Псалтирь, псалом 106

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Псаломъ 106
106:1 См.: 🔗Иудиф. 16:1	Исповедайтеся Господеви, яко благ, яко в век милость Его.
106:2 См.: 🔗Пс. 105:10	Да рекут избавленнии Господем, ихже избави из руки врага,
106:3	и от стран собра их, от восток и запад, и севера и моря:
106:4 См.: 🔗Евр. 11:9 🔗Евр. 13:14	заблудиша в пустыни безводней, пути града обителнаго не обретоша:
106:5	алчуще и жаждуще, душа их в них изчезе.
106:6 См.: 🔗Пс. 21:6	И воззваша ко Господу, внегда скорбети им, и от нужд их избави я:
106:7	и настави я на путь прав, внити во град обителный.
106:8	Да исповедятся Господеви милости Его и чудеса Его сыновом человеческим:
106:9 См.: 🔗Пс. 33:11 🔗Пс. 144:16	яко насытил есть душу тщу, и душу алчущу исполни благ:
106:10 См.: 🔗Иов. 36:8	седящыя во тме и сени смертней, окованныя нищетою и железом,
106:11	яко преогорчиша словеса Божия, и совет Вышняго раздражиша.
106:12 См.: 🔗4Цар. 14:26	И смирися в трудех сердце их, и изнемогоша, и не бе помагаяй.
106:13	И воззваша ко Господу, внегда скорбети им, и от нужд их спасе я:
106:14	и изведе я из тмы и сени смертныя, и узы их растерза.
106:15	Да исповедятся Господеви милости Его и чудеса Его сыновом человеческим:
106:16 См.: 🔗Пс. 115:7 🔗Ис. 45:2 🔗Наум. 1:13	яко сокруши врата медная, и вереи железныя сломи.
106:17	Восприят я от пути беззакония их: беззаконий бо ради своих смиришася.
106:18 См.: 🔗Иов. 33:20	Всякаго брашна возгнушася душа их, и приближишася до врат смертных.
106:19	И воззваша ко Господу, внегда скорбети им, и от нужд их спасе я:
106:20 См.: 🔗Прем. 16:12	посла слово Свое, и изцели я, и избави я от растлений их.
106:21	Да исповедятся Господеви милости Его и чудеса Его сыновом человеческим:
106:22 См.: 🔗Пс. 49:14 🔗Пс. 115:8	и да пожрут Ему жертву хвалы и да возвестят дела Его в радости.
106:23	Сходящии в море в кораблех, творящии делания в водах многих,
106:24 См.: 🔗Сир. 43:26	тии видеша дела Господня и чудеса Его во глубине.
106:25 См.: 🔗Ион. 1:4 🔗Мф. 8:24	Рече, и ста дух бурен, и вознесошася волны его:
106:26	восходят до небес и низходят до бездн: душа их в злых таяше:
106:27 См.: 🔗Ис. 29:14 🔗Иез. 7:26	смятошася, подвигошася яко пияный, и вся мудрость их поглощена бысть.
106:28	И воззваша ко Господу, внегда скорбети им, и от нужд их изведе я:
106:29 См.: 🔗Мф. 14:32	и повеле бури, и ста в тишину, и умолкоша волны его.
106:30	И возвеселишася, яко умолкоша, и настави я в пристанище хотения Своего.
106:31	Да исповедятся Господеви милости Его и чудеса Его сыновом человеческим:
106:32	да вознесут Его в церкви людстей, и на седалищи старец восхвалят Его.
106:33	Положил есть реки в пустыню и исходища водная в жажду,
106:34 См.: 🔗3Цар. 17:1 🔗Иоил. 1:10	землю плодоносную в сланость, от злобы живущих на ней.
106:35 См.: 🔗Ис. 41:18	Положил есть пустыню во езера водная и землю безводную во исходища водная.
106:36	И насели тамо алчущыя, и составиша грады обителны:
106:37	и насеяша села, и насадиша винограды, и сотвориша плод житен.
106:38	И благослови я, и умножишася зело: и скоты их не умали.
106:39 См.: 🔗Пс. 43:26	И умалишася и озлобишася от скорби зол и болезни:
106:40 См.: 🔗Иов. 12:21	излияся уничижение на князи их, и облазни я по непроходней, а не по пути.
106:41 См.: 🔗1Цар. 2:8	И поможе убогу от нищеты и положи яко овцы отечествия.
106:42 См.: 🔗Иов. 5:16 🔗Иов. 22:19	Узрят правии и возвеселятся, и всякое беззаконие заградит уста своя.
106:43 См.: 🔗Втор. 32:29 🔗Иер. 9:12	Кто премудр и сохранит сия? И уразумеют милости Господни.