Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 21 | |
21:1 | И Господь посети Сарру, якоже рече: и сотвори Господь Сарре, якоже глагола. |
21:2 См.: 🔗Гал. 4:22 | И заченши Сарра роди Аврааму сына в старости, во время, якоже глагола ему Господь: |
21:3 См.: 🔗Мф. 1:2 | и нарече Авраам имя сыну своему рождшемуся ему, егоже роди ему Сарра, Исаак: |
21:4 См.: 🔗Деян. 7:8 🔗Быт. 17:10 | обреза же Авраам Исаака во осмый день, якоже заповеда ему Бог. |
21:5 | Авраам же бе ста лет, егда бысть ему Исаак сын его. |
21:6 | Рече же Сарра: смех мне сотвори Господь: иже бо аще услышит, обрадуется со Мною. |
21:7 | И рече: кто возвестит Аврааму, яко млеком питает отроча Сарра, яко родих сына в старости моей? |
21:8 | И возрасте отроча, и отдоено бысть: и сотвори Авраам учреждение велие, в оньже день отдоися Исаак сын его. |
21:9 | Видевши же Сарра сына Агари Египтяныни, иже бысть Аврааму, играюща со Исааком сыном своим, |
21:10 См.: 🔗Гал. 4:30 | и рече Аврааму: изжени рабу сию и сына ея: не наследит бо сын рабы сея с сыном моим Исааком. |
21:11 См.: 🔗Быт. 17:18 | Жесток же явися глагол сей зело пред Авраамом о сыне его Исмаиле. |
21:12 См.: 🔗Рим. 9:7 🔗Евр. 11:18 | И рече Бог Аврааму: да не будет жестоко пред тобою о отроце и о рабыни: вся елика аще речет тебе Сарра, слушай гласа ея: яко во Исааце наречется тебе семя: |
21:13 | сына же рабыни сея в язык велик сотворю его, яко семя твое есть. |
21:14 | Воста же Авраам заутра и взя хлебы и мех воды, и даде Агари: и возложи на плещы ея отроча и отпусти ю. Отшедши же заблуждаше в пустыни, у кладязя Клятвеннаго: |
21:15 | оскуде же вода из меха: и поверже отроча под елию единою. |
21:16 | Отшедши же седяше прямо ему издалече, якоже дострелити из лука: рече бо: да не вижду смерти детища моего. И седе прямо ему издалече. Воскричав же отроча, восплакася: |
21:17 | услыша же Бог глас отрочате от места, идеже бяше: и воззва Ангел Божий Агарь с небесе и рече ей: что есть, Агарь? Не бойся: услыша бо Бог глас отрочища от места, идеже есть: |
21:18 См.: 🔗Быт. 17:20 | востани и поими отроча, и ими рукою твоею его: в язык бо велик сотворю его. |
21:19 | И отверзе Бог очи ея, и узре кладязь воды живы: и иде, и налия мех воды, и напои отроча. |
21:20 | И бяше Бог со отрочатем, и возрасте, и вселися в пустыни, и бысть стрелец. |
21:21 См.: 🔗Быт. 14:6 | И поселися в пустыни Фаран: и поят ему мати его жену от земли Египетския. |
21:22 См.: 🔗Быт. 20:2 | Бысть же в то время, и рече Авимелех, и Охозаф невестоводитель его, и Фихол воевода силы его, ко Аврааму, глаголя: Бог с тобою во всех, яже твориши: |
21:23 См.: 🔗Быт. 26:11 | ныне убо кленися ми Богом, не обидети мене, ниже семене моего, ниже имене моего: но по правде, юже сотворих с тобою, сотвориши со мною и земли, идеже ты вселился еси на ней. |
21:24 | И рече Авраам: аз кленуся. |
21:25 См.: 🔗Быт. 26:15 | И обличи Авраам Авимелеха о кладязех водных, яже отяша отроцы Авимелеховы. |
21:26 | И рече ему Авимелех: не ведех, кто сотвори тебе вещь сию: ниже ты ми поведал еси, ниже аз слышах, токмо днесь. |
21:27 | И взя Авраам овцы и юнцы и даде Авимелеху: и завещаста оба завет. |
21:28 | И постави Авраам седмь агниц овчих единых. |
21:29 | И рече Авимелех Аврааму: что суть седмь агницы овец сих, яже поставил еси едины? |
21:30 | И рече Авраам: яко седмь сих агниц возмеши у мене, да будут ми во свидетелство, яко аз ископах кладязь сей. |
21:31 | Сего ради наименова имя месту тому кладязь Клятвенный: яко тамо клястася оба |
21:32 | и завещаста завет у кладязя Клятвеннаго. Воста же Авимелех, и Охозаф невестоводитель его, и Фихол воевода силы его, и возвратишася в землю Филистимску. |
21:33 См.: 🔗Быт. 13:4 🔗Ис. 57:15 | И насади Авраам ниву у кладязя Клятвеннаго, и призва ту имя Господа, Бога вечнаго. |
21:34 | Обита же Авраам в земли Филистимстей дни многи. |