Книга Исход, глава 6

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 6
6:1 См.: 🔗Исх. 11:1 🔗Исх. 12:33 🔗Исх. 13:3	И рече Господь к Моисею: се, узриши, что сотворю фараону: рукою бо крепкою отпустит их и мышцею высокою изженет их от земли своея.
6:2 См.: 🔗Исх. 15:3	Глагола же Бог к Моисею и рече ему: Аз Господь,
6:3 См.: 🔗Быт. 17:1 🔗Быт. 26:24 🔗Быт. 28:13	и явихся Аврааму, и Исааку, и Иакову, Бог Сый их, и имене Моего Господь не явих им:
6:4	и поставих завет Мой с ними, яко дати им землю Ханаанску, землю пришелствия их, на нейже и обитаху:
6:5 См.: 🔗Исх. 2:24 🔗Лев. 26:42	Аз же услышах стенание сынов Израилевых, имже Египтяне поработиша их, и помянух завет Мой:
6:6	иди, рцы сыном Израилевым глаголя: Аз Господь, и изведу вас от насилия Египетска, и избавлю вас от работы (их), и отиму вас мышцею высокою и судом великим,
6:7 См.: 🔗Быт. 17:7	и прииму вы Себе в люди, и буду вам Бог: и уразумеете, яко Аз Господь Бог ваш, изведый вас от земли Египетския и от насилия Египетска:
6:8 См.: 🔗Иез. 47:14	и введу вас в землю, на нюже прострох руку Мою, дати ю Аврааму и Исааку и Иакову: и дам ю вам в наследие, Аз Господь.
6:9	Глагола же Моисей тако сыном Израилевым, и не послушаша Моисеа от малодушия и от дел жестоких.
6:10	Рече же Господь к Моисею, глаголя:
6:11	вниди, глаголи фараону царю Египетскому, да отпустит сыны Израилевы из земли своея.
6:12 См.: 🔗Исх. 4:10 🔗Ис. 6:5	Рече же Моисей пред Господем глаголя: се, сынове Израилевы не послушаша мене, и како послушает мене фараон? Аз же несловесен есмь.
6:13	Рече же Господь к Моисею и Аарону и завеща им внити к фараону царю Египетскому, да отпустит сыны Израилевы от земли Египетския.
6:14 См.: 🔗Быт. 46:9 🔗Чис. 26:5 🔗1Пар. 5:1	И сии старейшины домов отечеств их: сынове Рувима, первенца Израилева, Енох и Фаллос, Асрон и Харми: сие племя Рувимово.
6:15 См.: 🔗1Пар. 4:24	Сынове же Симеоновы: Иемуил и Иамин, и Аод и Ахин, и Саар и Саул, иже от Финиссины: сия рождения сынов Симеоновых.
6:16 См.: 🔗1Пар. 6:1 🔗1Пар. 23:6 🔗Чис. 3:17 🔗Чис. 26:57	И сия имена сынов Левииных по сродством их: Гирсон, Кааф и Мерари: лет же жития Левиина сто тридесять седмь.
6:17 См.: 🔗Чис. 3:18 🔗1Пар. 6:17 🔗1Пар. 23:7	Сии же сынове Гирсони: Ловени и Семей: домове рождения их.
6:18 См.: 🔗Чис. 3:19	Сынове же Каафовы: Амврам и Иссаар, Хеврон и Озиил: лет же жития Каафова сто тридесять три.
6:19 См.: 🔗Чис. 26:57	Сынове же Мерарины: Мооли и Омуси: сии домове рождения Левиина по сродством их.
6:20 См.: 🔗Исх. 2:1 🔗Чис. 26:59 🔗1Пар. 6:3 🔗1Пар. 23:13 🔗Деян. 7:20 🔗Евр. 11:23	И поя Амврам Иохаведу, дщерь брата отца своего, себе в жену, и роди ему Аарона и Моисеа и Мариамь сестру их: лет же жития Амврамова сто тридесять седмь.
6:21 См.: 🔗Чис. 16:1	Сынове же Иссааровы: Коре и Нафек и Зехри.
6:22 См.: 🔗Лев. 10:4	Сынове же Озииловы: Мисаил и Елисафан и Сегри.
6:23 См.: 🔗Чис. 3:2	Поя же Аарон Елисавету, дщерь Аминадавову, сестру Наассонову, себе в жену, и роди ему Надава и Авиуда, и Елеазара и Ифамара.
6:24 См.: 🔗1Пар. 6:22	Сынове же Кореовы: Асир и Елкана и Авиасар: сия рождения Кореова.
6:25 См.: 🔗Чис. 25:7 🔗1Пар. 6:4	И Елеазар, сын Ааронов, поя от дщерей Футииловых себе в жену, и роди ему Финееса: сия старейшинства отечества левитска по сродством их.
6:26 См.: 🔗Деян. 7:37	Сей Аарон и Моисей, имже рече Бог извести сыны Израилевы из земли Египетския с силою их.
6:27	Сии суть, иже глаголаста к фараону царю Египетскому, еже извести сыны Израилевы от земли Египетския: сей Аарон и Моисей,
6:28	в оньже день глагола Господь к Моисею в земли Египетстей.
6:29	И рече Господь к Моисею глаголя: Аз Господь: глаголи к фараону царю Египетскому, елика Аз глаголю к тебе.
6:30 См.: 🔗Исх. 4:10 🔗Исх. 6:12	И рече Моисей пред Господем: се, аз худогласен есмь, и како послушает мене фараон?