Книга Левит, глава 23

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 23
23:1	И рече Господь к Моисею, глаголя:
23:2	глаголи сыном Израилевым и речеши к ним: праздницы Господни, яже наречете нарочитыя святыя, сии суть праздницы Мои:
23:3 См.: 🔗Исх. 20:9 🔗Втор. 5:13 🔗Евр. 4:4	в шесть дний да сотвориши дела, и в день седмый суббота, покой нареченный свят Господви, всякаго дела да не сотворите: суббота есть Господви во всем обитании вашем.
23:4	Сии праздницы Господу наречены святи, яже наречете сия во времена их:
23:5 См.: 🔗Исх. 12:18 🔗Чис. 28:16	в первем месяце в четвертыйнадесять день месяца, между вечерними, Пасха Господу:
23:6	и в пятыйнадесять день месяца перваго праздник опресноков Господу: седмь дний опресноки да ясте.
23:7	И день первый наречен свят будет вам: всякаго дела работня не сотворите:
23:8 См.: 🔗Втор. 16:8	и да принесете всесожжения Господу седмь дний, и день седмый наречен свят будет вам: всякаго дела работня не сотворите.
23:9	И рече Господь к Моисею, глаголя:
23:10 См.: 🔗1Кор. 15:20 🔗Кол. 1:18	глаголи сыном Израилевым и речеши к ним: егда внидете в землю, юже Аз даю вам, и пожнете жатву ея, и принесете снопы начаток жатвы вашея к жерцу,
23:11 См.: 🔗Исх. 29:28	и вознесет сноп пред Господа приятен вам: на утрие перваго дне субботы да вознесет его жрец.
23:12	И сотворите в день, в оньже аще принесете сноп, овча непорочно единолетно во всесожжение Господу:
23:13 См.: 🔗Лев. 2:1 🔗Исх. 16:36	и жертву его две десятины муки пшеничны спряжены в елеи: жертва Господу, в воню благовония Господу: и возлияние его вина четвертую часть ина.
23:14 См.: 🔗Лев. 2:14	И хлеба, и пряженых класов новых да не снесте, даже до того дне самаго, дондеже принесете вы дары Богу вашему: законно вечно в роды ваша во всем населении вашем.
23:15 См.: 🔗Втор. 16:9 🔗Исх. 35:21	И сочтите себе от наутрия суббот, от дне, в оньже аще принесете снопы возложения, седмь седмиц целых
23:16 См.: 🔗Чис. 28:26	даже до наутрия последния седмицы да сочтете пятьдесят дний, и да принесете жертву нову Господу.
23:17	От вселения вашего да принесете хлебы возложение, два хлеба: от двух десятин муки пшеничны да будут, квашены да испекутся от первых плодов Господу:
23:18	и да принесете со хлебами седмь агнцев непорочных единолетных, и телца единаго от стад, и овна два непорочна: и будут во всесожжение Господу, и жертвы их, и возлияния их, жертва воня благовония Господу.
23:19	И сотворите козла от коз единаго о гресе, и два агнца единолетна в жертву спасения с хлебами первых жит.
23:20	И да возложит я жрец с хлебами первых жит, возложение пред Господем со обема агнцы: свята будут Господу, жерцу иже приносит я, тому да будут.
23:21 См.: 🔗Чис. 28:26	И прозовете сей день, нарочит свят будет вам: всякаго дела работня не сотворите в онь: законно вечно в роды вашя во всем населении вашем.
23:22 См.: 🔗Лев. 19:9 🔗Втор. 24:19	И егда жнете жатву земли вашея, не потребите останка жатвы нивы своея, егда жнете, и от падающих от жатвы вашея да не собереши: нищему и пришелцу оставиши я: Аз Господь Бог ваш.
23:23	И рече Господь к Моисею, глаголя:
23:24 См.: 🔗3Цар. 8:2 🔗Чис. 29:1 🔗Пс. 80:4	рцы сыном Израилевым, глаголя: месяца седмаго, в первый день месяца, да будет вам покой, память труб: наречен свят будет вам:
23:25	всякаго дела работня не сотворите, и принесете всесожжение Господу.
23:26	И рече Господь к Моисею, глаголя:
23:27 См.: 🔗Лев. 16:29	и в десятый день седмаго месяца сего день очищения, наречен свят да будет вам: и смирите душы вашя, и принесите всесожжение Господу:
23:28	всякаго дела не сотворите в самый день сей: есть бо день очищения сей вам, Їмолити о вас пред Господем Богом вашим:
23:29	всяка бо душа, яже не покорится в день той, потребится от людий своих:
23:30	и всяка душа, яже сотворит дело в самый день сей, погибнет душа та от людий своих:
23:31	всякаго дела не сотворите, законно вечно в роды вашя, во всех селениих ваших.
23:32 См.: 🔗Лев. 16:31	Субботы суббот будут вам: и смирите душы вашя, от девятаго дне месяца от вечера, даже до десятаго дне месяца, до вечера, субботствуйте субботы вашя.
23:33	И рече Господь к Моисею, глаголя:
23:34 См.: 🔗Ин. 7:2	рцы сыном Израилевым, глаголя: в пятыйнадесять день месяца седмаго сего, праздник кущей седмь дний Господу:
23:35	и день первый наречен свят будет: всякаго дела работня не сотворите:
23:36 См.: 🔗Чис. 29:35 🔗Неем. 8:18 🔗Ин. 7:37	седмь дний да принесете всесожжения Господу: и день осмый наречен свят будет вам, и принесете всесожжения Господу: исходное есть, всякаго дела работня не сотворите.
23:37 См.: 🔗Чис. 29:2	Сии праздницы Господни, яже наречете нарочиты святы, еже приносити приносы Господу: всесожжения и жертвы их, и возлияния их от дне до дне,
23:38	кроме суббот Господних и кроме даров ваших, и кроме всех обетов ваших и кроме благовольных ваших, яже аще дадите Господу.
23:39	И в пятыйнадесять день месяца седмаго сего, егда скончаете жита земли, празднуйте Господу седмь дний: в день первый покой, и в день осмый покой:
23:40 См.: 🔗Неем. 8:14 🔗Мф. 21:8 🔗Пс. 117:24	и да возмете себе в день первый плод древа красен, и ветвь финическую, и ветви древа частыя, и вербы, и агновы ветви от потока, и возвеселитеся пред Господем Богом вашим седмь дний в лето:
23:41	законно вечно в роды вашя, в месяц седмый празднуйте его:
23:42	в кущах да пребудете седмь дний: всяк туземец во Израили да пребудет в кущах:
23:43	яко да уведят роды вашя, яко в кущах вселих сыны Израилевы, внегда извести мне их из земли Египетския: Аз Господь Бог ваш.
23:44	И поведа Моисей праздники Господни сыном Израилевым.