Книга Левит, глава 19

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 19
19:1	И рече Господь к Моисею, глаголя:
19:2 См.: 🔗Лев. 11:44 🔗1Пет. 1:15	глаголи всему сонму сынов Израилевых, и речеши к ним: святи будите, якоже Аз свят (есмь) Господь Бог ваш.
19:3 См.: 🔗Исх. 20:12 🔗Сир. 3:6 🔗Исх. 20:8	Вийждо отца своего и матере своея да боится, и субботы Моя сохраните: Аз Господь Бог ваш.
19:4 См.: 🔗Исх. 20:4	Не последуйте идолом, и богов слияных не сотворите себе: Аз Господь Бог ваш.
19:5 См.: 🔗Лев. 3:1	И аще пожрете жертву спасения Господу, приятну вам пожрите:
19:6 См.: 🔗Лев. 7:16	в оньже день аще пожрете, (в той день) да снестся, и на утрие: и аще останется до третияго дне, на огни да сожжется:
19:7 См.: 🔗Лев. 7:18	аще же ли ядением сястся в день третий, не жертвенно есть, не приимется:
19:8 См.: 🔗Быт. 17:14	и иже яст е, грех приимет, яко святая Господня оскверни: и потребятся душы ядущыя от людий своих.
19:9 См.: 🔗Лев. 23:22 🔗Втор. 24:19	И пожинающым вам жатву земли вашея, да не скончаете жатвы вашея, нивы твоея пожинания: и падающих клас от жатвы твоея да не собереши:
19:10	и винограда твоего вторицею да не обереши, ниже грезн винограда твоего да собереши: нищему и пришелцу да оставиши я: Аз есмь Господь Бог ваш.
19:11 См.: 🔗Исх. 20:15	Не украдите, ни солжите, ниже да оклеветает кийждо ближняго.
19:12 См.: 🔗Исх. 20:7 🔗Втор. 5:11 🔗Мф. 5:33	И не кленитеся именем Моим в неправде, и да не оскверните имене святаго Бога вашего: Аз Господь Бог ваш.
19:13 См.: 🔗Сир. 10:6 🔗Втор. 24:14 🔗Тов. 4:14 🔗Сир. 34:22	Да не обидиши ближняго: и да не отимеши, и да не прележит мзда наемника твоего у тебе до утрия.
19:14	Зла да не речеши глухому, и пред слепым да не положиши претыкания: и да убоишися Господа Бога твоего: Аз Господь Бог ваш.
19:15 См.: 🔗Втор. 1:17 🔗Втор. 16:19 🔗Сир. 42:1 🔗Прит. 24:23 🔗Иак. 2:1	Не сотворите неправды в суде: да не приимеши лица нищаго, ниже почудишися лицу могущаго: по правде да судиши ближнему твоему.
19:16	Да не ходиши лестию во своем языце, и не востанеши на кровь ближняго твоего: Аз Господь Бог ваш.
19:17 См.: 🔗1Ин. 2:11 🔗1Ин. 3:15 🔗Мф. 18:15 🔗Лк. 17:3	Да не возненавидиши брата твоего во уме твоем, обличением да обличиши ближняго твоего: и не приимеши ради его греха.
19:18 См.: 🔗Мф. 5:43 🔗Мф. 22:39 🔗Мк. 12:31 🔗Рим. 13:9 🔗Гал. 5:14 🔗Иак. 2:8	И да не отмщает рука твоя, и да не враждуеши на сыны людий своих, и возлюбиши ближняго своего яко сам себе: Аз Господь Бог ваш.
19:19	Закон Мой сохраните: и скота твоего да не смесиши со скотом инаго рода, и винограда твоего да не насадиши различна: и ризы из двух (вещей) сотканыя гнусныя да не возложиши на ся.
19:20	И аще кто будет с женою ложем семене, и сия бяше раба хранима мужу, и ценою не искуплена или свобода не дана ей, наказаны да будут: не умрут, яко не свободися:
19:21	и да приведет за преступление свое Господу к дверем скинии свидения овна преступления,
19:22 См.: 🔗Лев. 4:26 🔗Лев. 5:13	и да помолится о нем жрец овном преступления пред Господем о гресе имже согреши, и оставится ему грех, егоже сотвори.
19:23 См.: 🔗Втор. 20:6	Егда же внидете в землю, юже Господь Бог ваш дает вам, и насадите всяко древо снедное, и очистите нечистоту его, плод его три лета нечист да будет вам, да не снестся:
19:24 См.: 🔗Неем. 10:35	в лето же четвертое будет всяк плод его свят, похвален Господу:
19:25	в лето же пятое да снесте плод его, прибыток вам плоды его: Аз Господь Бог ваш.
19:26 См.: 🔗Втор. 18:10 🔗4Цар. 21:6	Не ядите на горах, и не вражите, и ни сряща смотрите от птиц.
19:27	Не сотворите обстрижения кругом от влас глав ваших, ниже бриете брад ваших.
19:28 См.: 🔗Втор. 14:1 🔗3Цар. 18:28	И кроения не сотворите на теле вашем о души: и язв настреканных да не сотворите в вас: Аз Господь Бог ваш.
19:29 См.: 🔗Сир. 26:13	Да не оскверниши дщере твоея еже блудити ей: и да не прелюбы деет земля, и наполнится земля беззаконий.
19:30 См.: 🔗Лев. 23:2	Субботы Моя сохраните, и от святых Моих убойтеся: Аз Господь.
19:31 См.: 🔗Лев. 20:6 🔗Втор. 18:11 🔗Ис. 8:19	Не последуйте утробным баснем, и к волхвом не прилепитеся, осквернитися в них: Аз Господь Бог ваш.
19:32 См.: 🔗Сир. 8:7	Пред лицем седаго востани и почти лице старчо, и да убоишися Господа Бога твоего: Аз Господь Бог ваш.
19:33 См.: 🔗Исх. 22:21	Аще же кто приидет к вам пришлец в землю вашу, не стужите ему:
19:34	якоже туземец будет в вас пришлец, иже приидет к вам, и возлюбиши его яко сам себе: яко (и вы) пришелцы бесте в земли Египетстей: Аз Господь Бог ваш.
19:35	Не сотворите неправды в суде, в мерах и в весах и в мерилех:
19:36 См.: 🔗Втор. 25:13 🔗Прит. 11:1 🔗Иез. 45:10	мерила праведна и весы праведны и мера праведна да будет в вас: Аз есмь Господь Бог ваш, изведый вас от земли Египетския.
19:37 См.: 🔗Лев. 18:30 🔗Втор. 7:12	И сохраните весь закон Мой и вся повеления Моя, и сотворите я: Аз Господь Бог ваш.