Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 3 | |
3:1 См.: 🔗Нав. 6:12 🔗Чис. 25:1 | И воста заутра Иисус, и воздвигошася из Саттина, и приидоша до Иордана той и вси сынове Израилевы, и сташа тамо прежде неже прейти. |
3:2 | И бысть по триех днех, проидоша книгочия чрез полк, |
3:3 | и заповедаша людем, глаголюще: егда узрите кивот завета Господа Бога нашего, и жерцы нашя, и левиты воздвизающыя его, да воздвигнетеся и вы от мест ваших и пойдете вслед его: |
3:4 | но подалее да будет между вами и оным, елико две тысящы лакот станете: не приближитеся к нему, да увесте путь, по немуже пойдете: не ходисте бо путем тем ни вчера, ни третияго дне. |
3:5 См.: 🔗Исх. 19:10 🔗Лев. 20:7 | И рече Иисус к людем: очиститеся наутрие, яко заутра сотворит в вас Господь чудная. |
3:6 См.: 🔗Чис. 4:15 | И рече Иисус к жерцем: воздвигните кивот завета Господня и предидите пред людьми. И взяша жерцы кивот завета Господня и идоша пред людьми. |
3:7 См.: 🔗Нав. 4:14 | И рече Господь ко Иисусу: в сей день начинаю возвышати тя пред всеми сынми Израилевыми, да уведят, якоже бех с Моисеом, тако буду и с тобою: |
3:8 | и ныне заповеждь жерцем воздвизающым кивот завета, глаголя: егда внидете на часть воды Иордана, и во Иордане станете. |
3:9 | И рече Иисус сыном Израилевым: приступите семо, и слышите слово Господа Бога вашего: |
3:10 | в сих увесте, яко Господь живяй в вас и потребляяй потребит от лица вашего Хананеа и Хеттеа, и Ферезеа и Евеа, и Гергесеа и Аморреа и Иевусеа: |
3:11 См.: 🔗Деян. 7:45 🔗Пс. 8:2 | се, кивот завета Господа всея земли преходит Иордан: |
3:12 | изберите себе дванадесять мужей от сынов Израилевых, единаго от коегождо племене, |
3:13 См.: 🔗Пс. 113:3 | и будет егда почиют нози жерцев воздвизающих кивот завета Господа всея земли в воде Иордана, вода Иорданова оскудеет, вода же низтекущая станет. |
3:14 См.: 🔗Деян. 7:45 | И бысть егда воздвигнушася людие от кущ своих прейти Иордан, жерцы же воздвигоша кивот завета Господня пред людьми: |
3:15 См.: 🔗1Пар. 12:15 🔗Сир. 24:28 | егда же внидоша жерцы воздвижуще кивот завета Господня во Иордан, и нози жерцев воздвизающих кивот завета Господня омочишася в части воды Иордана, Иордан же наполняшеся во вся краи своя, якоже во дни жатвы пшеницы: |
3:16 См.: 🔗Исх. 14:21 🔗Авв. 3:9 | и сташа воды текущыя свыше, ста огустение едино отлучившееся далече зело зело от Адами града даже до страны Кариафиарима: низтекущая же низтече в море Аравско, в море Сланое, дондеже до конца оскуде. |
3:17 | И людие стояху прямо Иерихону. И сташа жерцы воздвизающии кивот завета Господня на сусе посреде Иордана: и вси сынове Израилевы прехождаху по суху, дондеже скончаша вси людие преходяще Иордан. |