Книга Бытия, глава 41

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 41
41:1 См.: 🔗Дан. 2:1	Бысть же по двою лету дний, фараон виде сон: мняшеся стояти при реце:
41:2	и се, аки из реки исхождаху седмь крав добры видом и избранны телесы, и пасяхуся по брегу:
41:3	другия же седмь крав изыдоша по сих из реки, злы видом и телесы худы, и пасяхуся с кравами по брегу речному:
41:4	и поядоша седмь кравы злыя и худыя телесы седмь крав добрых видом и избранных телесы: (и сия невидимы быша, яко внидоша в чресла их). Воста же фараон.
41:5	И виде сон вторый: и се, седмь класи исхождаху из стеблия единаго избранны и добры:
41:6 См.: 🔗Иез. 17:10	друзии же седмь класи тонцыи, истончени ветром, израстаху по них:
41:7	и пожроша седмь класи тонцыи и истончени ветром седмь класов избранных и полных. Воста же фараон, и бяше сон.
41:8 См.: 🔗Быт. 40:7 🔗Дан. 2:3 🔗Исх. 7:11	Бысть же заутра, и возмутися душа его: и послав, созва вся сказатели Египетския и вся мудрыя его: и поведа им фараон сон свой: и не бяше сказуяй того фараону.
41:9	И рече старейшина винарск к фараону, глаголя: грех мой воспоминаю днесь:
41:10 См.: 🔗Быт. 40:3	фараон разгневася на рабы своя и вверже нас в темницу в дому архимагира, мене и старейшину житарска:
41:11 См.: 🔗Быт. 40:8	и видехом сон оба единыя нощи аз и он, кийждо свой сон видехом:
41:12	бяше же тамо с нами юноша, отрок Евреин архимагиров, и поведахом ему, и разсуди нам:
41:13 См.: 🔗Быт. 40:19	бысть же, якоже сказа нам, тако и случися, мне паки быти во своем старейшинстве, а оному повешену.
41:14 См.: 🔗Пс. 104:20	Послав же фараон, призва Иосифа: и изведоша его из твердыни, и остригоша его, и измениша ризы ему, и прииде к фараону.
41:15	Рече же фараон Иосифу: сон видех, и сказуяй его несть: аз же слышах о тебе глаголющих, яко слышав сны разсуждаеши тыя.
41:16 См.: 🔗Дан. 2:30 🔗Мф. 10:20 🔗1Кор. 15:10	Отвещав же Иосиф фараону, рече: без Бога не отвещается спасение фараону.
41:17	Рече же фараон Иосифу, глаголя: во сне моем мняхся стояти на брезе речнем:
41:18	и аки из реки исхождаху седмь кравы добры видом и избранны телесы, и пасяхуся по брегу:
41:19	и се, другия седмь крав исхождаху вслед их из реки, злы и недобры видом и худы телесы, яковых не виде таковых во всей земли Египетстей хуждших:
41:20	и изядоша седмь кравы злыя и худыя седмь крав первых добрых и избранных:
41:21 См.: 🔗Быт. 41:4	и внидоша во утробы их, и не явишася, яко внидоша во утробы их: и обличия их зла быша, яко и исперва. Востав же, (паки) уснух,
41:22	и видех паки во сне моем, и аки седмь класи исхождаху из единаго стеблия полны и добры:
41:23	друзии же седмь класи тонцыи и ветром истончени изницаху вслед их:
41:24	и пожроша седмь класи тонцыи и ветром истончени седмь класов добрых и полных. Рех убо сказателем, и не бысть поведаяй мне того.
41:25	И рече Иосиф фараону: сон фараонов един есть: елика Бог творит, показа фараону:
41:26 См.: 🔗Быт. 40:12	седмь кравы добрыя седмь лет суть: и седмь класи добрии седмь лет суть: сон фараонов един есть:
41:27	и седмь кравы худыя, яже изыдоша по сих, седмь лет суть, и седмь класи тонцыи и истончени ветром седмь лет суть: будут седмь лет глада:
41:28	слово же еже рех фараону, елика Бог творит, показа фараону:
41:29	се, седмь лет приходит, обилность многа во всей земли Египетстей:
41:30 См.: 🔗4Цар. 8:1	приидут же седмь лет глада по сих, и забудут сытости будущия во всем Египте, и погубит глад землю,
41:31	и не познается обилие на земли от глада будущаго по сих: силен бо будет зело:
41:32	повторися же сон фараону дважды, яко истинно будет слово еже от Бога, и ускорит Бог сотворити оно:
41:33	ныне убо усмотри человека мудра и смыслена и постави его над землею Египетскою:
41:34	и да сотворит фараон и поставит местоначалники по земли, и да собирают пятую часть от всех плодов земли Египетския седми лет обилных,
41:35	и да соберут всякую пищу седми лет грядущих добрых сих: и да соберется пшеница под руку фараоню, пища во градех да хранится:
41:36	и будет пища соблюдена земли на седмь лет гладных, яже имут быти в земли Египетстей, да не потребится земля в гладе.
41:37	Угодно же бысть слово пред фараоном и пред всеми рабы его.
41:38	И рече фараон всем рабом своим: еда обрящем человека сицеваго, иже имать Духа Божия в себе?
41:39	Рече же фараон Иосифу: понеже показа Бог тебе вся сия, несть человека мудрейша и смысленнейша паче тебе:
41:40 См.: 🔗Пс. 104:21 🔗1Мак. 2:53 🔗Деян. 7:10	ты будеши в дому моем, и уст твоих да послушают вси людие мои, разве престолом аз более тебе буду.
41:41 См.: 🔗Прем. 10:14	Рече же фараон Иосифу се, поставляю тя днесь над всею землею Египетскою.
41:42 См.: 🔗Есф. 3:10 🔗Иез. 16:11 🔗Дан. 5:29	И снем фараон перстень с руки своея, возложи его на руку Иосифову, и облече его в ризу червлену, и возложи гривну злату на выю его,
41:43	и всади его на колесницу свою вторую, и проповеда пред ним проповедник: и постави его над всею землею Египетскою.
41:44	Рече же фараон Иосифу: аз фараон: без тебе не воздвигнет руки своея никтоже во всей земли Египетстей.
41:45	И нарече фараон имя Иосифу Псонфомфаних: и даде ему Асенефу, дщерь Петефриа жреца Илиопольскаго, ему в жену.
41:46 См.: 🔗Быт. 37:2	Иосиф же бяше лет тридесяти, егда предста фараону царю Египетскому. Изыде же Иосиф от лица фараоня и пройде всю землю Египетскую.
41:47	И сотвори земля в седми летех обилну жатву.
41:48	И собра всякую пищу седми лет, в нихже бяше обилность в земли Египетстей: и положи пищу во градех: пищы поль града, сущих окрест его, положи в нем.
41:49	И собра Иосиф пшеницу яко песок морский многу зело, дондеже не можаху исчести: без числа бо бяше.
41:50 См.: 🔗Быт. 46:20 🔗Быт. 48:5	Иосифу же беста два сына, прежде пришествия седми лет гладных, ихже роди ему Асенефа, дщерь Петефриа жреца Илиопольска:
41:51	нарече же Иосиф имя первенцу Манассиа, (глаголя:) яко забыти мне сотвори Бог вся болезни моя, и вся, яже отца моего.
41:52	Имя же второму нарече Ефраим, (глаголя:) яко возрасти мя Бог в земли смирения моего.
41:53	Минуша же седмь лет обилных, яже быша в земли Египетстей,
41:54 См.: 🔗Пс. 104:16	и начаша седмь лет гладных приходити, якоже рече Иосиф. И бысть глад по всей земли: во всей же земли Египетстей быша хлебы.
41:55 См.: 🔗Ин. 2:5	И взалка вся земля Египетская: возопи же народ к фараону о хлебех. Рече же фараон всем Египтяном: идите ко Иосифу, и еже речет вам, сотворите.
41:56 См.: 🔗Быт. 42:6	И глад бяше на лицы всея земли. Отверзе же Иосиф вся житницы, и продаяше всем Египтяном:
41:57 См.: 🔗Быт. 12:10	и вся страны прихождаху во Египет, куповати ко Иосифу: обдержаше бо глад всю землю.