Евангелие от Луки, глава 19

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Рус. (еп. Кассиан) Беларускi Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 19
19:1	И вшед прохождаше Иерихон.
19:2	И се, муж нарицаемый Закхей, и сей бе старей мытарем, и той бе богат:
19:3	и искаше видети Иисуса, кто есть, и не можаше от народа, яко возрастом мал бе:
19:4	и предитек, возлезе на ягодичину, да видит, яко хотяше мимо ея проити.
19:5	И яко прииде на место, воззрев Иисус виде его и рече к нему: Закхее, потщався слези: днесь бо в дому твоем подобает Ми быти.
19:6	И потщався слезе и прият Его радуяся.
19:7	И видевше вси роптаху, глаголюще, яко ко грешну мужу вниде витати.
19:8 См.: 🔗Исх. 22:1	Став же Закхей рече ко Господу: се, пол имения моего, Господи, дам нищым: и аще кого чим обидех, возвращу четверицею.
19:9	Рече же к нему Иисус, яко днесь спасение дому сему бысть, зане и сей сын Авраамль есть:
19:10 См.: 🔗Мф. 18:11	прииде бо Сын Человечь взыскати и спасти погибшаго.
19:11	Слышащым же им сия, приложь рече притчу, зане близ Ему быти Иерусалима, и мняху, яко абие Царство Божие хощет явитися.
19:12 См.: 🔗Мф. 25:14	Рече убо: человек некий добра рода иде на страну далече прияти себе царство и возвратитися:
19:13	призвав же десять раб своих, даде им десять мнас и рече к ним: куплю дейте, дондеже прииду.
19:14	И граждане его ненавидяху его и послаша послы вслед его, глаголюще: не хощем сему, да царствует над нами.
19:15	И бысть егда возвратися приим царство, рече пригласити рабы тыя, имже даде сребро, да увесть, какову куплю суть сотворили.
19:16	Прииде же первый, глаголя: господи, мнас твоя придела десять мнас.
19:17 См.: 🔗Лк. 16:10	И рече ему: благо, рабе добрый: яко о мале верен был еси, буди область имея над десятию градов.
19:18	И прииде вторый, глаголя: господи, мнас твоя сотвори пять мнас.
19:19	Рече же и тому: и ты буди над пятию градов.
19:20	И другий прииде, глаголя: господи, се, мнас твоя, юже имех положену во убрусе:
19:21	бояхся бо тебе, яко человек яр еси, вземлеши, егоже не положил еси, и жнеши, егоже не сеял еси.
19:22 См.: 🔗Иов. 15:6 🔗Мф. 12:37	Глагола же ему: от уст твоих сужду ти, лукавый рабе: ведел еси, яко аз человек яр есмь, вземлю, егоже не положих, и жну, егоже не сеях:
19:23	и почто не вдал еси моего сребра купцем, и аз пришед с лихвою истязал бых е?
19:24	И предстоящым рече: возмите от него мнас и дадите имущему десять мнас.
19:25	И реша ему: господи, имать десять мнас.
19:26 См.: 🔗Мф. 13:12 🔗Мф. 25:29 🔗Мк. 4:25 🔗Лк. 8:18	Глаголю бо вам, яко всякому имущему дастся: а от неимущаго, и еже имать, отимется от него:
19:27 См.: 🔗Мф. 22:7	обаче враги моя оны, иже не восхотеша мене, да царь бых был над ними, приведите семо и изсецыте предо мною.
19:28	И сия рек, идяше преди, восходя во Иерусалим.
19:29 См.: 🔗Мф. 21:1 🔗Мк. 11:1	И бысть яко приближися в Вифсфагию и Вифанию, к горе нарицаемей Елеон, посла два ученик Своих,
19:30	глаголя: идита в прямную весь: (и) в нюже входяща обрящета жребя привязано, на неже никтоже николиже от человек вседе: отрешша е приведита:
19:31	и аще кто вы вопрошает: почто отрешаета? Сице рцыта ему, яко Господь его требует.
19:32	Шедша же посланная обретоста, якоже рече има.
19:33	Отрешающема же има жребя, рекоша господие его к нима: что отрешаета жребя?
19:34	Она же рекоста, яко Господь его требует.
19:35 См.: 🔗Мф. 21:7 🔗Мк. 11:7 🔗Ин. 12:14	И приведоста е ко Иисусови: и возвергше ризы своя на жребя, всадиша Иисуса.
19:36	Идущу же Ему, постилаху ризы своя по пути.
19:37	Приближающужеся Ему уже (абие) к низхождению горе Елеонстей, начаша все множество ученик радующеся хвалити Бога гласом велиим о всех силах, яже видеша,
19:38 См.: 🔗Пс. 117:26 🔗Лк. 2:14 🔗Еф. 2:14	глаголюще: благословен грядый Царь во имя Господне: мир на небеси и слава в вышних.
19:39	И нецыи фарисее от народа реша к Нему: Учителю, запрети учеником Твоим.
19:40 См.: 🔗Авв. 2:11	И отвещав рече им: глаголю вам, яко, аще сии умолчат, камение возопиет.
19:41	И яко приближися, видев град, плакася о нем,
19:42	глаголя: яко аще бы разумел и ты, в день сей твой, еже к смирению твоему: ныне же скрыся от очию твоею:
19:43 См.: 🔗Ис. 29:3 🔗Иер. 6:6 🔗Иез. 21:22 🔗Мф. 22:7 🔗Лк. 21:6	яко приидут дние на тя, и обложат врази твои острог о тебе, и обыдут тя, и оымут тя отвсюду,
19:44	и разбиют тя и чада твоя в тебе, и не оставят камень на камени в тебе: понеже не разумел еси времене посещения твоего.
19:45 См.: 🔗Мф. 21:12 🔗Мк. 11:15 🔗Ин. 2:15	И вшед в церковь, начат изгонити продающыя в ней и купующыя,
19:46 См.: 🔗Ис. 56:7 🔗Иер. 7:11 🔗3Цар. 8:29	глаголя им: писано есть: дом Мой дом молитвы есть: вы же сотвористе его пещеру разбойником.
19:47	И бе учя по вся дни в церкви. Архиерее же и книжницы искаху Его погубити, и старейшины людем:
19:48	и не обретаху, что бы сотворили Ему: людие бо вси держахуся Его, послушающе Его.