Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 44 | |
44:1 См.: 🔗Ис. 43:10 | Ныне же слыши, рабе Мой Иакове, и Израилю, егоже избрах. |
44:2 См.: 🔗Иер. 30:10 🔗Иер. 46:27 | Сице глаголет Господь Бог сотворивый тя и создавый тя из утробы: еще поможет ти: не бойся, рабе Мой Иакове, и возлюбленный Израилю, егоже избрах. |
44:3 | Яко Аз дам воду в жажду ходящым в безводней, наложу дух Мой на семя твое и благословения Моя на чада твоя, |
44:4 См.: 🔗Пс. 1:3 | и прозябнут аки трава посреде воды и яко верба при воде текущей. |
44:5 См.: 🔗Ам. 9:12 🔗Отк. 3:12 | Сей речет: Божий есмь: и сей возопиет о имени Иаковли, и другий напишет рукою своею: Божий есмь: и о имени Израилеве возопиет. |
44:6 | Сице глаголет Бог Царь Израилев, и Избавлей его Бог Саваоф: Аз первый и Аз по сих, кроме Мене несть Бога: |
44:7 | кто якоже Аз? Да станет и да призовет, и да возвестит и да уготовит Ми, отнележе сотворих человека во век, и грядущая прежде неже приити им, да возвестят вам. |
44:8 См.: 🔗Втор. 4:35 🔗Ис. 45:5 | Не укрывайтеся, ниже заблуждайте: не исперва ли внушисте, и возвестих вам? Свидетелие вы есте, аще есть Бог разве Мене. |
44:9 | И не послушаша тогда созидающии, и ваяющии вси тщетни, творящии желания своя, яже не упользуют их: |
44:10 См.: 🔗Ис. 2:8 🔗Ис. 45:16 | но посрамятся вси созидающии бога и ваяющии вси неполезная. |
44:11 | И вси, отнюдуже быша, изсхоша: и глусии от человек да соберутся вси и да станут вкупе, и да посрамятся и устыдятся вкупе. |
44:12 См.: 🔗Ис. 40:19 🔗Ис. 41:6 | Яко наостри древоделатель сечиво, теслою содела оное, и свердлом состави е, и длатом издолбе е, и содела е крепостию мышцы своея: и взалчет, и изнеможет, и не напиется воды. |
44:13 См.: 🔗Прем. 13:11 🔗Иер. 10:3 | И избрав древоделя древо, постави в меру, и клеем сострои е, и сотвори е аки образ мужеск и аки красоту человечу, поставити е в дому. |
44:14 | Посече древо в дубраве, еже насади Господь, сосну, и дождь возрасти, |
44:15 | да будет человеком на жжение: и взяв от него, согреся, и изжегше я, испекоша ими хлебы, из оставшаго же сотвориша боги и покланяются им: сотвори е изваянное, и прекланяется им. |
44:16 | Пол его сожже огнем, и пол его сожже на углие, и испече в них хлебы, и на них испече мясо, и яде, и насытися, и согревся рече: сладко мне, яко согрехся и видех огнь. |
44:17 См.: 🔗Ис. 42:17 | Из оставшаго же сотвори бога изваянна, прекланяется ему и покланяется, и молится ему глаголя: избави мя, яко бог мой еси ты. |
44:18 См.: 🔗Лк. 10:21 | Не уведаша смыслити, яко отемнеша очи их еже видети и разумети сердцем своим. |
44:19 | И не помысли в души своей, ни уведе смышлением, яко пол его сожже огнем, и испече на углиех его хлебы, и испек мяса снеде, и оставшее его в мерзость сотвори, и покланяются ему. |
44:20 | Увеждь, яко пепел есть сердце их, и прельщаются, и ни един может души своея избавити: видите, не рцыте, яко лжа в деснице моей. |
44:21 | Помяни сия, Иакове и Израилю, яко раб Мой еси ты, сотворих тя раба Моего, и ты, Израилю, не забывай Мене. |
44:22 См.: 🔗Ис. 43:25 | Се бо, отях яко облак беззакония твоя и яко примрак грехи твоя: обратися ко Мне, и избавлю тя. |
44:23 См.: 🔗Ис. 49:13 🔗Иез. 6:3 | Возвеселитеся, небеса, яко помилова Бог Израиля: вострубите, основания земная, возопийте, горы, веселие, холми и вся древеса, яже на них: яко избави Бог Иакова, и Израиль прославится. |
44:24 | Сице глаголет Господь избавляяй тя и создавый тя от чрева: Аз Господь совершаяй вся, распрострох небо един и утвердих землю. |
44:25 См.: 🔗Иов. 5:12 🔗1Кор. 1:19 | Кто ин разсыплет знамения чревоволшебников и волшбы от сердца, отвращаяй мудрыя вспять и советы их обуяяй, |
44:26 См.: 🔗Ис. 14:32 🔗Иер. 31:4 | и уставляя глагол раба Своего, и совет вестников Своих истинен творяй? Глаголяй Иерусалиму: населишися: и градом Иудейским: возградитеся, и пустыни его просияют, |
44:27 См.: 🔗Исх. 14:21 🔗Нав. 3:16 | глаголяй бездне: опустееши, и реки твоя изсушу, |
44:28 | глаголяй Киру смыслити, и вся воли Моя сотворит: глаголяй Иерусалиму: возградишися, и храм святый мой осную. |