Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 23 | |
23:1 | Тогда Иисус глагола к народом и учеником Своим, |
23:2 | глаголя: на Моисеове седалищи седоша книжницы и фарисее: |
23:3 | вся убо, елика аще рекут вам блюсти, соблюдайте и творите: по делом же их не творите: глаголют бо, и не творят: |
23:4 См.: 🔗Лк. 11:46 🔗Деян. 15:10 | связуют бо бремена тяжка и бедне носима, и возлагают на плеща человеческа, перстом же своим не хотят двигнути их. |
23:5 См.: 🔗Чис. 15:38 🔗Втор. 22:12 | Вся же дела своя творят, да видими будут человеки: разширяют же хранилища своя и величают воскрилия риз своих: |
23:6 | любят же преждевозлегания на вечерях, и преждеседания на сонмищих, |
23:7 | и целования на торжищих, и зватися от человек: учителю, учителю. |
23:8 См.: 🔗Иак. 3:1 🔗1Кор. 3:4 | Вы же не нарицайтеся учителие: един бо есть ваш Учитель, Христос: вси же вы братия есте: |
23:9 См.: 🔗Мал. 1:6 | и отца не зовите себе на земли: един бо есть Отец ваш, Иже на небесех: |
23:10 | ниже нарицайтеся наставницы: един бо есть Наставник ваш, Христос. |
23:11 | Болий же в вас да будет вам слуга: |
23:12 См.: 🔗Лк. 14:11 | иже бо вознесется, смирится: и смиряяйся вознесется. |
23:13 См.: 🔗Иез. 22:26 🔗Лк. 11:52 | Горе вам, книжницы и фарисее, лицемери, яко затворяете Царствие Небесное пред человеки: вы бо не входите, ни входящих оставляете внити. |
23:14 См.: 🔗Мк. 12:40 🔗Лк. 20:47 | Горе вам, книжницы и фарисее, лицемери, яко снедаете домы вдовиц, и виною далече молитвы творяще: сего ради лишшее приимете осуждение. |
23:15 | Горе вам, книжницы и фарисее, лицемери, яко преходите море и сушу, сотворити единаго пришелца: и егда будет, творите его сына геенны сугубейша вас. |
23:16 | Горе вам, вожди слепии, глаголющии: иже аще кленется церковию, ничесоже есть: а иже кленется златом церковным, должен есть. |
23:17 | Буи и слепии, что бо более есть, злато ли, или церковь, святящая злато? |
23:18 | И: иже аще кленется олтарем, ничесоже есть: а иже кленется даром, иже верху его, должен есть. |
23:19 См.: 🔗Исх. 29:37 | Буи и слепии, что бо более, дар ли, или олтарь, святяй дар? |
23:20 | Иже убо кленется олтарем, кленется им и сущим верху его: |
23:21 См.: 🔗2Пар. 6:2 🔗Пс. 25:8 | и иже кленется церковию, кленется ею и Живущим в ней: |
23:22 | и кленыйся небесем кленется Престолом Божиим и Седящим на нем. |
23:23 | Горе вам, книжницы и фарисее, лицемери, яко одесятствуете мятву и копр и кимин, и остависте вящшая закона, суд и милость и веру: сия (же) подобаше творити, и онех не оставляти. |
23:24 | Вожди слепии, оцеждающии комары, велблуды же пожирающе. |
23:25 | Горе вам, книжницы и фарисее лицемери, яко очищаете внешнее сткляницы и блюда, внутрьуду же суть полни хищения и неправды: |
23:26 | фарисее слепый, очисти прежде внутреннее сткляницы и блюда, да будет и внешнее има чисто. |
23:27 См.: 🔗Лк. 11:44 🔗Деян. 23:3 | Горе вам, книжницы и фарисее, лицемери, яко подобитеся гробом повапленым, иже внеуду убо являются красны, внутрьуду же полни суть костей мертвых и всякия нечистоты: |
23:28 | тако и вы, внеуду убо являетеся человеком праведни, внутрьуду же есте полни лицемерия и беззакония. |
23:29 | Горе вам, книжницы и фарисее, лицемери, яко зиждете гробы пророческия, и красите раки праведных, |
23:30 | и глаголете: аще быхом были во дни отец наших, не быхом убо общницы им были в крови пророк: |
23:31 | темже сами свидетелствуете себе, яко сынове есте избивших пророки: |
23:32 | и вы исполните меру отец ваших. |
23:33 См.: 🔗Мф. 3:7 | Змия, порождения ехиднова, како убежите от суда (огня) геенскаго? |
23:34 См.: 🔗2Пар. 36:15 🔗Лк. 11:49 | Сего ради, се, Аз послю к вам пророки и премудры и книжники: и от них убиете и распнете, и от них биете на сонмищих ваших, и изженете от града во град: |
23:35 | яко да приидет на вы всяка кровь праведна, проливаемая на земли, от крове Авеля праведнаго до крове Захарии сына Варахиина, егоже убисте между церковию и олтарем. |
23:36 | Аминь глаголю вам: (яко) приидут вся сия на род сей. |
23:37 См.: 🔗Втор. 32:11 🔗Лк. 13:34 | Иерусалиме, Иерусалиме, избивый пророки и камением побиваяй посланныя к тебе, колькраты восхотех собрати чада твоя, якоже собирает кокош птенцы своя под криле, и не восхотесте? |
23:38 См.: 🔗Лк. 13:35 | Се, оставляется вам дом ваш пуст. |
23:39 См.: 🔗Пс. 117:26 🔗Мф. 21:9 | Глаголю бо вам: (яко) не имате Мене видети отселе, дондеже речете: благословен Грядый во имя Господне. |