Книга пророка Исаии, глава 54

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 54
54:1 См.: 🔗Лк. 23:29 🔗Гал. 4:27	Возвеселися, неплоды, нераждающая возгласи и возопий, нечревоболевшая, яко многа чада пустыя паче, нежели имущия мужа.
54:2	Рече бо Господь: разшири место, кущи твоея и покровов твоих, водрузи, не пощади, продолжи ужя твоя и колие твое укрепи,
54:3 См.: 🔗Быт. 9:27	еще на десно и на лево простри: и семя твое языки наследит, и грады опустевшыя населиши.
54:4 См.: 🔗Зах. 8:15	Не бойся, яко посрамлена еси, ниже устыдися, яко укорена еси: понеже срамоту вечную забудеши и укоризны вдовства твоего не помянеши ктому.
54:5 См.: 🔗Лк. 1:31	Яко Господь Творяй тя, Господь Саваоф имя Ему: и Избавивый тя Святый Бог Израилев, всей земли прозовется.
54:6 См.: 🔗Ис. 62:4	Не яко жену оставлену и малодушну призва тя Господь, ниже яко жену из юности возненавидену, рече Бог твой.
54:7 См.: 🔗Прем. 3:5	На время мало оставих тя, а с милостию великою помилую тя:
54:8 См.: 🔗Ис. 26:20	во ярости мале отвратих лице Мое от тебе, но милостию вечною помилую тя, рече Избавивый тя Господь.
54:9 См.: 🔗Быт. 9:11	От воды, яже при Нои, сие Ми есть, якоже кляхся Ему во время оно на землю, не разгневатися о тебе ктому, ниже во прещении твоем
54:10 См.: 🔗Иер. 31:31 🔗Авв. 3:6 🔗Иез. 34:25	горы преставити, и холми твои не предвигнутся: тако ниже, яже от Мене к тебе, милость оскудеет, ниже завет мира твоего преставится: рече бо милостив к тебе Господь.
54:11	Смиренная и колеблемая не имела еси утешения: се, Аз уготовляю тебе анфракс камень твой и на основание твое сапфир:
54:12 См.: 🔗Отк. 21:12	и положу забрала твоя иаспис, и врата твоя камение кристалла, и ограждение твое камение избранное,
54:13 См.: 🔗Иер. 31:34 🔗Ин. 6:45 🔗Евр. 8:11 🔗Рим. 5:1	и вся сыны твоя научены Богом, и во мнозе мире чада твоя.
54:14	И правдою возградишися: удалися от неправеднаго, и не убоишися, и трепет не приближится тебе.
54:15	Се, пришелцы приидут к тебе Мною и вселятся у тебе и к тебе прибегнут.
54:16	Се, Аз создах тя, не якоже кузнец раздуваяй углие и износя сосуд на дело: Аз же создах тя не на пагубу, еже истлити.
54:17 См.: 🔗Лк. 21:15 🔗Деян. 6:10	Всяк сосуд соделан на тя не благопоспешу, и всяк глас, иже на тя востанет на прю, одолееши им всем: повиннии же твои будут в нем есть наследие служащым Господеви, и вы будете Мне праведни, глаголет Господь.