Книга пророка Иезекииля, глава 28

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 28
28:1	И бысть слово Господне ко мне глаголя:
28:2 См.: 🔗Дан. 5:20 🔗Деян. 12:22	и ты, сыне человечь, рцы князю Тирску: сия глаголет Адонаи Господь: понеже вознесеся сердце твое, и рекл еси: аз есмь бог, в селение божие вселихся в сердцы морстем: ты же человек еси, а не Бог, и положил еси сердце твое яко сердце Божие.
28:3 См.: 🔗Дан. 4:5	Еда премудрее ты еси Даниила? Премудрии не наказаша тебе хитростию своею.
28:4	Еда хитростию твоею или смыслом твоим сотворил еси себе силу и притяжал еси сребро и злато в сокровищих твоих?
28:5	Или во мнозей хитрости твоей и в купли твоей умножил еси силу твою? Вознесеся сердце твое в силе твоей.
28:6 См.: 🔗Иез. 28:2	Того ради сия глаголет Адонаи Господь: понеже дал еси сердце свое яко сердце Божие,
28:7 См.: 🔗Иез. 26:7 🔗Иез. 30:11	вместо сего, се, Аз наведу на тя чуждыя губители от язык, и извлекут мечы своя на тя и на доброту хитрости твоея, и постелют доброту твою в погубление,
28:8 См.: 🔗Иез. 26:20 🔗Иез. 31:16	и сведут тя, и умреши смертию язвеных в сердцы морстем.
28:9	Еда речеши глаголя пред убивающими тя: бог есмь аз? Ты же человек еси, а не бог, в руце убивающих тя.
28:10	Смертьми необрезаных умреши в руках чуждих: яко Аз рекох, глаголет Адонаи Господь.
28:11	И бысть слово Господне ко мне глаголя:
28:12 См.: 🔗Иез. 27:3	сыне человечь, возми плачь на князя Тирска и рцы ему: сия глаголет Адонаи Господь: ты еси печать уподобления, исполнен премудрости и венец доброты,
28:13 См.: 🔗Иез. 31:8 🔗Отк. 17:4	в сладости рая Божия был еси, всяким камением драгим украсился еси, сардием и топазием, и смарагдом и иакинфом, и анфраксом и сапфиром, и иасписом и сребром и златом, и лигирием и ахатом, и амефистом и хрисолифом, и вириллием и онихом и златом наполнил еси сокровища твоя и житницы твоя, от негоже дне создан еси.
28:14	Ты, с херувимом вчиних тя в горе святей Божии, был еси среде каменей огненных.
28:15	Был еси ты непорочен во днех твоих, от негоже дне создан еси, дондеже обретошася неправды в тебе.
28:16	От множества купли твоея наполнил еси сокровища твоя беззакония, и согрешил еси, и уязвлен еси от горы Божия: и сведе тя херувим осеняяй от среды камыков огненных.
28:17 См.: 🔗1Кор. 4:9	Вознесеся сердце твое в доброте твоей, истле хитрость твоя с добротою твоею: множества ради грехов твоих на землю повергох тя, пред цари дах тя во обличение.
28:18 См.: 🔗Иов. 22:20 🔗Иез. 20:47	Множества ради грехов твоих и неправд купли твоея, осквернил еси святая твоя, и изведу огнь от среды твоея, сей снесть тя: и дам тя во прах на земли пред всеми видящими тя.
28:19 См.: 🔗Иез. 27:36	И вси ведящии тебе во языцех возстенут по тебе: пагуба учинен еси, и не будеши ктому во век.
28:20	И бысть слово Господне ко мне глаголя:
28:21 См.: 🔗Ис. 23:4	сыне человечь, утверди лице твое на Сидона и прорцы о нем и рцы:
28:22 См.: 🔗Исх. 14:18 🔗Пс. 45:11 🔗Иез. 26:6	сия глаголет Адонаи Господь: се, Аз на тя, Сидоне, и прославлюся в тебе, и уразумееши, яко Аз есмь Господь, егда сотворю в тебе суд и освящуся в тебе:
28:23	и послю на тя смерть, и кровь в стогнах твоих будет, и падут язвении среде тебе мечем, в тебе и окрест тебе, и уведят, яко Аз Господь:
28:24 См.: 🔗Чис. 33:55	и не будет ктому дому Израилеву остен горести и терн болезни от всех окрестных его обезчестивших их, и уразумеют, яко Аз есмь Адонаи Господь.
28:25 См.: 🔗Лев. 11:44	Тако глаголет Адонаи Господь: и соберу дом Израилев от язык, идеже разсыпашася тамо, и освящуся в них пред людьми и языки: и вселятся на земли своей, юже дах рабу Моему Иакову,
28:26	и населятся на ней с надеждею, и созиждут домы, и насадят винограды, и вселятся на ней с надеждею, егда сотворю суд во всех, иже укориша я во окрестных их: и уразумеют, яко Аз Господь Бог их и Бог отцев их.