Книга пророка Исаии, глава 66

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 66
66:1 См.: 🔗Деян. 7:49	Тако глаголет Господь: небо престол Мой, земля же подножие ногу Моею: кий дом созиждете Ми, и кое место покоища Моего?
66:2 См.: 🔗Ис. 57:15	Вся бо сия сотвори рука Моя, и сия суть вся Моя, глаголет Господь. И на кого воззрю, токмо на кроткаго и молчаливаго и трепещущаго словес Моих?
66:3 См.: 🔗Ис. 1:11 🔗Мф. 5:24 🔗Втор. 14:8	Беззаконник же жряй ми телца, яко убиваяй пса: и приносяй семидал, яко кровь свиную: даяй ливан в память, аки хулник. И тии избраша пути своя, и мерзости их, яже душа их изволи.
66:4 См.: 🔗Прит. 1:24 🔗Ис. 65:12 🔗Иер. 7:13	И Аз изберу поругания их и грехи их воздам им: яко звах их, и не послушаша Мене, глаголах, и преслушаша и сотвориша злое предо Мною, и яже не хотех избраша.
66:5	Услышите глаголгол Господень, трепещущии словесе Его: рцыте, братия, ненавидящым вас и гнушающымся, да имя Господне прославится и явится во веселии их, и они посрамятся.
66:6 См.: 🔗Отк. 18:6	Глас вопля от града, глас от храма, глас Господа воздающаго воздаяние сопротивящымся.
66:7	Прежде неже чревоболети ей, роди, прежде неже приити труду чревоболения, избеже и породи мужеск пол.
66:8 См.: 🔗Ис. 54:1 🔗Ис. 60:4	Кто слыша сицевое, и кто виде сице? Аще родила земля с болезнию во един день? Или и родися язык весь купно, яко поболе и роди Сион дети своя?
66:9 См.: 🔗Иер. 3:19	Аз же дах чаяние сие, и не помянул еси Мене, рече Господь. Не се ли, Аз родящую и неплодную сотворих? Рече Бог твой.
66:10 См.: 🔗Ис. 61:2 🔗Лк. 6:21	Веселися, Иерусалиме, и торжествуйте в нем, вси любящии его и живущии в нем: радуйтеся вкупе с ним радостию, вси елицы плакасте о нем,
66:11 См.: 🔗Ис. 60:16	да ссете и насытитеся от сосца утешения его, да ссавше насладитеся от входа славы его.
66:12 См.: 🔗Ис. 60:4	Яко сия глаголет Господь: се, Аз укланяю на ня аки реку мира, и аки поток наводняемый славу языков: дети их на рамена взяты будут и на колену утешатся.
66:13	Якоже аще кого мати утешает, тако и Аз утешу вы, и во Иерусалиме утешитеся
66:14 См.: 🔗Ис. 35:10 🔗Ис. 51:11 🔗Ин. 16:22	и узрите, и возрадуется сердце ваше, и кости вашя яко трава прозябнут: и познается рука Господня боящымся Его, и запретит непокаряющымся.
66:15 См.: 🔗Пс. 49:3 🔗2Фес. 1:8	Се бо, Господь яко огнь приидет, и яко буря колесницы Его, воздати яростию отмщение Свое и прещение во пламени огненне:
66:16 См.: 🔗Иер. 25:33 🔗Отк. 19:21	огнем бо Господним судитися будет вся земля, и мечем Его всяка плоть: мнози язвени будут от Господа.
66:17 См.: 🔗Ис. 65:4	Очищающиися и освящающиися во вертоградех и в преддвериих ядущии мясо свиное и мерзости и мышы вкупе погибнут, рече Господь.
66:18 См.: 🔗Отк. 7:9	И Аз дела их и помышление их вем, и гряду собрати вся народы и языки, и приидут и узрят славу Мою:
66:19 См.: 🔗Исх. 19:5 🔗Ис. 65:1	и оставлю на них знамение, и послю от них спасеных во языки, во Фарсис и в Фуд, и в Луд и в Мосох, и в Фовель и во Елладу, и во островы дальния, иже не слышаша имене Моего, ниже видеша славу Мою: и возвестят славу Мою во языцех,
66:20 См.: 🔗Ис. 49:22 🔗Ис. 60:7 🔗Рим. 15:16	и приведут братию вашу от всех язык дар Господеви, с коньми и колесницами и с носилами мсков, под сеньми во святый град Иерусалим, рече Господь, аки бы принесли сынове Израилевы жертвы своя Мне со псалмы в дом Господень:
66:21 См.: 🔗1Пет. 2:9 🔗Отк. 1:6	и от тех поиму себе жерцы и левиты, рече Господь.
66:22 См.: 🔗Ис. 65:17	Якоже бо небо ново и земля нова, яже Аз творю, пребывают предо Мною, глаголет Господь, тако станет семя ваше и имя ваше:
66:23 См.: 🔗Чис. 28:10 🔗Отк. 15:4	и будет месяц от месяца, и суббота от субботы, приидет всяка плоть поклонитися предо Мною во Иерусалим, рече Господь:
66:24 См.: 🔗Мк. 9:44	и изыдут и узрят трупы человеков преступивших Мне: червь бо их не скончается, и огнь их не угаснет, и будут в позор всяцей плоти.