Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 2 | |
2:1 См.: 🔗2Кор. 10:4 🔗Еф. 6:10 | Ты убо, чадо мое, возмогай во благодати, яже о Христе Иисусе, |
2:2 См.: 🔗1Тим. 6:20 | и яже слышал еси от мене многими свидетели, сия предаждь верным человеком, иже доволни будут и иных научити. |
2:3 | Ты убо злопостражди яко добр воин Иисус Христов. |
2:4 См.: 🔗1Кор. 9:25 | Никтоже (бо) воин бывая обязуется куплями житейскими, да воеводе угоден будет. |
2:5 | Аще же и постраждет кто, не венчается, аще не законно мучен будет. |
2:6 | Труждающемуся делателю прежде подобает от плода вкусити. |
2:7 | Разумей, яже глаголю: да даст убо тебе Господь разум о всем. |
2:8 См.: 🔗1Кор. 15:4 | Поминай (Господа) Иисуса Христа воставшаго от мертвых, от семене Давидова, по благовествованию моему, |
2:9 См.: 🔗Деян. 21:11 🔗1Кор. 4:9 | в немже злостражду даже до уз, яко злодей: но слово Божие не вяжется. |
2:10 | Сего ради вся терплю избранных ради, да и тии спасение улучат еже о Христе Иисусе, со славою вечною. |
2:11 См.: 🔗Рим. 6:4 | Верно слово: аще бо с Ним умрохом, то с Ним и оживем: |
2:12 | аще терпим, с Ним и воцаримся: аще отвержемся, и Той отвержется нас: |
2:13 См.: 🔗Рим. 3:3 | аще не веруем, Он верен пребывает: отрещися бо Себе не может. |
2:14 | Сия воспоминай, засвидетелствуя пред Господем, не словопретися, ни на куюже потребу, на разорение слышащих. |
2:15 | Потщися себе искусна поставити пред Богом, делателя непостыдна, право правяща слово истины. |
2:16 | Скверных же тщегласий отметайся: наипаче бо преспеют в нечестие, |
2:17 См.: 🔗1Тим. 1:20 | и слово их яко гаггрена жир обрящет: от нихже есть Именей и Филит, |
2:18 | иже о истине погрешиста, глаголюща, яко воскресение уже бысть: и возмущают некоторых веру. |
2:19 | Твердое убо основание Божие стоит, имущее печать сию: позна Господь сущыя Своя, и: да отступит от неправды всяк именуяй имя Господне. |
2:20 См.: 🔗Рим. 9:21 | В велицем же дому не точию сосуди злати и сребряни суть, но и древяни и глиняни: и ови убо в честь, ови же не в честь. |
2:21 См.: 🔗Ис. 52:11 🔗2Тим. 3:17 | Аще убо кто очистит себе от сих, будет сосуд в честь, освящен и благопотребен Владыце, на всякое дело благое уготован. |
2:22 См.: 🔗Гал. 5:16 🔗1Тим. 6:11 | Похотей юных бегай, держися же правды, веры, любве, мира со всеми призывающими Господа от чистаго сердца. |
2:23 | Буих же и ненаказанных стязаний отрицайся, ведый, яко раждают свары: |
2:24 См.: 🔗Тит. 3:2 | рабу же Господню не подобает сваритися, но тиху быти ко всем, учителну, незлобиву, |
2:25 См.: 🔗Деян. 8:22 | с кротостию наказующу противныя, еда како даст им Бог покаяние в разум истины, |
2:26 | и возникнут от диаволския сети, живи уловлени от него в свою его волю. |