Книга Иова, глава 19

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 19
19:1	Отвещав же Иов, рече:
19:2	доколе притрудну творите душу мою и низлагаете мя словесы? Уразумейте токмо, яко Господь сотвори мя сице.
19:3	Клевещете на мя, не стыдящеся мене належите ми.
19:4 См.: 🔗Рим. 14:12 🔗Гал. 6:5	Буди, яко воистинну аз прельстихся, и у мене водворяется погрешение, глаголати словеса, яже не подобаше, словеса же моя погрешают, и не во время:
19:5	буди же, яко на мя величаетеся, наскакаете же ми поношением:
19:6 См.: 🔗Ос. 7:12	разумейте убо, яко Господь есть иже смяте мя и ограду Свою на мя вознесе.
19:7 См.: 🔗Пс. 68:4 🔗Иер. 20:8	Се, смеюся поношению, не возглаголю: возопию, и нигдеже суд.
19:8 См.: 🔗Плч. 3:7	Окрест огражден есмь и не могу прейти: пред лицем моим тму положи,
19:9	славу же с мене совлече и отя венец от главы моея:
19:10	растерза мя окрест, и отидох: посече же яко древо надежду мою.
19:11 См.: 🔗Иов. 33:10	Люте же гнева употреби на мя и возмне мя яко врага.
19:12 См.: 🔗Иов. 25:3	Вкупе же приидоша искушения Его на мя, на путех же моих обыдоша мя наветницы.
19:13 См.: 🔗Пс. 30:12	Братия моя отступиша от мене, познаша чуждих паче мене, и друзие мои немилостиви быша:
19:14	не снабдеша мя ближнии мои, и ведящии имя мое забыша мя.
19:15	Соседи дому и рабыни моя, (яко) иноплеменник бых пред ними:
19:16	раба моего звах, и не послуша, уста же моя моляхуся:
19:17 См.: 🔗Иов. 2:9	и просих жену мою, призывах же лаская сыны подложниц моих:
19:18	они же мене в век отринуша, егда востану, на мя глаголют.
19:19	Гнушахуся мене видящии мя, и ихже любих, восташа на мя.
19:20	В кожи моей согниша плоти моя, кости же моя в зубех содержатся.
19:21	Помилуйте мя, помилуйте мя, о, друзие! Рука бо Господня коснувшаяся ми есть.
19:22	Почто мя гоните якоже и Господь? От плотей же моих не насыщаетеся?
19:23	Кто бо дал бы, да напишутся словеса моя, и положатся оная в книзе во век?
19:24	И на дщице железне и олове, или на камениих изваяются?
19:25 См.: 🔗Гал. 3:14 🔗Отк. 5:9 🔗Иез. 37:3 🔗2Мак. 7:11 🔗Ин. 11:25	Вем бо, яко присносущен есть, иже имать искупити мя,
19:26	(и) на земли воскресити кожу мою терпящую сия, от Господа бо ми сия совершишася,
19:27 См.: 🔗Ин. 8:56 🔗Авв. 2:4	яже аз в себе свем, яже очи мои видеста, а не ин: вся же ми совершишася в недре.
19:28	Аще же и речете: что речем противу ему? И корень словесе обрящем в нем.
19:29	Убойтеся же и вы от меча: ярость бо на беззаконныя найдет, и тогда увидят, где есть их вещество.