Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 3 | |
3:1 См.: 🔗Ин. 1:12 | Видите, какову любовь дал есть Отец нам, да чада Божия наречемся, и будем. Сего ради мир не знает нас, зане не позна Его. |
3:2 См.: 🔗Мф. 5:8 🔗1Кор. 13:12 | Возлюбленнии, ныне чада Божия есмы, и не у явися, что будем: вемы же, яко, егда явится, подобни Ему будем, ибо узрим Его, якоже есть. |
3:3 См.: 🔗2Кор. 7:1 | И всяк имеяй надежду сию Нань, очищает себе, якоже Он чист есть. |
3:4 См.: 🔗1Ин. 5:17 | Всяк творяй грех, и беззаконие творит: и грех есть беззаконие. |
3:5 См.: 🔗Ис. 53:4 🔗1Пет. 2:22 | И весте, яко Он явися, да грехи нашя возмет, и греха в Нем несть. |
3:6 | Всяк, иже в Нем пребывает, не согрешает: всяк согрешаяй не виде Его, ни позна Его. |
3:7 См.: 🔗Иез. 18:9 | Чадца, никтоже да льстит вас. Творяй правду праведник есть, якоже Он праведен есть. |
3:8 См.: 🔗Ин. 8:44 | Творяй грех от диавола есть, яко исперва диавол согрешает. Сего ради явися Сын Божий да разрушит дела диаволя. |
3:9 См.: 🔗1Пет. 1:23 🔗1Ин. 5:18 | Всяк рожденный от Бога греха не творит, яко семя Его в нем пребывает: и не может согрешати, яко от Бога рожден есть. |
3:10 | Сего ради явлена суть чада Божия и чада диаволя: всяк не творяй правды несть от Бога, и не любяй брата своего. |
3:11 | Яко се есть завещание, еже слышасте исперва, да любим друг друга, |
3:12 | не якоже Каин от лукаваго бе и закла брата своего. И за кую вину закла его? Яко дела его лукава беша, а брата его праведна. |
3:13 См.: 🔗Ин. 15:18 | Не чудитеся, братие моя, аще ненавидит вас мир. |
3:14 См.: 🔗Лев. 19:17 🔗Еф. 2:5 | Мы вемы, яко преидохом от смерти в живот, яко любим братию: не любяй бо брата пребывает в смерти. |
3:15 | Всяк ненавидяй брата своего человекоубийца есть: и весте, яко всяк человекоубийца не имать живота вечнаго в себе пребывающа. |
3:16 | О сем познахом любовь, яко Он по нас душу Свою положи: и мы должни есмы по братии душы полагати. |
3:17 | Иже убо имать богатство мира сего, и видит брата своего требующа, и затворит утробу свою от него, како любы Божия пребывает в нем? |
3:18 | Чадца моя, не любим словом ниже языком, но делом и истиною. |
3:19 См.: 🔗Ин. 18:37 | И о сем разумеем, яко от истины есмы, и пред Ним смиряем сердца наша: |
3:20 | зане аще зазирает нам сердце наше, яко болий есть Бог сердца нашего и весть вся. |
3:21 См.: 🔗1Ин. 2:28 🔗Евр. 10:22 | Возлюбленнии, аще сердце наше не зазрит нам, дерзновение имамы к Богу, |
3:22 | и егоже аще просим, приемлем от Него, яко заповеди Его соблюдаем и угодная пред Ним творим. |
3:23 | И сия есть заповедь Его, да веруем во имя Сына Его Иисуса Христа и любим друг друга, якоже дал есть заповедь нам. |
3:24 См.: 🔗Ин. 14:23 | И соблюдаяй заповеди Его в Нем пребывает, и Той в нем. И о сем разумеем, яко пребывает в нас, от духа, егоже дал есть нам. |