Книга Притчей Соломоновых, глава 19

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 19
19:1 См.: 🔗Прит. 28:6	Лучше есть убог ходяй в простоте своей, неже богатый строптив устны своими и несмыслен.
19:2 См.: 🔗Прит. 6:18	Идеже несть учения души, несть добро, и иже скор есть ногама, поткнется.
19:3 См.: 🔗Сир. 15:11 🔗Иак. 1:13	Неразумие мужа погубляет пути его, и Бога виновна творит в сердцы своем.
19:4 См.: 🔗Прит. 14:20	Богатство прилагает други многи: нищий же и от сущаго друга оставляемь бывает.
19:5 См.: 🔗Втор. 19:19 🔗Дан. 13:51	Свидетель лжив без муки не будет: оклеветаяй же неправедно не убежит ея.
19:6	Мнози угождают лицам царским: всяк же зол бывает в поношение мужеви.
19:7	Всяк, иже убогаго брата ненавидит, и от содружества далече будет. Мысль благая ведящым ю приближается, муж же мудр обрящет ю. Много творяй зла совершает злобу, а иже раздражает словесы, не спасется.
19:8	Стяжавый мудрость любит себе, а иже сохраняет разум, обрящет благая.
19:9 См.: 🔗Прит. 21:28	Свидетель лживый не без муки будет, а иже разжизает злобу, погибнет от нея.
19:10 См.: 🔗Прит. 30:21	Не пользует безумному сладость, и аще раб начнет с досаждением обладати.
19:11 См.: 🔗Прит. 14:29	Милостив муж долготерпит, похвала же его превосходит законопреступных.
19:12 См.: 🔗Есф. 7:9 🔗Рим. 13:4	Царево прещение подобно рыканию львову, и якоже роса злаку, тако тихость его.
19:13 См.: 🔗Прит. 10:1	Студ есть отцу сын безумен, и нечисты обеты от мзды блудницы.
19:14 См.: 🔗Прит. 18:23	Дом и имение разделяют отцы чадом: от Господа же сочетавается жена мужеви.
19:15	Страх содержит мужа женонравна: душа же празднаго взалчет.
19:16 См.: 🔗Прит. 3:21 🔗Лк. 11:28	Иже хранит заповеди, соблюдает свою душу, а нерадяй о своих путех погибнет.
19:17 См.: 🔗Пс. 40:2 🔗Мф. 10:42 🔗Мф. 25:40	Милуяй нища взаим дает Богови, по даянию же его воздастся ему.
19:18 См.: 🔗Прит. 13:25 🔗Прит. 23:13	Наказуй сына твоего, тако бо будет благонадежен: в досаждение же не вземлися душею твоею.
19:19	Злоумен муж много отщетится: аще же губитель есть, и душу свою приложит.
19:20	Слушай, сыне, отца твоего наказания, да мудр будеши в последняя твоя.
19:21 См.: 🔗Иов. 23:13 🔗Прит. 16:1	Многи мысли в сердцы мужа: совет же Господень во век пребывает.
19:22	Плод мужеви милостыня: лучше же нищь праведный, нежели богат лжив.
19:23	Страх Господень в живот мужеви: а безстрашный водворится на местех, идеже не наблюдается разум.
19:24 См.: 🔗Прит. 26:15	Скрываяй в недрех руце свои неправедно ниже ко устом своим принесет я.
19:25 См.: 🔗Прит. 21:11	Губителю раны приемлющу, безумный коварнее будет: аще же обличаеши мужа разумна, уразумеет чувство.
19:26 См.: 🔗Прит. 15:20	Безчествуяй отца и отреваяй матерь свою срамоту приимет и поношение.
19:27	Сын оставляяй хранити наказание отчее поучится словесем злым.
19:28 См.: 🔗Иов. 15:16	Выручаяй отрока несмыслена досаждает оправданию: уста же нечестивых пожрут суд.
19:29	Уготовляются невоздержным раны, и мучения подобне неразумным.