Книга пророка Даниила, глава 4

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 4
4:1	Аз Навуходоносор обилуяй бех в дому моем и благоцветый на престоле моем:
4:2 См.: 🔗Дан. 2:1	сон видех, и устраши мя, и смятохся на ложи моем, и видения главы моея смятоша мя:
4:3	и мною положися повеление, привести пред мя вся мужы мудрыя Вавилонския, да сказание сна возвестят мне.
4:4	И вхождаху обаятелие, волсви, газарини, Халдее, и сон аз рех пред ними, и сказания его не возвестиша ми,
4:5 См.: 🔗Иез. 28:3	дондеже вниде (пред мя) Даниил, емуже имя Валтасар, по имения бога моего, иже духа Божия свята имать в себе, и сон пред ним рех:
4:6 См.: 🔗Дан. 2:47	Валтасаре, княже обаятелей, егоже аз разумех, яко дух Божий святый имаши, и всякая тайна не изнемогает пред тобою, слыши видение сна моего, еже видех, и сказание его повеждь мне.
4:7 См.: 🔗Иез. 31:3	И видение главы моея на ложи моем зрех, и се, древо среде земли, и высота его велика:
4:8	и возвеличися древо то и укрепися, и высота его досязаше до небесе, и величина его до конец земли всея,
4:9 См.: 🔗Иез. 31:6	листвие его прекрасное, и плод его мног, и пища всех в нем, и под ним вселяхуся вси зверие дивии, и в ветвех его живяху (вся) птицы небесныя, и от него питашеся всяка плоть.
4:10 См.: 🔗Пс. 33:8 🔗Пс. 90:11	Видех во сне нощию на ложи моем, и се, Бодрый и Святый от небесе сниде
4:11 См.: 🔗Иер. 8:13	и возгласи крепце и тако рече: посецыте древо и обийте ветви его, и оттрясите листвие его и разсыплите плод его, да позыблются зверие под ним и птицы с ветвий его:
4:12 См.: 🔗Иов. 14:7	точию отрасль корения его в земли оставите, и во узе железне и медне, и во злаце внешнем и в росе небесней вселится, и со зверьми (дивиими) часть его во траве земней:
4:13	сердце его от человек изменится, и сердце зверино дастся ему, и седмь времен изменятся над ним:
4:14 См.: 🔗Пс. 112:7	изречением Бодраго слово, и глагол Святых прошение: да уведят живущии, яко владеет Вышний царством человеческим, и емуже восхощет, даст е, и уничтоженное человеков возставит над ним.
4:15 См.: 🔗Дан. 1:17 🔗Дан. 6:3	Сей сон, егоже видех аз Навуходоносор царь: ты же, Валтасаре, сказание его повеждь, яко вси мудрии царства моего не могут сказания его поведати мне, ты же, Данииле, можеши, яко дух Божий свят в тебе.
4:16	Тогда Даниил, емуже имя Валтасар, ужасеся аки на един час, и размышления его смущаху его. И отвеща царь и рече: Валтасаре, сон мой и сказание его да не смущает тебе. И отвеща Валтасар и рече: господине, да будет сон сей ненавидящым тя, и сказание его врагом твоим.
4:17 См.: 🔗Иез. 31:3 🔗Пс. 36:35	Древо, еже видел еси возвеличившееся и укрепившееся, егоже высота досязаше до небесе и величина его на всю землю,
4:18	и листвие его благоцветное и плод его мног, и пища всем в нем, под ним живяху зверие дивии, и в ветвех его угнездяхуся птицы небесныя:
4:19 См.: 🔗Дан. 2:38 🔗Дан. 5:18	ты еси, царю, яко возвеличился еси и укрепел, и величество твое возвеличися и досяже небесе, и власть твоя до конец земли.
4:20	И яко виде царь Бодраго и Святаго сходяща с небесе, и рече: посецыте древо и разсыплите е, точию проничение корения его в земли оставите, и во узе железне и медяне и во злаце внешнем и в росе небесней водворится, и со зверьми дивиими часть его, дондеже седмь времен пременятся над ним:
4:21	сие сказание его, царю, и изречение Вышняго есть, еже приспе на господина моего царя:
4:22 См.: 🔗Дан. 5:21	изженут тя от человек, и с дивиими зверьми будет житие твое, и травою аки вола напитают тя, и от росы небесныя тело твое оросится, и седмь времен изменятся над тобою, дондеже увеси, яко владеет Вышний царством человеческим, и емуже восхощет, даст е.
4:23	А еже рече: оставите проничение корения древа (в земли): царство твое тебе будет, отнележе увеси власть небесную.
4:24 См.: 🔗Сир. 3:1	Сего ради, царю совет мой да будет тебе угоден, и грехи твоя милостынями искупи и неправды твоя щедротами убогих: негли будет долготерпелив грехом твоим Бог.
4:25	Сия вся постигоша Навуходоносора царя.
4:26	По двоюнадесяти месяцех в дому царства своего, в Вавилоне бе ходя,
4:27 См.: 🔗Дан. 5:20	отвеща царь и рече: несть ли сей Вавилон великий, егоже аз соградих в дом царства, в державе крепости моея, в честь славы моея?
4:28 См.: 🔗Деян. 12:23 🔗Иез. 31:11	Еще слову сущу во устех каря, глас с небесе бысть: тебе глаголется, Навуходоносоре царю: цартво твое прейде от тебе,
4:29 См.: 🔗Дан. 4:22 🔗Дан. 5:21	и от человек отженут тя, и со зверьми дивиими житие твое, и травою аки вола напитают тя и седмь времен изменятся на тебе, дондеже увеси, яко владеет Вышний царством человеческим, и емуже восхощет, даст е.
4:30 См.: 🔗Дан. 5:21	В той час слово скончася на цари Навуходоносоре, и от человек отгнася, и траву аки вол ядяше, и от росы небесныя тело его оросися, дондеже власи ему яко льву возрастоша и ногти ему аки птицам.
4:31 См.: 🔗Дан. 2:44 🔗Дан. 7:14	И по скончании тех дний, аз Навуходоносор очи свои на небо воздвиг, и ум мой ко мне возвратися, и Вышняго благослових, и Живущаго во веки похвалих и прославих, яко власть Его власть вечна, и царство Его в роды и роды,
4:32 См.: 🔗Иов. 9:12	и вси живущии на земли ни во чтоже вменишася, и по воли Своей творит в силе небесней и в селении земнем: и несть, иже воспротивится руце Его и речет Ему: что сотворил еси?
4:33	В то время ум мой возвратися ко мне, и в честь царства моего приидох, и зрак мой возвратися ко мне, и началницы мои и вельможи мои искаху мене: и в царстве моем утвердихся, и величество изюбилнее приложися мне.
4:34 См.: 🔗Пс. 110:7	Ныне убо аз Навуходоносор хвалю и превозношу и славлю Царя Небеснаго, яко вся дела Его истинна, и путие Его судбы, и вся ходящыя в гордости может смирити.