Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 20 | |
20:1 См.: 🔗Иез. 14:1 | И бысть в лето седмое, в пятый месяц, в десятый день месяца, приидоша мужие от старейшин дому Израилева вопросити Господа и седоша пред лицем моим. |
20:2 | И бысть слово Господне ко мне глаголя: |
20:3 См.: 🔗Иез. 14:3 | сыне человечь, глаголи ко старейшинам дому Израилева и речеши к ним: тако глаголет Адонаи Господь: еда вопросити Мене вы приходите? Живу Аз, аще отвещаю вам, глаголет Адонаи Господь. |
20:4 См.: 🔗Иез. 22:2 | Аще отмщением отмщу им: сыне человечь, беззакония отец их засвидетелствуй им, |
20:5 См.: 🔗Исх. 3:6 | и речеши к ним: сия глаголет Адонаи Господь: от негоже дне избрах дом Израилев, и уведен бых племени дому Иаковля и познан бых им во земли Египетстей, и приях я рукою Моею глаголя: Аз Господь Бог ваш: |
20:6 См.: 🔗Исх. 3:17 | в той день подях я рукою Моею, еже извести я из земли Египетския в землю, юже уготовах им, землю кипящую млеком и медом, сот есть паче всех земель, |
20:7 См.: 🔗Исх. 23:24 🔗Исх. 34:13 | и рекох к ним: кийждо мерзости от очес своих отвержите и во творениих Египетских не оскверняйтеся, Аз Господь Бог ваш. |
20:8 | И отвергошася Мене и не хотеша послушати Мя: кийждо мерзостей от очес своих не отвергоша и творений Египетских не оставиша. И рекох, еже излияти ярость Мою на ня и скончати гнев Мой на них среде земли Египетския. |
20:9 См.: 🔗Чис. 14:16 🔗Ис. 52:5 | И сотворих, яко да имя Мое весьма не осквернится пред языки, в нихже суть тии среде их, в нихже познан бых им пред лицем их, еже извести я из земли Египетския. |
20:10 См.: 🔗Исх. 16:1 | И изведох я из земли Египетския и введох я в пустыню, |
20:11 | и дах им заповеди Моя, и оправдания Моя явих им, яже аще сотворит человек, жив будет в них: |
20:12 | и субботы Моя дах им, еже быти в знамение между Мною и между ими, еже разумети им, яко Аз Господь освящаяй их. |
20:13 См.: 🔗Исх. 16:28 | И глаголах ко дому Израилеву в пустыни: в заповедех Моих ходите и оправдания Моя сохраните, еже творити я, яже сотворит человек и жив будет в них. И разгнева Мя дом Израилев в пустыни: в заповедех бо Моих не ходиша и оправдания Моя отвергоша, яже сотворит человек и жив будет в них: и субботы Моя оскверниша зело. И рекох, еже излияти ярость Мою на ня в пустыни, еже потребити их. |
20:14 См.: 🔗Чис. 14:16 🔗Втор. 9:28 | И сотворих, яко да весьма имя Мое не осквернится пред языки, из нихже изведох я пред очима их. |
20:15 | И Аз воздвигох руку Мою на ня в пустыни весьма, еже не ввести их в землю, юже дах им, в землю текущую млеком и медом, сот есть паче всея земли: |
20:16 См.: 🔗Ос. 9:17 | понеже судбы Моя отвергоша и в заповедех Моих не ходиша, и субботы Моя оскверниша и вслед помышлений сердца своего хождаху. |
20:17 См.: 🔗Иез. 5:11 | И пощаде я око Мое, еже потребити их, и не сотворих им скончания в пустыни. |
20:18 См.: 🔗Втор. 4:25 | И рекох ко чадом их в пустыни: в законех отец ваших не ходите и оправданий их не храните, и ко творением Египетским не примешайтеся и не оскверняйтеся: |
20:19 | Аз Господь Бог ваш: в заповедех Моих ходите, и оправдания Моя снабдите и творите я, |
20:20 | и субботы Моя освящайте и будет в знамение между Мною и между вами, еже ведети вам, яко Аз Господь Бог ваш. |
20:21 См.: 🔗Дан. 9:11 | И разгневаша Мя, и чада их в заповедех Моих не ходиша и оправданий Моих не снабдеша, еже творити я: сия бо сотворив человек жив будет в них: и субботы Моя оскверниша зело. И рекох: излию ярость Мою на ня, еже скончати гнев Мой на них в пустыни. |
20:22 См.: 🔗Чис. 14:13 | И сотворих, яко да имя Мое весьма не осквернавится пред языки, от нихже изведох я пред очима их. |
20:23 | И Аз воздвигох руку Мою на ня в пустыни, еже расточити я во языцех и разсеяти я во странах, |
20:24 | понеже оправданий Моих не сотвориша и заповеди Моя отринуша и субботы Моя оскверниша, и вслед кумиров отец их быша очеса их. |
20:25 См.: 🔗Пс. 80:13 🔗2Фес. 2:9 | И дах им заповеди не добры и оправдания, в нихже не будут живи: |
20:26 См.: 🔗Иез. 20:31 | и оскверню я в даяниих их, внегда проводити (им) всякое разверзающее ложесна, да погублю их, да уразумеют, яко Аз Господь. |
20:27 | Сего ради глаголи к дому Израилеву, сыне человечь, и речеши к ним: сия глаголет Адонаи Господь: даже до сего разгневаша Мя отцы ваши во гресех своих, имиже согрешиша ко Мне: |
20:28 См.: 🔗Быт. 17:8 🔗Быт. 22:16 | и введох я в землю, в нюже воздвигох руку Мою, еже дати ю им: и видеша всяк холм высок и всяко древо присенное, и пожроша тамо богом своим и учиниша тамо ярость даров своих, и положиша тамо воню благовония своего и возлияша тамо возлияния своя. |
20:29 См.: 🔗Втор. 12:2 | И рекох к ним: что суть Аввама, яко вы входите тамо? И прозваша имя ему Аввама даже до днешняго дне. |
20:30 | Сего ради рцы к дому Израилеву: сия глаголет Адонаи Господь: аще во беззакониих отец ваших вы оскверняетеся и вслед мерзостей их вы соблуждаете, |
20:31 См.: 🔗Иез. 16:21 | и в приношении даров ваших и в нароцех ваших, егда проходят чада ваша сквозе огнь: вы оскверняетеся во всех кумирех ваших даже до днешняго дне, и Аз отвещаю ли вам, доме Израилев? Живу Аз, глаголет Адонаи Господь, аще отвещаю вам и аще взыдет на дух ваш сие. |
20:32 См.: 🔗Иер. 44:17 🔗Ос. 4:13 | И не будет, якоже вы глаголете: будем, якоже языцы и якоже племена земная, служити древу и камению. |
20:33 | Сего ради живу Аз, глаголет Адонаи Господь, аще не рукою крепкою и мышцею высокою и в ярости излиянней царствовати буду над вами: |
20:34 | и изведу вы от людий и прииму вы от стран, в нихже бесте разсеяни, рукою крепкою и мышцею высокою и яростию излиянною, |
20:35 См.: 🔗Ис. 1:18 | и приведу вас в пустыню людскую и разсуждуся с вами тамо лицем к лицу: |
20:36 См.: 🔗Чис. 14:22 | якоже судихся со отцы вашими в пустыни земли Египетския, тако сужду и вам, глаголет Адонаи Господь: |
20:37 См.: 🔗1Кор. 4:21 | и проведу вы под жезлом моим и введу вы в числе завета, |
20:38 См.: 🔗Мф. 25:31 | и изберу от вас нечестивыя и отвергшыяся: из земли бо обитания их изведу я, и в землю Израилеву не внидут, и познаете, яко Аз Господь Бог. |
20:39 См.: 🔗Ис. 29:23 | Вы же, доме Израилев, сице глаголет Адонаи Господь: кийждо кумиры своя отимите, и потом аще послушаете Мене, и имене Моего святаго не осквернавите ксему в дарех ваших и рукотворениих ваших: |
20:40 | понеже на горе Моей святей, на горе высоце Израилеве, глаголет Адонаи Господь, тамо послужат Ми весь дом Израилев до конца на земли, и тамо прииму я и тамо присещу на приношения ваша и начатки обетов ваших во всех освященных ваших. |
20:41 | В воню благовония прииму вы, егда изведу вы из людий и прииму вы от стран, в няже расточени бысте, и освящуся в вас пред очима людскима: |
20:42 | и увесте, яко Аз Господь, егда введу вы в землю Израилеву, в землю, на нюже воздвигох руку Мою дати ю отцем вашым: |
20:43 См.: 🔗Иез. 6:9 🔗Иез. 16:61 | и помянете тамо пути вашя и вся мерзкия грехи вашя, в нихже осквернистеся, и посрамите лица ваша во всех злобах ваших, яже сотвористе: |
20:44 | и познаете, яко Аз Господь, егда сотворю вам тако, яко да имя Мое не осквернится по путем вашым злым и по рукотворением вашым растленным, доме Израилев, глаголет Адонаи Господь. |
20:45 | И бысть слово Господне ко мне глаголя: |
20:46 См.: 🔗Ам. 7:15 | сыне человечь, утверди лице твое на юг и воззри на дарома, и прорцы на дубраву старейшину нагева |
20:47 | и речеши дубраве нагевове: слыши слово Господне, сия глаголет Адонаи Господь: се, Аз возгнещу в тебе огнь, и пожжет в тебе всяко древо зеленое и всяко древо сухое, не угаснет пламень разжженый, и изгорит в нем всяко лице от полудне до севера, |
20:48 См.: 🔗Иер. 7:20 | и увесть всяка плоть, яко Аз Господь разжегох его, и не угаснет. |
20:49 См.: 🔗Иез. 17:2 | И рекох: никакоже, Господи, Господи! Сии глаголют ко мне: не притча ли есть сия глаголема? |