Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 3 | |
3:1 См.: 🔗Еф. 5:22 🔗Кол. 3:18 | Такожде же и жены, повинующяся своим мужем, да и аще нецыи не повинуются слову, женским житием без слова пленени будут, |
3:2 | видевше еже со страхом чисто житие ваше. |
3:3 См.: 🔗1Тим. 2:9 | Умже да будет не внешняя, плетения влас и обложения злата, или одеяния риз, лепота, |
3:4 | но потаеный сердца человек, в неистлении кроткаго и молчаливаго духа, еже есть пред Богом многоценно. |
3:5 | Тако бо иногда и святыя жены, уповающыя на Бога, украшаху себе, повинующяся своим мужем: |
3:6 См.: 🔗Быт. 18:12 | якоже Сарра послушаше Авраама, господина того зовущи: еяже бысте чада, благотворящя и не боящяся ни единаго страха. |
3:7 См.: 🔗1Кор. 7:3 🔗Гал. 3:28 | Мужие такожде, вкупе живуще со своими женами по разуму, яко немощнейшу сосуду женскому воздающе честь, яко и снаследницы благодатныя жизни, во еже не прекращатися молитвам вашым. |
3:8 См.: 🔗Рим. 15:5 | Конец же, вси единомудрени будите, милостиви, братолюбцы, милосердни, благоутробни, мудролюбцы, смиреномудри: |
3:9 | не воздающе зла за зло, или досаждения за досаждение: супротивное же, благословяще, ведяще, яко на се звани бысте, да благословение наследите. |
3:10 См.: 🔗Пс. 33:13 | Хотяй бо живот любити и видети дни благи, да удержит язык свой от зла, и устне свои еже не глаголати льсти. |
3:11 См.: 🔗Ис. 1:16 | Да уклонится от зла, и да сотворит благо, да взыщет мира и да держится его: |
3:12 | зане очи Господни на праведныя, и ушы Его в молитву их, лице же Господне на творящыя злая, еже потребити их от земли. |
3:13 | И кто озлобит вас, аще благому подобницы будете? |
3:14 | Но аще и страждете правды ради, блажени есте: страха же их не убойтеся, ниже смущайтеся. |
3:15 См.: 🔗Кол. 4:6 | Господа же Бога освятите в сердцах ваших: готови же присно ко ответу всякому вопрошающему вы словесе о вашем уповании, с кротостию и страхом: |
3:16 См.: 🔗1Пет. 2:12 | совесть имуще благу, да о немже клевещут вас аки злодеев, постыдятся злословящии ваше благое о Христе житие. |
3:17 См.: 🔗1Пет. 4:15 | Лучше бо есть благое творящым, аще хощет воля Божия, пострадати, нежели зло творящым: |
3:18 См.: 🔗Рим. 5:6 🔗Евр. 9:28 | зане и Христос единою о гресех наших пострада, праведник за неправедники, да приведет ны Богови, умерщвлен убо быв плотию, ожив же духом: |
3:19 См.: 🔗Кол. 2:15 | о немже и сущым в темнице духовом сошед проповеда, |
3:20 | противльшымся иногда, егда ожидаше Божие долготерпение, во дни Ноевы, делаему ковчегу, в немже мало, сиречь осмь душ, спасошася от воды. |
3:21 | Егоже воображение ныне и нас спасает крещение, не плотския отложение скверны, но совести благи вопрошение у Бога, воскресением Иисус Христовым, |
3:22 См.: 🔗Мф. 28:18 🔗Еф. 1:20 | Иже есть о десную Бога, возшед на небо, покоршымся Ему Ангелом и Властем и Силам. |