Язык:
Церковнослав. (гражд.)
Елизаветинская Библия на церковнославянском языке в гражданском начертании.
| |
Глава 15 | |
15:1 См.: 🔗Исх. 34:6 🔗Пс. 102:8 | Ты же Бог наш благ и истинен, долготерпелив и в милости управляяй вся. |
15:2 См.: 🔗1Ин. 2:1 | Ибо аще согрешим, Твои есмы, ведуще державу Твою: и аще не согрешим, вемы, яко Тебе вменихомся. |
15:3 См.: 🔗Иер. 9:24 🔗Ин. 17:3 | Еже бо знати Тебе, всесовершена (есть) правда, и ведети державу Твою, корень есть безсмертия. |
15:4 | Ниже бо прельсти нас человеческое злохитрое умышление, ниже сеннописаных труд безплодный, вид изваян различными шары, |
15:5 | ихже зрак безумным приходит в похотение, и любят мертваго образа вид бездушный. |
15:6 См.: 🔗Прем. 1:16 | Злых любителие достойнии таковых надежд и творящии, и любящии, и чествующии. |
15:7 См.: 🔗Рим. 9:21 | Ибо скудельник, мягкую землю мнущь со трудом, делает ко служению нашему коеждо: но от тогожде брения созда и яже чистых дел служебныя сосуды, и сопротивныя, вся подобне: сих же обоих коегождо есть употребление, судия есть бреноделатель. |
15:8 | И злотрудник бога суетна от тогожде творит брения, иже мало прежде от земли сотворен быв, по мале идет, из неяже взят бысть, истязан о душевнем долзе. |
15:9 См.: 🔗Ис. 40:19 | Но есть ему прилежание, не яко имать трудитися, ниже яко краткоконечно житие имать: но ревнует златоделателем и сребролиятелем, и меди делателем подражает, и славу мнит, яко скверная делает. |
15:10 | Пепел бо есть сердце его, и земли хуждше упование его, и брения безчестнее живот его: |
15:11 См.: 🔗Быт. 2:7 | яко не уведе Создавшаго его, и вдохнувшаго ему душу действительную, и вдунувшаго дух животный. |
15:12 См.: 🔗1Тим. 6:5 🔗Иак. 4:13 | Но вмениша игралище быти живот наш, и житие все упражнено на приобретение: ибо глаголют, яко подобает откуду либо, аще и от зла, приобретати. |
15:13 | Сей бо паче всех весть, яко согрешает, от вещества земленаго удобныя к сокрушению сосуды и изваяния содеваяй. |
15:14 | Вси же пребезумнейшии и окаяннейшии, паче души младенческия, врази людий Твоих обладавшии ими: |
15:15 См.: 🔗Пс. 113:12 🔗Пс. 134:15 | яко вся идолы язычески вмениша в боги, имже ниже очес употребление ко зрению, ниже ноздри в привлечение аера, ниже уши слышати, ниже персты рук во осязание, и ноги их праздны ко хождению. |
15:16 | Человек бо сотвори их, и духа взаим взяв созда их: ни един бо человек может себе подобна бога создати: |
15:17 | смертен же сый мертва делает рукама беззаконныма: лучший бо есть идолов своих: (яко) сей убо поживе, онии же никогда. |
15:18 | И животных мерзких чтут: безумная бо сравняемая иных суть хуждша. |
15:19 | Ниже елико вожделети яко в лицы животных блага суть, отбегоша же и Божия хвалы и благословения Его. |