Первая книга Паралипоменон (Первая книга Хроник, Первая Летопись), глава 16

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 16
16:1 См.: 🔗2Цар. 6:17	Принесоша убо кивот Божий и поставиша его посреде скинии, юже водрузи ему Давид, и принесоша всесожжения и спасителная пред Господем.
16:2 См.: 🔗2Цар. 6:18	И соверши Давид вознося всесожжения и спасителная, и благослови люди во имя Господне,
16:3 См.: 🔗2Цар. 6:19	и раздели всякому мужу Израилску, от мужа даже до жены, мужу хлеб един печеный, (и часть печена мяса,) и пряженый со елеем семидал:
16:4	постави же пред лицем кивота завета Господня от левит, еже служити и возглашати (дела Его), и исповедати и хвалити Господа Бога Израилева:
16:5	Асаф началник, и другий по нем Захариа, Иеиил и Семирамоф, и Иеиил и Маттафиа, и Елиав и Ванеа и Авдедом: Иеиил же во органех и псалтири и гуслех, Асаф же в кимвалех возглашая:
16:6	и Ванеа и Озиил священницы (трубиша) выну в трубы пред кивотом завета Божия.
16:7	В той день устрои Давид в начале хвалити Господа рукою Асафа и братии его.
16:8 См.: 🔗Пс 104🔗Ис. 12:4	Песнь. Исповедайтеся Господеви и призывайте Его во имени Его, знаема сотворите людем начинания Его:
16:9	пойте Ему и воспойте Ему, поведите вся чудеса Его, яже сотвори Господь:
16:10	хвалите имя святое Его, да возвеселится сердце ищущее благоволения Его:
16:11	взыщите Господа и укрепитеся, взыщите лица Его выну:
16:12	помяните чудеса Его, яже сотвори, знамения и судбы уст Его,
16:13	семя Израилево, раби Его, сынове Иаковли, избраннии Его.
16:14	Той Господь Бог наш, во всей земли судбы Его.
16:15 См.: 🔗Быт. 17:9 🔗Исх. 2:24 🔗Лев. 26:42	Помянем во век завет Его, слово Его, еже заповедал в тысящы родов,
16:16 См.: 🔗Быт. 12:7 🔗Быт. 22:16 🔗Лк. 1:73	еже завеща Аврааму, и клятву Свою Исааку:
16:17	и постави е Иакову в повеление, Израилю в завет вечен,
16:18	глаголя: тебе дам землю Ханааню, уже достояния вашего.
16:19 См.: 🔗Втор. 32:9	Внегда быти им малым числом, яко умалишася и преселишася в ню,
16:20	и преидоша от языка в язык и от царствия к людем иным,
16:21	не остави мужа обидети их, и обличи о них цари:
16:22 См.: 🔗Пс. 104:15	не прикасайтеся помазанным Моим, и во пророцех Моих не лукавнуйте.
16:23 См.: 🔗Пс. 95:1	Воспойте Господеви, вся земля, возвестите от дне на день спасение Его,
16:24 См.: 🔗Пс. 95:3	возвестите во языцех славу Его, во всех людех чудеса Его,
16:25 См.: 🔗Пс. 94:3 🔗Исх. 15:11 🔗Исх. 18:11	яко велий Господь и хвален зело, страшен есть над всеми боги.
16:26	Яко вси бози языков идоли: Господь же наш небеса сотвори.
16:27 См.: 🔗Пс. 95:6	Слава и величество пред лицем Его, крепость и похвала в месте Его святем.
16:28	Дадите Господеви, отечествия языков, дадите Господеви славу и крепость,
16:29	дадите Господеви славу имени Его: возмите дары и принесите пред лице Его, и поклонитеся Господеви во дворех святых Его.
16:30	Да убоится от лица Его вся земля, да исправится земля и да не подвижится:
16:31	да возвеселятся небеса и да возрадуется земля, и да рекут во языцех: Господь царствует.
16:32	Да возгласит море и исполнение его, и древа польская, и вся яже на них.
16:33	Тогда возвеселятся древа дубравная пред лицем Господним, яко прииде судити земли.
16:34 См.: 🔗1Езд. 3:11	Исповедайтеся Господеви, яко благ, яко в век милость Его,
16:35 См.: 🔗Втор. 30:3	и глаголите: спаси ны, Боже, Спасителю наш, и собери нас, и изми нас от язык, да хвалим имя святое Твое, и хвалимся во хвалениих Твоих.
16:36 См.: 🔗Пс. 40:14 🔗Втор. 27:15 🔗Неем. 8:6	Благословен Господь Бог Израилев от века даже и до века. И рекут вси людие: аминь. И восхвалиша Господа.
16:37	И оставиша тамо пред кивотом завета Господня Асафа и братию его, да служат пред кивотом выну по вся дни:
16:38	и Авдедом и братия его, шестьдесят осмь: и Авдедом сын Идифунь и Осай (поставлени) во дверники:
16:39	Садока же священника и братию его священниками пред скиниею Господнею в вышних иже в Гаваоне,
16:40 См.: 🔗Исх. 27:21 🔗Чис. 28:3	да возносят всесожжения Господеви на олтари всесожжений выну утро и вечер, и по всем яже писана суть в законе Господни, елика повеле сыном Израилевым рукою Моисеа раба Божия:
16:41	и с ними Еман и Идифум и прочии избраннии кийждо званием своим еже хвалити Господа, яко в век милость Его:
16:42	и с ними трубы и кимвалы еже возглашати, и органы пений Божиих: сынове же Идифумли во вратех (стояху).
16:43 См.: 🔗2Цар. 6:19	И идоша вси людие кийждо в дом свой, и Давид возвратися, да благословит дом свой.