Второзаконие, глава 25

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 25
25:1 См.: 🔗Прит. 17:15	Аще же будет пря между человеки, и приидут на суд, и да судят, и оправдят праваго, и осудят нечестиваго:
25:2	и будет, аще достоин есть ран нечестивый, да поставиши его пред судиями, и да биют его пред ними по нечестию его:
25:3 См.: 🔗2Кор. 11:24	и числом четыредесять ран да наложат ему, и да не приложат к сему: аще же приложат паче ран сих бити его множае, срам будет брату твоему пред тобою.
25:4 См.: 🔗1Кор. 9:9 🔗1Тим. 5:18 🔗Сир. 7:24	Да не обротиши вола молотяща.
25:5 См.: 🔗Мф. 22:24 🔗Мк. 12:19 🔗Лк. 20:28	Аше же живут братия вкупе, и умрет един от них, семене же не будет ему, да не будет жена умершаго иному мужу несродну: брат мужа ея да внидет к ней и поймет ю себе в жену, и да поживет с нею:
25:6	и будет очроча, еже аще родится, да поставится во имя умершаго, и не погибнет имя его от Израиля.
25:7 См.: 🔗Руф. 4:4	Аще же не восхощет человек пояти жены брата своего, да приидет жена ко вратом пред старейшины и речет: не хощет брат мужа моего возставити имя брата своего во Израили, не восхоте брат мужа моего:
25:8	и да призовут его старейшины града того и рекут ему, и став речет: не хощу пояти ю:
25:9 См.: 🔗Руф. 4:7	и приступивши жена брата его к нему пред старейшины, и изует сапог его един от ноги его, и да плюнет на лице его, и отвещавши речет: сице да сотворят человеку, иже не созиждет дому брата своего во Израили:
25:10	и прозовется имя его во Израили дом изутаго из сапога.
25:11	Аще же биются человека два вкупе, человек с братом своим, и приступит жена единаго от них отяти мужа своего от руки биющаго и, и простерши руку свою, имет за ятра его,
25:12 См.: 🔗Втор. 13:8	да отсечеши руку ея: да не пощадит око твое ея.
25:13 См.: 🔗Лев. 19:36 🔗Прит. 20:10 🔗Иез. 45:10	Да не будет во влагалищи твоем мерило и мерило, великое и малое,
25:14	да не будет в дому твоем мера и мера, велика и мала:
25:15 См.: 🔗Лев. 19:36 🔗Втор. 4:40	мерило истинно и праведно да будет тебе, и мера истинна и праведна да будет тебе, да многи дни будеши на земли, юже Господь Бог твой дает тебе в жребий,
25:16 См.: 🔗Втор. 17:1	яко мерзость Господеви Богу твоему всяк творяй сия, всяк творяй неправду.
25:17 См.: 🔗Исх. 17:8	Помяни, елика тебе сотвори Амалик на пути, исходящу тебе из Египта:
25:18 См.: 🔗Нав. 10:19	како сопротивоста тебе на пути и посече задний полк твой утружден за тобою: ты же алчен был еси и утружден: и не убояся Бога:
25:19 См.: 🔗1Цар. 15:3 🔗Исх. 17:14	и будет егда упокоит тя Господь Бог твой от всех враг твоих, иже окрест тебе на земли, юже Господь Бог твой дает тебе в жребий, еже наследити ю, да погубиши имя Амаликово от земли, яже под небесем, и да не забудеши.