Откровение Иоанна Богослова (Апокалипсис), глава 18

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 18
18:1 См.: 🔗Иез. 43:2	И по сих видех ина Ангела сходяща с небесе, имуща область велию: и земля просветися от славы его.
18:2 См.: 🔗Ис. 13:19 🔗Ис. 21:9 🔗Иер. 50:1 🔗Иер. 51:8 🔗Вар. 4:35	И возопи в крепости, гласом велиим глаголя: паде, паде Вавилон великий, и бысть жилище бесом и хранитель всякому духу нечисту, и хранилище всех птиц нечистых и ненавидимых: яко от вина ярости любодеяния своего напои вся языки,
18:3 См.: 🔗Отк. 17:2	и царие земстии с нею любы деяша, и купцы земстии от силы пищи ея разбогатеша.
18:4 См.: 🔗Ис. 48:20 🔗Ис. 52:11 🔗Зах. 2:7	И слышах глас ин с небесе, глаголющь: изыдите из нея, людие Мои, да не причаститеся грехом ея и от язв ея да не вредитеся:
18:5 См.: 🔗Иер. 51:49	яко прилепишася греси ея даже до небесе, и помяну Бог неправды ея.
18:6	Воздадите ей, яко и та воздаде вам, и усугубите ей сугубо по делом ея: чашею, еюже черпа (вам), черплите ей сугубо.
18:7 См.: 🔗Соф. 2:15	Елико прославися и разсвирепе, толико дадите ей мук и рыданий: яко в сердцы своем глаголет, (яко) сежу царицею, и вдова несмь, и рыдания не имам видети.
18:8	Сего ради во един день приидут язвы ей, смерть и плачь и глад, и огнем сожжена будет, яко крепок Господь Бог судяй ей.
18:9	И возрыдают и восплачутся ея царие земстии, любы деявшии с нею и разсвирепевшии, егда узрят дым запаления ея,
18:10 См.: 🔗Иез. 27:27 🔗Отк. 14:8	издалеча стояще за страх мук ея, глаголюще: горе, горе, град великий Вавилон, град крепкий, яко во един час прииде суд твой.
18:11	И купцы земстии возрыдают и восплачутся о нем, яко бремен их никтоже купует ктому,
18:12	бремен злата и сребра, и камения драгаго и бисера, и висса и порфиры, и шелка и червени, и всякаго древа фиинна, и всякаго сосуда из кости слоновыя, и всякаго сосуда от древа честнаго, и медяна и железна и мраморна,
18:13	и корицы и фимиама, и мира и ливана, и вина и елеа, и семидала и пшеницы, и скота и овец, и коней и колесниц, и телес и душ человеческих.
18:14	И овощи похотей души твоея отидоша от тебе, и вся тучная и светлая отидоша от тебе, и ктому не имаши обрести их.
18:15	Купцы сими обогащшеся от нея, издалеча станут за страх мучения ея, рыдающе и плачущеся,
18:16	и глаголюще: горе, горе, град великий, облеченный виссом и порфирою и червленицею, и позлащеный златом и камением драгим и бисером
18:17 См.: 🔗Иер. 50:23 🔗Иер. 51:13	яко во един час погибе толико богатство. И всяк кормчий, и всяк плаваяй в кораблех, и всяк елик в мори делаяй, издалеча сташа,
18:18	и вопияху, видяще дым раждежения его, глаголюще: кий подобен граду великому?
18:19	И положиша персть на главах своих, и возопиша плачущеся и рыдающе, глаголюще: горе, горе, град великий, в немже обогатишася вси имущии корабли в мори, от чести его: яко единем часом запусте.
18:20 См.: 🔗Ис. 44:23 🔗Ис. 49:13 🔗Иер. 51:48	Веселися о сем, небо, и святии Апостоли и пророцы, яко суди Бог суд ваш от него.
18:21 См.: 🔗Иер. 51:63	И взят един Ангел крепок камень велик яко жернов и верже в море, глаголя: тако стремлением ввержен будет Вавилон град великий, и не имать обрестися ктому:
18:22 См.: 🔗Иез. 26:13	и глас гудец и мусикий, и пискателей и труб не имать слышатися ктому в тебе: и всяк хитрец всякия хитрости не обрящется ктому в тебе, и шум жерновный не будет слышан в тебе:
18:23 См.: 🔗Иер. 7:34 🔗Отк. 17:2	и свет светилника не имать светити в тебе ктому, и глас жениха и невесты не имать слышан быти в тебе ктому: яко купцы твои беша вельможи земстии, яко волхвовании твоими прельщени быша вси языцы.
18:24 См.: 🔗Отк. 17:6	И в нем кровь пророческа и святых обретеся и всех избиенных на земли.