Евангелие от Марка, глава 10

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 10
10:1	И оттуду востав прейде в пределы Иудейския, об он пол Иордана. И снидошася паки народи к Нему: и яко обычай име, паки учаше их.
10:2 См.: 🔗Мф. 19:3	И приступльше фарисее вопросиша Его: аще достоит мужу жену пустити? Искушающе Его.
10:3	Он же отвещав рече им: что вам заповеда Моисей?
10:4 См.: 🔗Втор. 24:1 🔗Мф. 5:31 🔗Лк. 16:18	Они же реша: Моисей повеле книгу распустную написати, и пустити.
10:5	И отвещав Иисус рече им: по жестосердию вашему написа вам заповедь сию:
10:6 См.: 🔗Быт. 1:27 🔗Мф. 19:4	от начала же создания, мужа и жену сотворил я есть Бог:
10:7 См.: 🔗1Кор. 6:16	сего ради оставит человек отца своего и матерь
10:8 См.: 🔗Быт. 2:24	и прилепится к жене своей, и будета оба в плоть едину: темже уже неста два, но плоть едина:
10:9 См.: 🔗1Кор. 7:10	еже убо Бог сочета, человек да не разлучает.
10:10	И в дому паки ученицы Его о сем вопросиша Его.
10:11	И глагола им: иже аще пустит жену свою и оженится иною, прелюбы творит на ню:
10:12	и аще жена пустит мужа и посягнет за иного, прелюбы творит.
10:13 См.: 🔗Мф. 19:13 🔗Лк. 18:15	И приношаху к Нему дети, да коснется их: ученицы же прещаху приносящым.
10:14 См.: 🔗Мф. 18:4 🔗1Пет. 2:2 🔗1Кор. 14:20	Видев же Иисус негодова и рече им: оставите детей приходити ко Мне и не браните им, тацех бо есть Царствие Божие:
10:15 См.: 🔗Мф. 11:25	аминь глаголю вам: иже аще не приимет Царствия Божия яко отроча, не имать внити в не.
10:16 См.: 🔗Мф. 19:15	И объемь их, возложь руце на них, благословляше их.
10:17 См.: 🔗Мф. 19:16 🔗Лк. 18:18	И исходящу Ему на путь, притек некий и поклонься на колену Ему, вопрошаше Его: Учителю благий, что сотворю, да живот вечный наследствую?
10:18	Иисус же рече ему: что Мя глаголеши блага? Никтоже благ, токмо един Бог.
10:19 См.: 🔗Исх. 20:12 🔗Втор. 5:17 🔗Мф. 5:21 🔗Лк. 18:20	Заповеди веси: не прелюбы сотвориши: не убий: не укради: не лжесвидетелствуй: не обиди: чти отца твоего и матерь.
10:20	Он же отвещав рече Ему: Учителю, сия вся сохраних от юности моея.
10:21 См.: 🔗Мф. 6:19	Иисус же воззрев нань, возлюби его и рече ему: единаго еси не докончал: иди, елика имаши, продаждь и даждь нищым, и имети имаши сокровище на небеси: и прииди (и) ходи вслед Мене, взем крест.
10:22	Он же дряхл быв о словеси, отиде скорбя: бе бо имея стяжания многа.
10:23 См.: 🔗Иов. 31:24 🔗Иак. 2:5 🔗1Тим. 6:17	И воззрев Иисус глагола учеником Своим: како неудобь имущии богатство в Царствие Божие внидут.
10:24	Ученицы же ужасахуся о словесех Его. Иисус же паки отвещав глагола им: чада, како неудобь уповающым на богатство в Царствие Божие внити:
10:25	удобее бо есть вельбуду сквозе иглине ушы проити, неже богату в Царствие Божие внити.
10:26	Они же излиха дивляхуся, глаголюще к себе: то кто может спасен быти?
10:27 См.: 🔗Иов. 42:2	Воззрев же на них Иисус глагола: у человек невозможно, но не у Бога: вся бо возможна суть у Бога.
10:28 См.: 🔗Мф. 19:27 🔗Лк. 18:28	Начат же Петр глаголати Ему: се, мы оставихом вся и вслед Тебе идохом.
10:29	Отвещав же Иисус рече: аминь глаголю вам: никтоже есть, иже оставил есть дом, или братию, или сестры, или отца, или матерь, или жену, или чада, или села, Мене ради и Евангелиа ради:
10:30	аще не приимет сторицею ныне во время сие, домов, и братий, и сестр, и отца, и матере, и чад, и сел, во изгнании, и в век грядущий живот вечный:
10:31 См.: 🔗Мф. 19:30 🔗Лк. 13:30	мнози же будут первии последни, и последнии перви.
10:32	Бяху же на пути, восходяще во Иерусалим: и бе варяя их Иисус, и ужасахуся, и вслед идуще, бояхуся. И поемь паки обанадесять, начат им глаголати, яже хотяху Ему быти:
10:33 См.: 🔗Мф. 20:18 🔗Лк. 18:31	яко, се, восходим во Иерусалим, и Сын Человеческий предан будет архиереом и книжником, и осудят Его на смерть, и предадят Его языком:
10:34	и поругаются Ему, и уязвят Его, и оплюют Его, и убиют Его: и в третий день воскреснет.
10:35 См.: 🔗Мф. 20:20	И пред Него приидоста Иаков и Иоанн, сына Зеведеева, глаголюща: Учителю, хощева, да, еже аще просива, сотвориши нама.
10:36	Он же рече има: что хощета, да сотворю вама?
10:37	Она же реста Ему: даждь нам, да един о десную Тебе и един о шуюю Тебе сядева во славе Твоей.
10:38	Иисус же рече има: не веста, чесо просита: можета ли пити чашу, юже Аз пию, и крещением, имже Аз крещаюся, креститися?
10:39	Она же реста Ему: можева. Иисус же рече има: чашу убо, юже Аз пию, испиета, и крещением, имже Аз крещаюся, креститася:
10:40	а еже сести о десную Мене и о шуюю, несть Мне дати, но имже уготовано есть.
10:41 См.: 🔗Мф. 20:24 🔗Лк. 22:24	И слышавше десять, начаша негодовати о Иакове и Иоанне.
10:42	Иисус же призвав их, глагола им: весте, яко мнящиися владети языки, соодолевают им, и велицыи их обладают ими:
10:43	не тако же будет в вас: но иже аще хощет в вас вящший быти, да будет вам слуга:
10:44 См.: 🔗Мк. 9:35	и иже аще хощет в вас быти старей, да будет всем раб:
10:45 См.: 🔗Ин. 13:15 🔗1Пет. 5:3 🔗Флп. 2:7	ибо Сын Человечь не прииде, да послужат Ему, но да послужит и даст душу Свою избавление за многи.
10:46 См.: 🔗Мф. 20:29	И приидоша во Иерихон. И исходящу Ему от Иерихона, и учеником Его, и народу многу, сын Тимеов Вартимей слепый седяше при пути, прося.
10:47	И слышав, яко Иисус Назорянин есть, начат звати и глаголати: Сыне Давидов Иисусе, помилуй мя.
10:48	И прещаху ему мнози, да умолчит: он же множае паче зваше: Сыне Давидов, помилуй мя.
10:49	И став Иисус, рече его возгласити. И возгласиша слепца, глаголюще ему: дерзай, востани, зовет тя.
10:50	Он же отверг ризы своя, востав прииде ко Иисусови.
10:51	И отвещав глагола ему Иисус: что хощеши, да сотворю Тебе? Слепый же глагола Ему: Учителю, да прозрю.
10:52	Иисус же рече ему: иди: вера твоя спасе тя. И абие прозре и по Иисусе иде в путь.