Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 8 | |
8:1 | И рече Господь ко Иисусу: не бойся, ниже ужасайся: поими с собою вся мужы воинския, и востав взыди в Гай: се, предах в руце твои царя Гайска и землю его, и люди его и град его: |
8:2 См.: 🔗Нав. 6:20 🔗Суд. 20:29 | и да сотвориши Гаю и царю его, якоже сотворил еси Иерихону и царю его: и плен его и скоты его да плениши себе: устрой же себе подсаду граду за собою. |
8:3 | И воста Иисус и вси мужие воинстии, да внидут в Гай: и избра Иисус тридесять тысящ мужей воинских сильных крепостию и посла их нощию, |
8:4 См.: 🔗2Пар. 13:13 | и заповеда им, глаголя: вы скрыйтеся за градом: не далече будите от града зело, и будите вси готови: |
8:5 См.: 🔗Нав. 7:4 | аз же и вси людие иже со мною приступим ко граду: и будет егда изыдут живущии в Гаи в сретение нам, якоже и прежде, и побегнем от лица их: |
8:6 См.: 🔗Нав. 7:4 | и егда изыдут вслед нас, отторгнем их от града: и рекут: бежат сии от лица нашего, якоже и прежде: |
8:7 | вы же востанете от подсады, и пойдете во град, и предаст его Господь Бог наш в руце ваши: |
8:8 | и будет егда возмете град, запалите его огнем, по словеси сему сотворите: се, заповедаю вам. |
8:9 | И посла их Иисус, и идоша в подсаду: и седоша между Вефилем и между Гаием, от моря Гаиа. |
8:10 См.: 🔗Нав. 6:12 🔗Нав. 7:16 | И востав Иисус заутра, согляда люди: и взыде сам и старцы Израилтестии пред людьми в Гай. |
8:11 | И вси людие воинстии с ним взыдоша, и идуще приидоша сопротив града от востоков: и подсады града от моря. |
8:12 | И ополчишася от севера Гаиа, и (бысть) дебрь между ими и между Гаием. И взя яко пять тысящ мужей, и положи их на подсаду между Вефилем и Гаием от запада Гаиа. |
8:13 | И поставиша людие весь полк от севера града, а прочая его от моря града. И пойде Иисус в нощь ону посреде дебри. |
8:14 | И бысть егда увиде царь Гайский, потщася, и воста рано и изыде в сретение им прямо на брань, сам и вси людие его с ним во время, пред лицем подсады: он же не ведяше, яко подсада ему есть за градом (его). |
8:15 | И увиде, и отиде Иисус и весь люд от лица их, и побеже путем пустыни, |
8:16 | и укрепися весь люд гнати вслед их, и погнаша вслед сынов Израилевых, и отступиша от града. |
8:17 | (И) не остася никтоже в Гаи и Вефили, иже не погна вслед Израиля: и оставиша град отверст, и гнаша вслед Израиля. |
8:18 | И рече Господь ко Иисусу: простри руку твою с копием, еже в руце твоей, на град, зане в руку твою предах его: и подсады востанут вскоре от места своего. И простре Иисус руку свою и с копием на град. |
8:19 | И подсады восташа скоро от места своего: и изыдоша, егда простре руку, и внидоша во град, и взяша его: и потщавшеся запалиша град огнем. |
8:20 | И озревшеся обитатели Гайстии вспять себе, узреша дым восходящь от града до небесе, и ктому не имеша камо побегнути, семо или овамо: людие же бегущии в пустыню обратишася на гонящих. |
8:21 | Иисус же и весь Израиль увидеша, яко взяша подсады град, и яко восходит дым градный до небесе: и обратившеся избиша мужей Гайских. |
8:22 См.: 🔗Чис. 21:35 🔗Втор. 7:2 | И сии изыдоша из града противу им, и быша посреде полка Израилева, сии отсюду и сии отюнуду: и избиша их, дондеже не остася ни един от них цел, ни убежа. |
8:23 | И царя Гайска яша жива, и приведоша его ко Иисусу. |
8:24 | И бысть егда престаша сынове Израилевы секуще всех сущих в Гаи и сущих на полях и на горе исхода, идеже гониша их, и падоша вси острием меча на ней до конца: и обратися Иисус в Гай и посече их мечем. |
8:25 | И быша вси падшии в той день от мужеска полу и до женска дванадесять тысящ, вси живущии в Гаи. |
8:26 См.: 🔗Исх. 17:9 | Иисус же не обрати руки своея, юже простре с копием, дондеже прокля всех обитающих в Гаи. |
8:27 | Кроме скотов (их) и имения, яже во граде онем, вся плениша себе сынове Израилевы по повелению Господню, якоже повеле Господь Иисусу. |
8:28 | И запали град Иисус огнем: землю необитаему во век положи его даже до сего дне. |
8:29 См.: 🔗Втор. 21:23 🔗2Цар. 18:17 | И царя Гайска повеси на древе сугубем: и бяше на древе до вечера: и заходящу солнцу повеле Иисус, и сняша тело его с древа, и повергоша и в ров пред враты града: и насыпа над ним громаду велику камения даже до сего дне. |
8:30 | Тогда созда Иисус олтарь Господу Богу Израилеву на горе Гевал, |
8:31 См.: 🔗Исх. 20:25 🔗Втор. 27:5 | якоже заповеда Моисей раб Господень сыном Израилевым, и якоже написася в законе Моисеове, олтарь от камений всецелых, на нихже не возложися железо: и вознесе тамо всесожжения Господу и жертву спасения. |
8:32 См.: 🔗Втор. 17:18 🔗Втор. 27:3 | И написа Иисус на камениих вторый закон, закон Моисеов, егоже написа пред сыны Израилевыми. |
8:33 | И весь Израиль, и старцы их и судии их и книгочия их предходяху сюду и сюду пред кивотом, и жерцы и левити воздвизаша кивот завета Господня, пришелец же и туземец: иже быша половина их близ горы Гаризин, и половина их близ горы Гевал, якоже заповеда Моисей раб Господень благословити людий Израилевых в первых. |
8:34 См.: 🔗Втор. 28:1 | И по сих тако прочте Иисус вся словеса закона сего, благословения и клятвы, по всему написанному в законе Моисеове. |
8:35 См.: 🔗Втор. 31:11 | Не бяше словесе от всех, яже заповеда Моисей Иисусу, егоже не прочте Иисус во уши всего сонма сынов Израилевых, мужем и женам, и детем и пришелцем приходящым ко Израилю. |