Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 31 | |
31:1 См.: 🔗Иер. 24:7 | Во время оно рече Господь, буду в Бога роду Израилеву, и тии будут Ми в люди. |
31:2 | Тако рече Господь: обретох теплоту в пустыни со изгибшими от меча: идите и не потребите Израиля, |
31:3 | Господь издалеча явится ему: любовию вечною возлюбих тя, того ради вовлекох тя в щедроты. |
31:4 См.: 🔗Пс. 121:3 🔗Иер. 33:7 | Яко возгражду тя, и возградишися, дево Израилева: возмеши тимпаны своя и изыдеши с собором играющих. |
31:5 См.: 🔗Ис. 65:21 | Еще насадите винограды в горе Самарийстей, насаждающе насадите и похвалите. |
31:6 См.: 🔗Ис. 2:3 | Яко есть день воззвания отвещавающих в горах Ефремовых: востаните и взыдите в Сион ко Господеви Богу нашему: |
31:7 См.: 🔗Ис. 2:2 | яко тако рече Господь Иакову: возвеселитеся веселием и воскликните на главу языков: слышано сотворите и похвалите, рцыте: спасе Господь люди Своя, останок Израилев. |
31:8 См.: 🔗Втор. 30:3 | Се, Аз веду их от севера и соберу их от конец земли в праздник Пасхи: и чадородит народ мног, и возвратятся семо. |
31:9 См.: 🔗2Кор. 6:18 🔗Исх. 4:22 | С плачем изыдоша, а со утешением возведу я, проводя чрез ровенники вод по пути праву, и не заблудят по нему: яко Аз бех Израилеви во отца, и Ефрем первенец Ми есть. |
31:10 См.: 🔗Иер. 32:37 🔗Иез. 11:16 | Слышите, языцы, слово Господне, и возвестите во островех дальних и рцыте: Развеявый Израиля соберет его и снабдит его, яко пастырь стадо свое. |
31:11 См.: 🔗Лк. 11:22 | Яко избави Господь Иакова и изят его от руки сильнейших его. |
31:12 См.: 🔗Ис. 58:11 | И приидут и возвеселятся в горе Сион, и приидут ко благотам Господним, на землю пшеницы и вина и плодов, и скотов и овнов: и будет душа их якоже древо плодовито, и не взалчут ктому. |
31:13 | Тогда возрадуются девицы в собрании юношей, и старцы возрадуются: и обращу плачь их на радость, и утешу их, и сотворю их веселы. |
31:14 См.: 🔗Ис. 66:21 | Возвеличу и упою душу жерцев сынов Левииных, и людие Мои благот Моих насытятся. |
31:15 См.: 🔗Мф. 2:18 | Тако рече Господь: глас в Раме слышан бысть плача и рыдания и вопля: Рахиль плачущися чад своих, и не хотяше утешитися, яко не суть. |
31:16 | Тако рече Господь: да почиет глас твой от плача и очи твои от слез, яко есть мзда делом твоим, глаголет Господь, и возвратятся от земли вражия: |
31:17 | и есть надежда последним твоим, (глаголет Господь,) и возвратятся сынове твои в пределы своя. |
31:18 | Слышя слышах Ефрема плачуща: наказал мя еси, (Господи,) и наказахся: аз якоже телец не научихся: обрати мя, и обращуся, яко Ты еси Господь Бог мой: |
31:19 См.: 🔗Рим. 2:4 | понеже последи пленения моего покаяхся и последи разумения моего возстенах в день посрамления и показах тебе, яко приях укоризну от юности моея. |
31:20 См.: 🔗Рим. 9:16 | Сын любезен Мне, Ефрем, отроча питеющееся, понеже словеса Моя в нем, памятию воспомяну и: того ради потщахся о нем, милуяй помилую его, рече Господь. |
31:21 | Постави себе самого, Сионе, стражу, сотвори мучение, направи сердце твое на путь прав, имже ходил еси: возвратися, девице Израилева, обратися во грады твоя рыдающи. |
31:22 | Доколе отвращаешися, дщи обезчествованая? Яко созда Господь спасение в насаждение ново, в немже спасении обыдут человецы. |
31:23 | Яко тако рече Господь: еще рекут слово сие в земли Иудейстей и во градех ея, егда возвращу преселение его: благословен Господь на праведней горе святей своей: |
31:24 | и живущии во градех Иудиных и во всей земли его, купно со земледельцем, и вознесется во стаде. |
31:25 | Яко упоих всяку душу жаждущу и всяку душу алчущу насытих. |
31:26 | Того ради востах от сна и видех, и сон ми сладок бысть. |
31:27 | Се, дние грядут, глаголет Господь, и всею Израиля и Иуду семя человечо и семя скотское. |
31:28 | И будет, якоже бдех на ня потребити и озлобити, тако бдети буду о них, еже созидати и насаждати, рече Господь. |
31:29 См.: 🔗Иез. 18:2 | В тыя дни не рекут ктому: отцы ядоша кислая, а зубы детем оскомнишася: |
31:30 | но кийждо своим грехом умрет, и ядшему кислая оскоменятся зубы его. |
31:31 См.: 🔗Евр. 8:8 | Се, дние грядут, глаголет Господь, и завещаю дому Израилеву и дому Иудину завет нов, |
31:32 | не по завету, егоже завещах отцем их в день, в оньже емшу ми за руку их, извести я от земли Египетския, яко тии не пребыша в завете Моем, и Аз небрегох их, глаголет Господь. |
31:33 См.: 🔗Евр. 8:10 🔗Иер. 24:7 | Яко сей завет, егоже завещаю дому Израилеву по днех онех, глаголет Господь: дая законы Моя в мысли их, и на сердцах их напишу я, и буду им в Бога, и тии будут Ми в люди: |
31:34 | и не научит кийждо ближняго своего и кийждо брата своего, глаголя: познай Господа: яко вси познают Мя от мала даже и до великаго их: яко милостив буду неправдам их и грехов их не помяну ктому. |
31:35 | Аще возиесется небо на высоту, рече Господь, и аще смирится испод земли низу, и Аз не отвергу рода Израилева о всех, яже сотвориша, глаголет Господь. |
31:36 См.: 🔗Быт. 1:16 🔗Пс. 135:8 | Тако рече Господь, давый солнце во свет дне, луну и звезды на свет нощи, и вопль на мори, и возшумеша волны его, Господь Вседержитель имя Ему. |
31:37 См.: 🔗Иер. 33:20 | Аще премолкнут законы сии от лица Моего, рече Господь, то и род Израилев престанет быти язык пред лицем Моим во вся дни. |
31:38 | Се, дние грядут, рече Господь, и созиждется град Господеви от столпа Анамеиля до врат уголных: |
31:39 | и изыдет размерение его противу ему до могил Гарив, и оымется окрест избранным камением, |
31:40 См.: 🔗4Цар. 11:16 🔗Неем. 3:28 | и всю юдоль мертвых и пепела, и весь Ассаримоф даже до водотечи Кедрския, даже до угла коний врат восточных, освящение Господеви, и ктому не исторгнется и не потребится даже до века. |