздѣляяся, запустѣетъ: и домъ на домъ, падаетъ. |
11:18 | Аще же и сатана самъ въ себѣ раздѣлися, како станетъ царство его, якоже глаголете, о веельзевулѣ изгонящя Мя бѣсы. |
11:19 | Аще же Азъ о веельзевулѣ изгоню бѣсы, сынове ваши о комъ изгонятъ? Сего ради тіи будутъ вамъ судiи. |
11:20 См.: 🔗Исх. 8:19 🔗Дан. 2:44 | Аще ли же о перстѣ Божiи изгоню бѣсы, убо постиже на васъ Царствiе Божiе. |
11:21 | Егда крѣпкiй вооружився хранитъ свой дворъ, во смиренiи {въ мирѣ} суть имѣнiя его: |
11:22 | егда же крѣплѣй его нашедъ побѣдитъ его, все оружiе его возметъ, на неже уповаше, и корысть его раздаетъ. |
11:23 | [Зач. 58.] Иже нѣсть со Мною, на Мя есть: и иже не собираетъ со Мною, расточаетъ. |
11:24 См.: 🔗Мф. 12:43 | Егда [же] нечистый духъ изыдетъ от человѣка, преходитъ сквозѣ безводная мѣста, ищя покоя: и не обрѣтая, глаголетъ: возвращуся въ домъ мой, отнюдуже изыдохъ. |
11:25 | И пришедъ обрящетъ и пометенъ и украшенъ: |
11:26 | тогда идетъ и пойметъ седмь другихъ духовъ горшихъ себе, и вшедше живутъ ту: и бываютъ послѣдняя человѣку тому горша первыхъ. |
11:27 См.: 🔗Лк. 1:48 | Бысть же егда глаголаше сiя, воздвигши нѣкая жена гласъ от народа, рече Ему: блажено чрево носившее Тя, и сосца, яже еси ссалъ. |
11:28 | Онъ же рече: тѣмже убо блажени слышащiи слово Божiе и хранящiи е. |
11:29 См.: 🔗Ион. 2:1 🔗Мф. 12:39 | [Зач. 59.] Народомъ же собирающымся начатъ глаголати: родъ сей лукавъ есть: знаменiя ищетъ, и знаменiе не дастся ему, токмо знаменiе Ионы пророка: |
11:30 | якоже бо бысть Иона знаменiе Ниневитомъ, тако будетъ и Сынъ Человѣческiй роду сему. |
11:31 | Царица южская востанетъ на судъ съ мужи рода сего, и осудитъ ихъ: яко прiиде от конецъ земли слышати премудрость Соломонову: и се множае Соломона здѣ. |
11:32 См.: 🔗Ион. 3:5 🔗Мф. 12:41 | Мужiе Ниневитстiи востанутъ на судъ съ родомъ симъ, и осудятъ и: яко покаяшася проповѣдiю Иониною: и се множае Ионы здѣ. |
11:33 | Никтоже [убо] свѣтилника вжегъ, въ скровѣ полагаетъ, ни подъ спудомъ, но на свѣщницѣ, да входящiи свѣтъ видятъ. |
11:34 См.: 🔗Мф. 6:22 | [Зач. 60.] Свѣтилникъ тѣлу есть око: егда убо око твое просто будетъ, все тѣло твое свѣтло будетъ: егда же лукаво будетъ, и тѣло твое темно: |
11:35 | блюди убо, еда свѣтъ, иже въ тебѣ, тма есть. |
11:36 | Аще бо тѣло твое все свѣтло, не имый нѣкiя части темны, будетъ свѣтло все, якоже егда свѣтилникъ блистанiемъ просвѣщаетъ тя. |
11:37 | Егда же глаголаше, моляше Его фарисей нѣкiй, да обѣдуетъ у него: вшедъ же возлеже. |
11:38 См.: 🔗Мк. 7:3 | Фарисей же видѣвъ дивися, яко не прежде крестися {не первѣе умыся} прежде обѣда. |
11:39 См.: 🔗Мф. 23:25 | Рече же Господь къ нему: нынѣ вы, фарисее, внѣшняя сткляницы и блюда очищаете, внутреннее же ваше полно грабленiя есть и лукавства. |
11:40 | Безумнiи, не Иже ли сотвори внѣшнее, и внутреннее сотворилъ есть? |
11:41 См.: 🔗Ис. 58:7 🔗Дан. 4:24 | Обаче от сущихъ дадите милостыню: и се вся чиста вамъ будутъ. |
11:42 См.: 🔗Мф. 23:23 | [Зач. 61.] Но горе вамъ фарисеомъ, яко одесятствуете от мятвы и пигана и всякаго зелiя, и мимоходите судъ и любовь Божiю: сiя подобаше сотворити, и онѣхъ не оставляти. |
11:43 | Горе вамъ фарисеомъ, яко любите предсѣданiя на сонмищехъ и цѣлованiя на торжищихъ. |
11:44 | Горе вамъ, книжницы и фарисее лицемѣри, яко есте яко гроби невѣдоми, и человѣцы ходящiи верху не вѣдятъ. |
11:45 | Отвѣщавъ же нѣкiй от законникъ рече Ему: Учителю, сiя глаголя, и намъ досаждаеши. |
11:46 См.: 🔗Мф. 23:4 🔗Деян. 15:10 | Онъ же рече: и вамъ законникомъ горе, яко накладаете на человѣки бремена не удобь носима, и сами единѣмъ перстомъ вашимъ не прикасаетеся бременемъ. |
11:47 | [Зач. 62.] Горе вамъ, яко зиждете гробы пророкъ, отцы же ваши избиша ихъ. |
11:48 | Убо свидѣтелствуете и соблаговолите дѣломъ отецъ вашихъ: яко тіи убо избиша ихъ, вы же зиждете ихъ гробы. |
11:49 | Сего ради и премудрость Божiя рече: послю въ нихъ {къ нимъ} пророки и апостолы, и от нихъ убiютъ и изженутъ: |
11:50 | да взыщется кровь всѣхъ пророкъ, проливаемая от сложенiя мiра, от рода сего, |
11:51 | от крове Авеля даже до крове Захарiи, погибшаго между олтаремъ и храмомъ: ей, глаголю вамъ, взыщется от рода сего. |
11:52 См.: 🔗Мф. 23:13 | Горе вамъ законникомъ, яко взясте ключь разумѣнiя: сами не внидосте, и входящымъ возбранисте. |
11:53 | Глаголющу же Ему сiя къ нимъ, начаша книжницы и фарисее бѣднѣ {зѣло} гнѣватися Нань и престати {вопрошати} Его о мнозѣ, |
11:54 | лающе Его {навѣтующе Нань}, ищуще уловити нѣчто от устъ Его, да Нань возглаголютъ. |