Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 13 | |
13:1 См.: 🔗Рим. 1:19 | Суетни убо вси человецы естественне, в нихже обретается неведение о Бозе, и от видимых благ не возмогоша уразумети Сущаго, ни делом внемлюще познаша Хитреца: |
13:2 См.: 🔗Втор. 4:19 🔗Деян. 7:42 | но или огнь, или дух, или скор воздух, или круг звездный, или зелную воду, или светила небесная, строители миру боги (быти) возмнеша. |
13:3 См.: 🔗Сир. 43:5 🔗Рим. 1:20 | Ихже аще убо красотою услаждающеся, сия боги возмнеша, да уведят, колико сих Владыка есть лучший: красоты бо Родоначалник созда я. |
13:4 | Аще же силе и действию удивишася, да уразумеют от них, колико сотворивый сия сильнейший есть: |
13:5 См.: 🔗Рим. 1:20 | от величества бо красоты созданий сравнително Рододелатель их познавается. |
13:6 См.: 🔗Деян. 14:17 🔗Деян. 17:27 | Но обаче на сих есть уничижение мало, ибо сами сии негли прельщаются, Бога ищуще и хотяще обрести: |
13:7 См.: 🔗Рим. 1:19 | в делех бо Его живуще изследуют и увещаваются зраком, яко блага видимая. |
13:8 | Паки ниже сии прощения достойни: |
13:9 | аще бо толико возмогоша ведети, да возмогут уразумети век, сих же Владыку како скорее не обретоша? |
13:10 См.: 🔗Деян. 17:29 🔗Рим. 1:23 | Окаянни же суть, и в мертвых упования их, иже назваша боги дела рук человеческих, злато и сребро, хитрости умышление, и подобия животных, или камение неключимо, дело руки древния. |
13:11 См.: 🔗Ис. 44:13 🔗Иер. 10:3 | Аще же кто дровосечец тектон, угодное древо отсек, отешет благохудожне всю кору его, и хитрствуя благолепне сотворит угоден сосуд во употребление жития, |
13:12 | останки же дела на уготование брашна изнурив насытися: |
13:13 | останок же иже от них ни во что благопотребен, древо криво и сучия полно, приим извая с прилежанием праздности своея и искусством разума изобрази его, и уподоби его образу человечу, |
13:14 | или некоему животному ничтожному уподоби его, помазав шарами различными и очервленив вид его, и всяк порок, иже на нем есть, измазав, |
13:15 | и сотворив ему достойное его обитание, на стене постави е, укрепив железом. |
13:16 | Да не убо падет, предумысли о нем, ведый, яко не может помощи себе: ибо идол есть и требует помощи. |
13:17 | О стяжаниих же и о брацех и чадех своих моляся, не стыдится к бездушному глаголя, |
13:18 См.: 🔗Иер. 3:23 🔗1Кор. 8:4 | и о здравии убо немощное призывает, и о животе мертвое молит, и в помощь неключимое призывает, |
13:19 | и о путешествии (просит) ниже ходити могущаго, и о притяжании и деянии и о рук подтверждении некрепкаго руками, мужества просит от того, еже всех есть немощнейшее. |