Книга пророка Захарии, глава 2

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 2
2:1 См.: 🔗Иез. 40:3 🔗Отк. 21:15	И возведох очи мои и видех, и се, муж, и в руце его уже землемерно.
2:2	И рех к нему: камо грядеши ты? И рече ко мне: размерити Иерусалима, еже видети, колика широта его есть и колика долгота.
2:3	И се, Ангел глаголяй во мне стояше, и ин Ангел исхождаше во сретение ему
2:4 См.: 🔗Ис. 60:11 🔗Рим. 8:31 🔗Отк. 21:24	и рече к нему глаголя: тецы и рцы к юноши оному глаголя: плодовито населится Иерусалим от множества человеков и скотов, иже посреде его:
2:5	и Аз буду ему, глаголет Господь, стена огнена окрест и в славу буду посреде его.
2:6 См.: 🔗Ис. 52:11 🔗Иер. 51:45 🔗Отк. 18:4	О, о, бежите от земли северныя, глаголет Господь, зане от четырех ветров небесных соберу вы, глаголет Господь:
2:7	в Сион спасайтеся, живущии во дщери Вавилонстей.
2:8 См.: 🔗Втор. 32:10 🔗Пс. 16:8	Зане сице глаголет Господь Вседержитель: вслед славы посла Мя на языки пленившыя вас, зане касаяйся вас яко касаяйся в зеницу ока Его:
2:9	зане, се, Аз наношу руку Мою на ня, и будут корысть работающым им, и уразумеете, яко Господь Вседержитель посла Мя.
2:10 См.: 🔗Ис. 12:6 🔗Иез. 37:27	Красуйся и веселися, дщи Сионя, зане, се, Аз гряду и вселюся посреде тебе, глаголет Господь.
2:11 См.: 🔗Ис. 11:10 🔗Соф. 2:11	И прибегнут языцы мнози ко Господу в той день и будут Ему в люди и вселятся посреде тебе, и уразумееши, яко Господь Вседержитель посла Мя к тебе.
2:12 См.: 🔗Зах. 1:17 🔗Зах. 3:2	И наследит Господь Иуду, участие Свое на земли святей, и изберет еще Иерусалима.
2:13 См.: 🔗Авв. 2:20 🔗Соф. 1:7	Да благоговеет всяка плоть от лица Господня, яко воста из облак святых Своих.