Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 14 | |
14:1 | Скоро идет и не умедлит: и помилует Господь Иакова и изберет паки Израиля, и почиют на земли своей, и пришлец приложится к ним и приложится к дому Иаковлю, |
14:2 См.: 🔗Авд. 1:17 🔗Отк. 13:10 | и поймут их языцы и введут на место их, и наследят и умножатся на земли Божии в рабы и рабыни: и будут пленени пленившии я, и обладани будут обладавшии ими. |
14:3 | И будет в той день, упокоит тя Господь от болезни и ярости твоея и от работы жестокия, еюже работал еси им. |
14:4 См.: 🔗Иер. 50:23 | И приимеши плачь сей на царя Вавилонска и речеши в той день: како преста истязуяй и преста понуждаяй? |
14:5 См.: 🔗Пс. 124:3 🔗Ис. 9:4 | Сокруши Бог ярем грешников, ярем князей, |
14:6 | поразив язык яростию, язвою неизцельною, поражаяй язык язвою ярости, еюже не пощаде, почи уповающи. |
14:7 | Вся земля вопиет со веселием, |
14:8 См.: 🔗4Цар. 19:23 | и древа ливанова возвеселишася о тебе и кедр ливанский: отнележе ты уснул еси, не взыде посекаяй нас. |
14:9 | Ад доле огорчися, срет тя: восташа с тобою вси Исполини обладавшии землею, подвизавшии от престолов своих всех царей языческих. |
14:10 См.: 🔗Иез. 32:21 | Вси отвещают и рекут тебе: и ты пленен еси, якоже и мы: и в нас вменен еси. |
14:11 См.: 🔗Дан. 4:29 🔗Лк. 1:52 | Сниде слава твоя во ад, многое веселие твое: под тобою постелют гнилость, и покров твой червь. |
14:12 См.: 🔗Дан. 8:10 | Како спаде с небесе денница восходящая заутра? Сокрушися на земли посылаяй ко всем языком. |
14:13 См.: 🔗1Ин. 2:16 🔗Иез. 40:2 | Ты же рекл еси во уме твоем: на небо взыду, выше звезд небесных поставлю престол мой, сяду на горе высоце, на горах высоких, яже к северу: |
14:14 | взыду выше облак, буду подобен Вышнему. |
14:15 См.: 🔗Иез. 32:23 | Ныне же во ад снидеши и во основания земли. |
14:16 | Видевшии тя удивятся о тебе и рекут: сей человек раздражаяй землю, потрясаяй цари, |
14:17 | положивый вселенную всю пусту и грады ея разсыпа, плененых не разреши. |
14:18 | Вси царие языков успоша в чести, кийждо в дому своем. |
14:19 | Ты же повержен будеши в горах, яко мертвец мерзкий со многими мертвецы изсечеными мечем, сходящими во ад. |
14:20 См.: 🔗Иов. 18:19 | Якоже риза в крови намочена не будет чиста, такожде и ты не будеши чист, зане землю Мою погубил еси и люди Моя избил еси: не пребудеши в вечное время, семя злое. |
14:21 См.: 🔗Исх. 20:5 | Уготови чада твоя на убиение грехами отца твоего, да не востанут и наследят землю и наполнят землю ратьми. |
14:22 | И востану на ня, глаголет Господь Саваоф, и погублю имя их, и останок, и семя: сия глаголет Господь. |
14:23 См.: 🔗Иер. 25:12 | И положу Вавилона пуста, яко вогнездитися ежем, и будет ни во чтоже: и положу и брения пропасть в пагубу. |
14:24 | Сия глаголет Господь Саваоф: якоже глаголах, тако будет, и якоже совещах, тако пребудет, |
14:25 См.: 🔗4Цар. 19:35 | еже погубити Ассириан на земли Моей и на горах Моих: и будут в попрание, и отимется от них ярем их, и слава их от рамен их отимется. |
14:26 | Сей совет, егоже совеща Господь на всю вселенную, и сия рука на вся языки вселенныя: |
14:27 | яже бо Бог Святый совеща, кто разорит? И руку Его высокую кто отвратит? |
14:28 См.: 🔗2Пар. 28:27 | В лето, в неже умре Ахаз царь, бысть глагол сей: |
14:29 | не радуйтеся, вси иноплеменницы, сокрушися бо ярем биющаго вы: от семене бо змиина изыдут изчадия аспидов, и изчадия их изыдут змии парящии: |
14:30 См.: 🔗Ис. 5:17 | и упасутся убозии им, нищии же человецы в мире почиют: и потребит гладом семя твое, и останок твой избиет. |
14:31 | Восплачитеся, врата градов, да возопиют грады смятеннии, иноплеменницы вси, зане дым от севера идет, и несть, иже пребудет. |
14:32 См.: 🔗Пс. 86:2 🔗Пс. 101:17 | И что отвещают царие языков? Яко Господь основа Сиона, и тем спасутся смиреннии людий Его. |