Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 35 | |
35:1 См.: 🔗Быт. 28:13 | Рече же Бог ко Иакову: востав взыди на место Вефиль, и живи тамо, и сотвори тамо жертвенник Богу явльшемуся тебе, егда бежал еси от лица Исава брата твоего. |
35:2 | Рече же Иаков дому своему и всем иже с ним: поверзите боги чуждыя, иже с вами, от среды вас и очиститеся, и измените ризы своя: |
35:3 | и воставше взыдем в Вефиль и сотворим тамо жертвенник Богу послушавшему мене в день скорбения, Иже бе со мною и спасе мя на пути, в оньже ходих. |
35:4 См.: 🔗Нав. 24:26 🔗Суд. 9:6 | И вдаша Иакову боги чуждыя, иже бяху в руках их, и усерязи яже во ушесех их: и скры я Иаков под теревинфом иже в Сикимех: И погуби я до днешняго дне. |
35:5 См.: 🔗Исх. 23:27 🔗1Цар. 14:15 | И воздвижеся Израиль от Сикимов, и бысть страх Божий на градех, иже окрест их: и не гнаша вслед сынов Израилевых. |
35:6 См.: 🔗Быт. 12:8 🔗Быт. 28:19 | Прииде же Иаков в Лузу, яже есть в земли Ханаанстей, яже есть Вефиль, сам и вси людие, иже бяху с ним, |
35:7 См.: 🔗Быт. 28:13 | и созда тамо жертвенник, и прозва имя месту тому Вефиль: тамо бо явися ему Бог, егда бежаше он от лица Исава брата своего. |
35:8 См.: 🔗1Пар. 10:12 | Умре же Девора, доилица Ревеккина, и погребоша ю ниже Вефиля под дубом, и прозва имя ему дуб плача. |
35:9 | Явися же Бог Иакову еще в Лузе, егда прииде от Месопотамии Сирския, и благослови его Бог |
35:10 См.: 🔗Быт. 32:28 | и рече ему Бог: имя твое не прозовется ктому Иаков, но Израиль будет имя тебе. И нарече имя ему Израиль. |
35:11 См.: 🔗Быт. 1:28 🔗Быт. 17:1 | Рече же ему Бог: Аз Бог твой: расти и множися: языцы и собрания языков будут от тебе, и царие из чресл твоих изыдут: |
35:12 См.: 🔗Быт. 12:7 | и землю, юже дах Аврааму и Исааку, тебе дах ю, тебе будет, и семени твоему по тебе дам землю сию. |
35:13 См.: 🔗Быт. 17:22 | Взыде же Бог от него от места, идеже глагола с ним: |
35:14 См.: 🔗Быт. 28:18 | и постави Иаков столп на месте, идеже глагола с ним Бог, столп каменный, и пожре на нем жертву и возлия на него елей: |
35:15 См.: 🔗Быт. 28:19 | и прозва Иаков имя месту тому, идеже глагола с ним Бог, Вефиль. |
35:16 | (Востав же (Иаков) от Вефиля, и постави кущу свою далее столпа Гадер.) бысть же егда приближися к хаврафе приити до земли Ефрафа, роди Рахиль и возбедствова в рождении: |
35:17 См.: 🔗1Цар. 4:20 | бысть же внегда жестоко ей родити, рече ей баба: дерзай, ибо сей тебе есть сын. |
35:18 | Бысть же егда оставляше ю душа, умираше бо, прозва имя ему Сын Болезни моея: отец же прозва имя ему Вениамин. |
35:19 См.: 🔗Быт. 48:7 | Умре же Рахиль, и погребоша ю на пути ипподрома Ефрафы: сия есть Вифлеем: |
35:20 См.: 🔗1Мак. 13:27 🔗1Цар. 10:2 | и постави Иаков столп на гробе ея: сей есть столп над гробом Рахилиным даже до дне сего. |
35:21 См.: 🔗Мих. 4:8 | Изыде же оттуду Израиль и постави кущу свою за столпом Гадер. |
35:22 См.: 🔗Быт. 49:4 | Бысть же егда вселися Израиль в земли той, иде Рувим и спа с Валлою, наложницею отца своего Иакова. И слыша Израиль, и зло явися пред ним. Беша же сынове Иаковли дванадесять. |
35:23 См.: 🔗Быт. 46:8 🔗Исх. 1:2 | Сынове Лиины: Рувим, первенец Иаковль, Симеон, Левий, Иуда, Иссахар, Завулон. |
35:24 См.: 🔗Быт. 30:23 | Сынове же Рахилины: Иосиф и Вениамин. |
35:25 См.: 🔗Быт. 30:5 | Сынове же Валлы, рабы Рахилины: Дан и Неффалим. |
35:26 См.: 🔗Быт. 30:9 | Сынове же Зелфы, рабы Лиины: Гад и Асир. Сии сынове Иаковли, иже родишася ему в Месопотамии Сирстей. |
35:27 См.: 🔗Быт. 23:2 🔗Быт. 14:13 | Прииде же Иаков ко Исааку отцу своему (еще живу сущу ему) в Мамврию, во Град Польный: сей есть Хеврон в земли Ханаанстей, идеже обита Авраам и Исаак. |
35:28 | Быша же дние Исааковы, яже поживе, сто осмьдесят лет: |
35:29 См.: 🔗Быт. 25:9 | и ослабев Исаак умре, и приложися к роду своему стар исполнь дний: и погребоста его Исав и Иаков, сынове его. |