Второзаконие, глава 19

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 19
19:1	Егда же погубит Господь Бог твой языки, ихже Господь Бог твой дает тебе землю, и наследиши их и вселишися во градех их и в домех их,
19:2 См.: 🔗Исх. 21:13 🔗Чис. 35:10 🔗Втор. 4:41 🔗Нав. 20:2	три грады да отлучиши себе среди земли твоея, юже Господь Бог твой дает тебе в наследие.
19:3	Уготови себе путь, и на трое раздели пределы земли твоея, юже разделяет тебе Господь Бог твой: и да будет убежище тамо всякому убийце.
19:4 См.: 🔗Чис. 35:22	Сие же да будет заповедание убийце, иже аще убежит тамо, и жив будет: иже аще убиет ближняго своего не ведя, и сей не ненавиде его прежде вчерашняго дне и третияго,
19:5	и иже аще пойдет с подругом своим в лес собирати дрова, и поползнется рука его с секирою секущаго дрова, и спадши секира с топорища улучит подруга его, и умрет, сей да убежит во един от градов сих, и жив да будет:
19:6 См.: 🔗Чис. 35:12	да не погнав ужик крове вслед убившаго, яко разгорится сердце ему, и постигнет его, аще должайший будет путь, и убиет душу его, и умрет: и сему несть суд смертный, понеже не бе ненавидя его прежде вчерашняго и третияго дне:
19:7 См.: 🔗Нав. 20:7	сего ради заповедаю аз тебе слово сие, глаголя: три грады да отлучиши себе.
19:8 См.: 🔗Быт. 28:14 🔗Втор. 12:20	Аще же разширит Господь Бог твой пределы твоя, якоже клятся отцем твоим, и даст тебе Господь всю землю, юже рече дати отцем твоим,
19:9 См.: 🔗Нав. 20:8	аще послушаеши творити вся заповеди сия, яже аз заповедаю тебе днесь, любити Господа Бога твоего, ходити во всех путех Его вся дни: и да приложиши себе еще три грады к сим трием градом,
19:10	и да не пролиется кровь безвинна в земли твоей, юже Господь Бог твой дает тебе в жребий, и да не будет в тебе крови повинен.
19:11 См.: 🔗Чис. 35:20	Аще же будет у тебе человек ненавидяй ближняго своего, и навет сотворит нань, и востанет нань, и поразит душу его, и умрет, и вбегнет во един от градов сих,
19:12 См.: 🔗Чис. 35:19 🔗2Цар. 14:7	да послют старейшины града того, и возмут его оттуду, и да предадят его в руце ужиков крове, и да умрет:
19:13 См.: 🔗Втор. 13:8 🔗3Цар. 2:31	да не пощадит его око твое, и да очистиши кровь неповинную от Израиля, и благо будет тебе.
19:14 См.: 🔗Втор. 27:17 🔗Прит. 22:28 🔗Ос. 5:10	Да не предвижеши пределов ближняго своего, яже поставиша отцы твои в наследии твоем, еже наследовал еси в земли, юже Господь Бог твой дает тебе во жребий.
19:15 См.: 🔗Чис. 35:30 🔗Втор. 17:6 🔗Мф. 18:16 🔗Ин. 8:17 🔗2Кор. 13:1 🔗Евр. 10:28	Да не пребудет свидетель един во свидетелство на человека по всякой обиде и по всякому преступлению и по всякому греху, имже аще согрешит: при устех двою свидетелей и при устех триех свидетелей да станет всяк глагол.
19:16	Аще же востанет свидетель неправеден на человека, глаголя на него нечестие,
19:17 См.: 🔗Втор. 17:9	да станут оба человека, имже есть пря, пред Господем и пред жерцы и пред судиями, иже будут в тыя дни,
19:18	и да испытают их судии прилежно, и се, свидетель неправеден свидетелствова неправду, воста на брата своего:
19:19 См.: 🔗Прит. 19:5 🔗1Кор. 5:13	да сотворите ему, якоже и он умысли сотворити супротив брата своего, и измите злое от вас самех:
19:20 См.: 🔗Втор. 13:11 🔗Втор. 17:13	да и прочии услышавше убоятся, и не приложат ктому творити словесе злаго сего в вас:
19:21 См.: 🔗Исх. 21:24 🔗Лев. 24:20 🔗Мф. 5:38	да не пощадит его око твое: душу за душу, око за око, зуб за зуб, руку за руку, ногу за ногу, якоже аще кто даст порок на ближняго своего, сице воздастся ему.