Третья книга Царств (Первая книга Царей), глава 10

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 10
10:1 См.: 🔗2Пар. 9:1 🔗Мф. 12:42 🔗Лк. 11:31	И царица Савска услыша имя Соломоне и имя Господне, и прииде искусити его притчами:
10:2	и прииде во Иерусалим с силою тяжкою зело: и на велблюдех привезоша ароматы и злата много зело, и камение драгое: и вниде к Соломону и глагола ему вся, елика име на сердцы своем.
10:3 См.: 🔗2Пар. 9:2	И возвести ей Соломон вся глаголы ея: и не бе слово презрено от царя, егоже не возвести ей.
10:4 См.: 🔗2Пар. 9:3	И виде царица Савска весь смысл Соломонь и дом егоже созда,
10:5	и снеди Соломони, и жилища отроков его, и предстояние служащих ему, и облачение его, и виночерпцы его, и всесожжения его, яже приношаше во храме Господни, и вне себе бысть,
10:6 См.: 🔗2Пар. 9:5	и рече к Соломону царю: истинна суть словеса, яже слышах в земли моей,
10:7	о словесех твоих и о смысле твоем: и не ях веры глаголющым ми, дондеже приидох семо, и видеста очи мои: и се, несть ни пол того, якоже ми поведаша: приложил еси премудрость и благая к сим паче всякаго слуха, егоже слышах в земли моей:
10:8 См.: 🔗2Пар. 9:7 🔗Лк. 2:47 🔗Отк. 7:15	блаженны жены твоя, блажени отроцы твои сии, иже предстоят пред тобою всегда, слышаще всякий смысл твой:
10:9	буди Господь Бог твой благословен, иже восхоте тя дати на престол Израилев, понеже возлюби Господь Израиля утвердити во веки и постави тя царя над ними творити суд в правде и в судбах их.
10:10 См.: 🔗2Пар. 9:9	И даде Соломону сто и двадесять талант злата, и ароматы многи зело, и камение драгое: не приидоша еще таковыя ароматы во множестве, яже даде царица Савска царю Соломону.
10:11	И корабль Хирамль приносящь злато из Софира, (и) принесе древа нетесана многа зело, и камение драгое.
10:12 См.: 🔗Еккл. 2:8	И сотвори царь древом нетесаным подпоры храму Господню и дому цареву, и сопели и гусли певцем: не приидоша по сем таковая древеса нетесаная на земли, ниже видена быша где даже до дне сего.
10:13 См.: 🔗2Пар. 9:12	И царь Соломон даде царице Савстей вся, елика восхоте и елики проси у него, кроме всех, яже даде ей рукама своима Соломон царь, и возвратися, и отиде в землю свою, сама и вси отроцы ея.
10:14 См.: 🔗2Пар. 9:13	И бе вес принесеннаго злата Соломону во едино лето шесть сот и шестьдесят и шесть талант злата,
10:15	кроме даней от подданных и от купцов и от всех царей странных и от воевод земных.
10:16 См.: 🔗3Цар. 14:26	И сотвори царь Соломон триста копий златых кованных, по триста златых во едино копие вдела:
10:17 См.: 🔗Иер. 46:3	и триста щитов кованных златых, по три литры злата бяше на коемждо щите: и даде я царь во храм дубравы Ливанския.
10:18 См.: 🔗2Пар. 9:17	И сотвори царь престол от костей слоновых велий и позлати его златом искушеным:
10:19	шесть степеней престолу, и образы телцов престолу созади, и верх престола кругл бе созади его, и руце сюду и сюду на престоле седалища, и два льва стояща при руках,
10:20	и дванадесять львы стояще ту на шести степенех сюду и сюду: не бяше тако во всяком царстве.
10:21 См.: 🔗2Пар. 9:20	И вси сосуди, иже бяху при царе Соломоне, злати беша, и умывалницы златы и вси сосуди в храме дубравы Ливанския златокованны: не бяше сребра, понеже за ничто бе сребро во дни Соломони:
10:22 См.: 🔗3Цар. 9:27 🔗2Пар. 9:21	корабль бо Фарсийский царю Соломону на мори с корабли Хирамлими, единою во триех летех прихождаше цареви корабль из Фарсиса и приношаше злато и сребро, и зубы слоновы, и пифики и павы, и камение точеное и тесаное.
10:23 См.: 🔗3Цар. 3:12 🔗2Пар. 1:1 🔗2Пар. 9:22	И возвеличися Соломон паче всех царей земных и богатством и смыслом.
10:24	И вси царие земстии искаху видети лице Соломона, еже бы услышати смысла его, егоже даде ему Господь в сердцы его:
10:25	и тии приношаху кийждо дары своя, и сосуды златы и сребряны, и ризы, стакти и сладкости, и кони и мски на всякое лето.
10:26 См.: 🔗2Пар. 1:14	И собра Соломон колесницы и кони, и бяху Соломону четыредесять тысящ кобылиц в колесницы, и дванадесять тысящ конных: и постави я во градех колесниц, а (друзии бяху) у царя во Иерусалиме: и бе властелин всем царем от реки и до земли иноплеменник и до предел Египта.
10:27 См.: 🔗2Пар. 1:15	И сложи царь злато и сребро во Иерусалиме якоже камение, и кедры сложи якоже черничие, еже на поли во множестве.
10:28 См.: 🔗Втор. 17:16 🔗2Пар. 1:16	И привождаху Соломону кони от Египта и от Фекуя купцы царстии и куповаху от Фекуя променою.
10:29	И прихождаху колесницы из Египта за шесть сот сребреник, и конь за сто пятьдесят сребреник: такожде и ко всем царем Хеттимским и Сирийским по морю исхождаху.