Книга пророка Иеремии, глава 12

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 12
12:1 См.: 🔗Иов. 21:7 🔗Пс. 72:3 🔗Авв. 1:13	Праведен еси, Господи, яко отвещаю к Тебе: обаче судбы возглаголю к Тебе: что, яко путь нечестивых спеется, угобзишася вси творящии беззакония?
12:2	Насадил еси их, и укоренишася, чада сотвориша и сотвориша плод: близ еси Ты уст их, далече же от утроб их.
12:3 См.: 🔗Пс. 16:3	И Ты, Господи, разумееши мя, видел мя еси и искусил еси сердце мое пред Тобою: собери их яко овцы на заколение и очисти их в день заколения их.
12:4 См.: 🔗Иер. 4:25 🔗Иер. 14:6 🔗Иер. 23:10	Доколе плакати имать земля, и трава вся селная изсхнет от злобы живущих на ней? Погибоша скоти и птицы, яко рекоша: не узрит Бог путий наших.
12:5	Нозе твои текут и разслабляют тя: како уготовишися с коньми? И в земли мира твоего уповал еси, како сотвориши в шуме Иорданстем?
12:6 См.: 🔗Иер. 9:4 🔗Мк. 14:68	Понеже и братия твоя и дом отца твоего, и сии отвергошася тебе и тии возопиша, созади тебе собрашася: не веруй им, егда глаголати будут тебе благая.
12:7 См.: 🔗Мф. 23:38	Оставих дом Мой, оставих достояние Мое, дах возлюбленную душу Мою в руки врагов ея:
12:8 См.: 🔗Пс. 78:1	бысть Мне достояние Мое яко лев в дубраве, даде противу Мене глас свой: сего ради возненавидех е.
12:9 См.: 🔗Плч. 3:52 🔗Отк. 9:17	Не вертеп ли иенин достояние Мое Мне, или пещера окрест его? Идите, соберите вся звери селныя, и да приидут снести е.
12:10 См.: 🔗Иер. 6:3	Пастырие мнози растлиша виноград Мой, оскверниша часть Мою, даша часть желаемую Мою в пустыню непроходную,
12:11	положиша в потребление пагубы: Мене ради разорением разорена есть вся земля, яко ни един есть, иже размышляет сердцем.
12:12	Во всякий путь пустыни приидоша опустошающии, яко мечь Господень пояст от края земли даже до края ея: несть мира всяцей плоти.
12:13 См.: 🔗Лев. 26:16 🔗Втор. 28:38 🔗Мих. 6:15 🔗Аг. 1:6	Посеясте пшеницу, а терние пожасте: достояния их не полезна будут им: постыдитеся стыдением от похваления вашего, от поношения пред Господем.
12:14 См.: 🔗Иер. 32:37	Яко сия глаголет Господь о всех соседех лукавых, прикасающихся наследию Моему, еже разделих людем Моим Израилю: се, Аз исторгну их от земли их и дом Иудин извергну от среды их:
12:15	и будет, егда исторгну их, обращуся и помилую их, и вселю их когождо в достояние свое и когождо в землю свою:
12:16 См.: 🔗Втор. 6:13 🔗Втор. 10:20 🔗Иер. 4:2	и будет, аще учащеся научатся путем людий Моих, еже клятися именем Моим, жив Господь, якоже научиша людий Моих клятися Ваалом, и созиждутся посреде людий Моих:
12:17 См.: 🔗Ис. 60:12	аще же не послушают, исторгну язык оный исторганием и погублением, рече Господь.