Книга Бытия, глава 2

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 2
2:1 См.: 🔗Ис. 45:12	И совершишася небо и земля, и все украшение их.
2:2 См.: 🔗Исх. 20:11 🔗Исх. 31:17 🔗Евр. 4:4	И соверши Бог в день шестый дела Своя, яже сотвори: и почи в день седмый от всех дел Своих, яже сотвори.
2:3	И благослови Бог день седмый, и освяти его: яко в той почи от всех дел Своих, яже начат Бог творити.
2:4	Сия книга бытия небесе и земли, егда бысть, в оньже день сотвори Господь Бог небо и землю,
2:5	и всякий злак селный, прежде даже быти на земли, и всякую траву селную, прежде даже прозябнути: не бо одожди Господь Бог на землю, и человек не бяше делати ю:
2:6	источник же исхождаше из земли и напаяше все лице земли.
2:7 См.: 🔗1Кор. 15:45	И созда Бог человека, персть (взем) от земли, и вдуну в лице его дыхание жизни: и бысть человек в душу живу.
2:8 См.: 🔗Быт. 4:16	И насади Господь Бог рай во Едеме на востоцех, и введе тамо человека, егоже созда.
2:9 См.: 🔗Отк. 2:7 🔗Отк. 22:2	И прозябе Бог еще от земли всякое древо красное в видение и доброе в снедь: и древо жизни посреде рая, и древо еже ведети разуметелное добраго и лукаваго.
2:10	Река же исходит из Едема напаяти рай: оттуду разлучается в четыри начала.
2:11 См.: 🔗Сир. 24:27	Имя единей Фисон: сия окружающая всю землю Евилатскую: тамо убо есть злато.
2:12	Злато же оныя земли доброе: и тамо есть анфракс и камень зеленый.
2:13	И имя реце вторей Геон: сия окружающая всю землю Ефиопскую.
2:14 См.: 🔗Дан. 10:4	И река третия Тигр: сия проходящая прямо Ассириом. Река же четвертая Евфрат.
2:15	И взя Господь Бог человека, егоже созда, и введе его в рай Сладости, делати его и хранити.
2:16	И заповеда Господь Бог Адаму, глаголя: от всякаго древа, еже в раи, снедию снеси:
2:17 См.: 🔗Рим. 5:12 🔗Рим. 6:23	от древа же, еже разумети доброе и лукавое, не снесте от него: а в оньже аще день снесте от него, смертию умрете.
2:18 См.: 🔗Еккл. 4:8	И рече Господь Бог: не добро быти человеку единому: сотворим ему помощника по нему.
2:19	И созда Бог еще от земли вся звери селныя и вся птицы небесныя, и приведе я ко Адаму видети, что наречет я: и всяко еже аще нарече Адам душу живу, сие имя ему.
2:20	И нарече Адам имена всем скотом, и всем птицам небесным, и всем зверем земным. Адаму же не обретеся помощник подобный ему.
2:21	И наложи Бог изступление на Адама, и успе: и взя едино от ребр его, и исполни плотию вместо его.
2:22 См.: 🔗1Тим. 2:13	И созда Господь Бог ребро, еже взя от Адама, в жену, и приведе ю ко Адаму.
2:23 См.: 🔗1Кор. 11:8	И рече Адам: се, ныне кость от костей моих и плоть от плоти моея: сия наречется жена, яко от мужа своего взята бысть сия.
2:24 См.: 🔗Мф. 19:5 🔗Мк. 10:7 🔗1Кор. 6:16 🔗Еф. 5:31	Сего ради оставит человек отца своего и матерь и прилепится к жене своей, и будета два в плоть едину.
2:25	И беста оба нага, Адам же и жена его, и не стыдястася.