Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 2 | |
2:1 См.: 🔗Ис. 21:8 | На стражи моей стану, и взыду на камень, и посмотрю еже видети, что возглаголет во мне и что отвещаю на обличение мое. |
2:2 См.: 🔗Ис. 8:1 | И отвеща Господь ко мне и рече: впиши видение, и яве на дске, яко да постигнет читаяй я. |
2:3 См.: 🔗Евр. 10:37 | Зане еще видение на время, и просияет в конец, а не вотще: аще умедлит, потерпи ему, яко идый приидет и не умедлит. |
2:4 | Аще усумнится, не благоволит душа моя в нем: праведник же (мой) от веры жив будет. |
2:5 См.: 🔗Прит. 30:15 | Презорливый же и обидливый муж и величавый ничесоже скончает: иже разшири аки ад душу свою, и сей яко смерть ненасыщен: и соберет к себе вся языки и приимет к себе вся люди. |
2:6 См.: 🔗1Тим. 6:9 | Не сия ли вся на него притчу приимут и гадание в повесть его? И рекут: горе умножающему себе не сущая его, доколе? И отягчающему узу свою тяжце. |
2:7 | Яко внезапу востанут угрызающии его, и ободрятся наветницы твои, и будеши в разграбление им. |
2:8 См.: 🔗Ис. 33:1 | Понеже ты пленил еси страны многи, пленят тя вси оставшии людие крове ради человечи и нечестия земли и града и всех живущих на ней. |
2:9 См.: 🔗Иер. 22:13 | Горе лихоимствующым лихоимство злое дому своему, еже учинити на высоте гнездо свое, еже исторгнути от руки злых. |
2:10 | Умыслил еси стыдение дому своему, скончал еси люди многи, и согреши душа твоя. |
2:11 См.: 🔗Лк. 19:40 | Зане камень из стены возопиет, и хрущь от древа возглаголет сия: |
2:12 См.: 🔗Иез. 24:9 🔗Наум. 3:1 | у, люте созидающему град кровьми и уготовляющему град неправдами. |
2:13 | Не сия ли суть от Господа Вседержителя? И оскудеша людие мнози огнем, и языцы мнози изнемогоша: |
2:14 См.: 🔗Ис. 11:9 | яко наполнится вся земля ведения славы Господни, якоже вода многа в мори покрыет я. |
2:15 | Горе напаяющему подруга своего развращением мутным, и упоявающему, яко да взирает к пещерам их. |
2:16 См.: 🔗Иер. 25:27 | Сытость безчестия от славы испий и ты: сердце, поколеблися и сотряснися: обыде о тебе чаша десницы Господни, и собрася безчестие на главу твою. |
2:17 | Занеже нечестие Ливаново покрыет тя, и страсть зверей престрашит тя, крове ради человечи и нечестия земли и града и всех живущих на ней. |
2:18 См.: 🔗Иер. 10:8 | Что пользует изваяное, яко изваяша е? Создаша слияние, мечтание ложное, яко упова создавый на создание свое, сотворити кумиры немыя. |
2:19 См.: 🔗Ос. 4:12 🔗Пс. 113:12 | У, люте глаголющему ко древу: ободрися, востани: и камению: возвысися: и то есть мечтание, и сие есть скование злата и сребра, и всякаго духа несть в нем. |
2:20 См.: 🔗Пс. 10:4 | Господь же во храме святем Своем: да убоится от лица Его вся земля. |