Книга Бытия, глава 28

	Язык: Церковнослав. (гражд.) Церковнослав. (цс.) Церковнослав. (дореф.) Рус. (Синодальный) Українська English (NKJV) English (KJV) Srpski Елизаветинская Библия на церковно­славянском языке в гражданском начертании.
	Глава 28
28:1 См.: 🔗Быт. 24:3	Призвав же Исаак Иакова, благослови его и заповеда ему, глаголя: да не поймеши жены от дщерей Хананейских:
28:2 См.: 🔗Быт. 22:23	востав отбежи в Месопотамию в дом Вафуила отца матере твоея, и поими себе оттуду жену от дщерей Лавана брата матере твоея:
28:3	Бог же мой да благословит тя и возрастит тя и умножит тя, и будеши в собрания языков:
28:4	и да даст тебе благословение Авраама отца моего, тебе и семени твоему по тебе наследити землю обитания твоего, юже даде Бог Аврааму.
28:5 См.: 🔗Ос. 12:12	Посла же Исаак Иакова: и отиде в Месопотамию к Лавану сыну Вафуила Сирина, к брату же Ревекки матере Иаковли и Исавли.
28:6 См.: 🔗Быт. 26:34	Виде же Исав, яко благослови Исаак Иакова и посла в Месопотамию сирскую пояти оттуду себе жену, егда благослови его и заповеда ему, глаголя: да не поймеши жены от дщерей Хананейских.
28:7	И послуша Иаков отца и матере своея, и отиде в Месопотамию сирскую.
28:8	Видев же Исав, яко злы суть дщери Хананейския пред Исааком отцем его,
28:9 См.: 🔗Быт. 25:13	отиде Исав ко Исмаилу и взя Маелефу дщерь Исмаила сына Авраамля, сестру Навеофову, жену к женам своим.
28:10 См.: 🔗Быт. 26:23 🔗Быт. 27:43	И отиде Иаков от кладязя Клятвеннаго и иде в Харран,
28:11 См.: 🔗Быт. 35:1 🔗Быт. 48:3	и обрете место и успе тамо, зайде бо солнце: и взя от камения места (того) и положи в возглавие себе, и спа на месте онем.
28:12 См.: 🔗Ин. 1:51	И сон виде: и се, лествица утверждена на земли, еяже глава досязаше до небесе, и Ангели Божии восхождаху и низхождаху по ней:
28:13 См.: 🔗Быт. 35:1 🔗Быт. 48:3 🔗Сир. 44:25	Господь же утверждашеся на ней и рече: Аз есмь Бог Авраама отца твоего и Бог Исаака, не бойся: земля, идеже ты спиши на ней, тебе дам ю и семени твоему:
28:14 См.: 🔗Втор. 12:20 🔗Втор. 19:8 🔗Быт. 26:4	и будет семя твое яко песок земный, и распространится на море, и ливу, и север, и на востоки: и благословятся о тебе вся колена земная и о семени твоем:
28:15 См.: 🔗Ис. 43:2	и се, Аз есмь с тобою, сохраняяй тя на всяком пути, аможе аще пойдеши, и возвращу тя в землю сию: яко не имам тебе оставити, дондеже сотворити ми вся, елика глаголах тебе.
28:16	И воста Иаков от сна своего и рече: яко есть Господь на месте сем, аз же не ведех.
28:17 См.: 🔗Исх. 3:5 🔗Нав. 5:15	И убояся и рече: яко страшно место сие: несть сие, но дом Божий, и сия врата небесная.
28:18 См.: 🔗Быт. 31:13	И воста Иаков заутра, и взя камень, егоже положи тамо в возглавие себе: и постави его в столп, и возлия елей верху его.
28:19 См.: 🔗Быт. 35:6	И прозва Иаков имя месту тому Дом Божий: Уламлуз же бе имя граду первее.
28:20 См.: 🔗1Тим. 6:8	И положи Иаков обет, глаголя: аще будет Господь Бог со мною и сохранит мя на пути сем, в оньже аз иду, и даст ми хлеб ясти, и ризы облещися,
28:21	и возвратит мя здрава в дом отца моего, и будет Господь мне в Бога:
28:22 См.: 🔗Быт. 35:7	и камень сей, егоже поставих в столп, будет ми дом Божий, и от всех, яже ми даси, десятину одесятствую та Тебе.