Второе послание апостола Павла к Коринфянам, глава 2

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 2
2:1	Судих же в себе сие, не паки скорбию к вам приити.
2:2	Аще бо аз скорбь творю вам, то кто есть веселяяй мя, точию приемляй скорбь от мене?
2:3 См.: 🔗2Кор. 1:14	И писах вам сие истое, да не пришед скорбь на скорбь прииму, о нихже подобаше ми радоватися, надеяся на вся вы, яко моя радость всех вас есть.
2:4 См.: 🔗1Кор. 5:1	От печали бо многия и туги сердца написах вам многими слезами, не яко да оскорбитеся, но любовь да познаете, юже имам изобильно к вам.
2:5	Аще ли кто оскорбил мене, не мене оскорби, но от части, да не отягчу, всех вас.
2:6 См.: 🔗1Кор. 5:5	Довольно бо таковому запрещение сие, еже от многих:
2:7	темже сопротивное паче вы да даруете и утешите, да не како многою скорбию пожерт будет таковый:
2:8	темже молю вы, утвердите к нему любовь.
2:9	На сие бо и писах, да разумею искусство ваше, аще во всем послушливи есте.
2:10	Емуже аще что даруете, и аз: ибо аз аще что даровах, емуже даровах, вас ради, о лицы Иисус Христове,
2:11 См.: 🔗Лк. 22:31 🔗1Пет. 5:8	да не обидими будем от сатаны: не не разумеваем бо умышлений его.
2:12	Пришед же в Троаду во благовестие Христово, и двери отверзене ми бывшей о Господе,
2:13	не имех покоя духу моему, не обретшу ми Тита брата моего: но отрекся им, изыдох в Македонию.
2:14	Богу же благодарение, всегда победители нас творящему о Христе Иисусе и воню разума Его являющу нами во всяцем месте.
2:15 См.: 🔗1Кор. 1:18 🔗2Кор. 4:3	Яко Христово благоухание есмы Богови в спасаемых и в погибающих.
2:16 См.: 🔗Лк. 2:34 🔗2Кор. 3:5	Овем убо воня смертная в смерть, овем же воня животная в живот. И к сим кто доволен?
2:17 См.: 🔗2Кор. 1:12 🔗2Кор. 4:2 🔗2Кор. 11:15 🔗1Тим. 6:5 🔗Тит. 1:11	Несмы бо, якоже мнози, нечисто проповедающии слово Божие, но яко от чистоты, но яко от Бога, пред Богом, во Христе глаголем.